4818 މީހަކަށް މާލެ ސިޓީއަށް އައުމުގެ ހުއްދަ ދީފައިވޭ: ޕޮލިސް

މިހާތަނަށް 4818 މީހަކަށް މާލެ ސިޓީއަށް އައުމުގެ ހުއްދަ ދީފައިވާ ކަމަށް ފުލުހުން ބުނެފި އެވެ.

ނޭޝަނަލް އެމަޖެންސީ އޮޕަރޭޝަން ސެންޓަރ (އެންއީއޯސީ)ގައި ބުރާސްފަތި ދުވަހުގެ ބޭއްވި ނޫސްވެރިންގެ ބައްދަލުވުމުގައި އެސިސްޓަންޓް ކޮމިޝަނަރ އޮފް ޕޮލިސް އިސްލާއީލް ނަވީން ވިދާޅުވީ، ބުރާސްފަތި ދުވަހުގެ މެންދުރު 2:00 އާ ހަމައަށް 4818 މީހަކަށް މާލެއަށް އައުމުގެ ހުއްދަ ދީފައިވާ ކަމަށެވެ.

ނަވީން ވިދާޅުވީ، އީދަށްފަހު މާލެ ސިޓީއަށް އައުމަށް އެދޭ މީހުންގެ އަދަދު އިތުރުވަމުންދާ ކަމަށެވެ. އަދި މާލެ ސިޓީއަށް އައުމުގެ ކަންކަން ވެސް ޕޯޓަލް މެދުވެރިކޮށް ހުއްދަ ދިނުމުގެ މަސައްކަތް ފުލުހުން ކުރަމުންދާނެ ކަމަށާއި މެޑިކަލް އެމަޖެންސީތަކުގައި މިހާރުވެސް ހުއްދަ ދެމުން އަންނަ އުސޫލުން ހުއްދަ ދެމުންދާނެ ކަމަށް ވެސް ނަވީން ވިދާޅުވި އެވެ.

ކޮވިޑް-19 އާ ގުޅިގެން މާލެ ސަރަހައްދުގައި މިދިޔަ އޭޕްރީލް މަހުގެ 15 ވަނަ ދުވަހުން ފެށިގެން ފުރަބަންދު ކޮށްފައި ވާއިރު، މެއި މަހުގެ 29 ވަނަ ދުވަހުން ފެށިގެން ކޮންމެވެސް ވަރެއްގެ ލުއިތަކެއް ދިނުމަށް ވަނީ ނިންމާފަ އެވެ. ލުއިދޭން ނިންމާފައިވަނީ ފިޔަވަހި ތަކަކަށް ބަހާލައިގެންނެވެ.

ކޮވިޑް-19 އަށް ރާއްޖެއިން 1457 މީހަކު ވަނީ ޕޮޒިޓިވް ވެފައެވެ.