ސިޓީގެ އެއްބަސްވުން ދިގު މުއްދަތަކަށް އާކުރަން ޑިބްރޭނާ ތައްޔާރު

މެންޗެސްޓާ ސިޓީގެ އެއްބަސްވުން އާކުރަން ބެލްޖިއަމް މިޑްފީލްޑަރު ކެވިން ޑިބްރޭނާ ތައްޔާރަށް ހުރި ކަމަށް ރިޕޯޓުތައް ބުނެފި އެވެ.

މިދިޔަ ފެބްރުއަރީ މަހު ޔުއެފާ އިން ވަނީ ފައިނޭންޝިއަލް ފެއާޕްލޭ (އެފްއެފްޕީ) ގަވާއިދާ މެންޗެސްޓާ ސިޓީން ޚިލާފުވެފައިވާތީ އެ ޓީމު ޔޫރަޕްގެ މުބާރާތްތަކުން ސަސްޕެންޑް ކުރަން ނިންމާފައެވެ. ޔުއެފާއިން ކުރިއަށް އޮތް ދެ ސީޒަނަށް ސިޓީ ސަސްޕެންޑް ކުރުމުން، 2020/2021 އަދި 2021/2022 ވަނަ އަހަރުގެ ސީޒަނުގެ ޔޫރަޕް މުބާރާތްތަކުގައި އެޓީމަށް ނުކުޅެވޭނެ އެވެ.

ޑިބްރޭނާ މީގެ ކުރިން ބުނެފައިވަނީ ސިޓީގެ އިސްތިއުނާފު ކާމިޔާބު ނުވެއްޖެ ނަމަ، ދެ އަހަރު ޔޫރަޕްގެ މުބާރާތްތަކުގައި ވާދަނުކޮށް ހުންނަން އުނދަގޫ ކަމަށެވެ.

އެކަމަކު ރިޕޯޓުތައް ބުނާ ގޮތުން ސިޓީން ވަނީ އެ މައްސަލަ އިސްތިއިނާފުކޮށް ކާމިޔާބުކުރާނެ ކަމުގެ ޔަގީންކަން ކުޅުންތެރިންނަށް ދީފައެވެ. އެއާއެކު ސިޓީގެ އެއްބަސްވުން ދިގު މުއްދަތަކަށް އާކުރަން ޑިބްރޭނާ ތައްޔާރަށް ހުރި ކަމަށް ރިޕޯޓުތައް ބުނެއެވެ.

ސިޓީ ސަސްޕެންޑް ކުރި މައްސަލަ ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް) ގައި މިހާރު ވަނީ ޖޫން މަހުގެ 8ން 10ށް ތާވަލުކޮށްފައެވެ.

2015 ވަނަ އަހަރު ސިޓީއާ ގުޅުނު ޑިބްރޭނާ އަންނަނީ އެޓީމުގައި މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ މިހާތަނަށް ސިޓީ އަށް ކުޅެދިން 209 މެޗުގައި 50 ލަނޑު ޖަހާފައެވެ. އަދި ޑިބްރޭނާ ވަނީ ސިޓީ އާއެކު ޕްރިމިއާ ލީގު ދެފަހަރު ކާމިޔާބުކުރުމުގެ އިތުރުން އެފްއޭ ކަޕް އެއް ފަހަރު ކާމިޔާބުކޮށްފައެވެ.