ރާއްޖޭގައި ގަވާއިދާ ހިލާފަށް އުޅޭ ބަންގްލަދޭޝްގެ ރައްޔިތުން އަނބުރާ ގައުމަށް ފޮނުވާލަން، ސަރުކާރުން ކުރަމުންދާ މަސައްކަތުގެ ތެރެއިން އިތުރު 393 މީހަކު ފުރުވާލައިފި އެވެ.

ދެ ދުވަހެއްގެ މަތިން 393 މީހަކު ފުރުވާލާފައިވާއިރު، ހުކުރު ދުވަހު 195 މީހަކު ފުރުވާލި އެވެ. އަދި ހޮނިހިރު ދުވަހު 198 މީހަކު ފޮނުވާލާފައިވާ ކަމަށް އިމިގްރޭޝަނުން މައުލޫމާތުދޭ އެވެ.

އިކޮނިމިކް މިނިސްޓްރީއާ ފޮރިން މިނިސްޓްރީ ގުޅިގެން ބިދޭސީންގެ ފޮނުވާލުމުގެ މަސައްކަތް ފަށާފައިވާއިރު، މީގެ ކުރިންވެސް ގިނަ އަދަދެއްްގެ ބިދޭސީންތަކެއް ވަނީ ފޮނުވާލާފަ އެވެ.

ރާއްޖޭގައި ކޮވިޑް-19 ފެތުރެމުންދާއިރު، މި ބައްޔަށް މިހާތަނަށް އެންމެ ގިނައިން ޕޮޒިޓިވްވެފައިވަނީ ބަންގްލަދޭޝްގެ ރައްޔިތުންނެވެ. މި މީހުންގެ ތެރެއިން ގިނަ މީހުންނަކީ މާލޭގެ ކުދި ތަންތަންކޮޅުގައި ތޮއްޖެހިގެން ދިރިއުޅޭ މީހުންނެވެ. އެ ތަންތަނުގެ ތޮއްޖެހުން ކުޑަކޮށް، ސަރުކާރުން ގާއިމްކޮށްފައިވާ ފެސިލިޓީސްތަކަށް ބިދޭސީން ވަނީ ބަދަލުކޮށްފަ އެވެ. ފުލުހުން ދަނީ މިހާރުވެސް މާލޭގައި ހުރި ބިދޭސީން ދިރިއުޅޭ ތަންތަން ބަލަހައްޓަމުންނެވެ. ބިދޭސީންގެ ތެރެއިން ބައެއް މީހުން ވަނީ ބަލިޖެހި ރަނގަޅުވެފައި އެވެ.