ސްޓެލްކޯގެ ޚަރަދުތައް ކުޑަކުރުމުގެ ސިޔާސަތުގެ ދަށުން ބައެއް ބޮޑެތި ޕްރޮޖެކްޓްތައް މަޑު ޖައްސާލައިފި
31 މެއި 2020 | އާދީއްތަ 04:43ޚަރަދުތައް ކުޑަ ކުރުމަށް ވަރަށް ގިނަ މަސައްކަތްތަކެއް ކުރެވިފައިވޭ
ހޮނިހިރު ދުވަހު އެންއީއޯސީ ބޭއްވި ނޫސްވެރިންގެ ބައްދަލުވުމުގައި ސްޓެލްކޯގެ މެނޭޖިން ޑިރެކްޓަރު ހަސަން މުގުނީ ވާހަކަ ދައްކަވަނީ
ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ ޚަރަދުތައް ކުޑަކުރުމުގެ ސިޔާސަތުގެ ދަށުން ބައެއް ބޮޑެތި ޕްރޮޖެކްޓްތައް މަޑު ޖައްސާލާފައިވާ ކަމަށް މެނޭޖިން ޑިރެކްޓަރު ހަސަން މުގުނީ ވިދާޅުވެއްޖެއެވެ.
ހޮނިހިރު ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މުގުނީ ވިދާޅުވީ ކުންފުނީގެ ޚަރަދުތައް ކުޑަ ކުރުމަށް ވަރަށް ގިނަ މަސައްކަތްތަކެއް ކުރަމުންދާ ކަމަށާއި، ގިނަ ކަންތައްތަކެއް ކުރެވިފައިވާ ކަމަށެވެ.
އެގޮތުން ކުންފުނިން ހިންގާ ބޮޑެތި ޕްރޮޖެކްޓްތައް މަޑު ޖައްސާލާފައިވާ ކަމަށް މުގުނީ ވިދާޅުވިއެވެ. ނަމަވެސް އެއީ ކޮން ޕްރޮޖެކްޓްތަކެއްކަން މުގުނީ ހާމައެއް ނުކުރައްވައެވެ.
މީގެ އިތުރުން މުގުނީ ވިދާޅުވީ ޚަރަދު ކުޑަކުރެވެން ހުރި އޭރިޔާތައް ކަނޑައަޅާ، މިހާރު ވެސް ޚަރަދުތައް ވަރަށް ބޮޑުތަނުން ކުޑަ ކުރެވިފައިވާ ކަމަށެވެ.
ސްޓެލްކޯއިން ބުނީ ފިނޭންސް މިނިސްޓްރީން ކަނޑައަޅާފައިވާ ގޮތަށް ޚަރަދު ކުޑަ ކުރުމާއި، މުވައްޒަފުންގެ މުސާރައަށް ގެންނަން ޖެހޭ ބަދަލުތަކަށް ވަކި ނިޒާމެއްގެ ތެރެއިން ކުރިއަށް ގެންދާނެ ކަމަށެވެ.
މުވައްޒަފުންނަށް މުސާރަ ނުދޭ ކަމަށް ކުރެވިފައިވާ ތުހުމަތުތަކާ ގުޅިގެން ސްޓެލްކޯއިން ބުނީ މުވައްޒަފުންނަށް ކަނޑައެޅިފައި އޮންނަ މުސާރަ ބަރާބަރަށް ލިބޭނެ ކަމަށާއި، އެއީ އެއްވެސް ގޮތަކަށް ލަސްވާނެ އެއްޗެއް ނޫން ކަމަށެވެ.
