ވަޓްފޯޑުގެ ފަރިތަކުރުންތަކަށް ނުކުންނަށް އެ ކްލަބުގެ ކެޕްޓަން ޓްރޯއި ޑީނީ އެއްބަސްވެއްޖެ އެވެ.

މީގެ ކުރިން މި މަހުގެ މެދުތެރޭގައި ޑީނީ ވަނީ ފަރިތަކުރުންތަކަށް ނުކުންނަށް ދެކޮޅު ހަދާދައެވެ. ޑީނީ އޭރު ބުނީ އޭނާގެ ދަރިފުޅަށް އަދިވީ އެންމެ ފަސް މަސް ކަމަށާއި މީގެ ކުރިންވެސް ދަރުފުޅަށް ނޭވާލާން އުނދަގޫވި ކަމަށެވެ. އެހެންކަމުން ގެއިން ބޭރަށް ގޮސް އެނބުރި ގެއަށް އައުމަކީ ބޮޑު "ރިސްކެއް" ކަމަށާއި، މި ދަނޑިވަޅުގައި ފަރިތަކުރުންތަކަށް ނުކުންނަން ބޭނުންނުވާ ކަމަށެވެ.

ފަރިތަކުރުންތަކަށް ނުކުންނަން ޑީނީ ދެކޮޅު ހެދިއިރު، މީގެ ކުރިން އޭނާ ވަނީ އިނގިރޭސި ޕްރިމިއާ ލީގު މި ދަނޑިވަޅުގައި ނުފެށުމަށްވެސް ގޮވާލާފަ އެވެ.

އެކަމަކު އިނގިރޭސިވިލާތުގެ ޑެޕިއުޓި ޗީފް މެޑިކަލް އޮފިސަރާއެކު މަޝްވަރާ ކުރުމަށްފަހު ޑީނީ ވަނީ ފަރިތަކުރުންތަކަށް ނުކުންނަށް އެއްބަސްވެފައެވެ. ދާދި ފަހުން ޑީނީ ބުނީ އިނގިރޭސިވިލާތުގެ ޑެޕިއުޓި ޗީފް މެޑިކަލް އޮފިސަރުގެ ފަރާތުން ކޮރޯނާވައިރަސް (ކޮވިޑް-19) ގެ ފުރިހަމަ މައުލޫމާތު އިނގިފައިވާ ކަމަށާއި، އެނބުރި ކްލަބުގެ ފަރިތަކުރުންތަކަށް ނުކުންނަށް ތައްޔާރު ކަމަށެވެ.

ދަރިފުޅަށް ކޮވިޑް-19 ޖެހިދާނެ ކަމުގެ ބިރަށް މީގެ ކުރިން ފަރިތަކުރުންތަކަށް ނުނިކުންނަށް ޑީނީ ނިންމުމުން ގިނަ ބައެއްގެ ފާޑުކިޔުން އޭނާ އަށް އަމާޒުވި އެވެ. ޑީނީ ބުނީ ފަރިތަކުރުންތަކަށް ނުނިކުންނަށް ނިންމުމުން، ބައެއް މީހުން އޭނާގެ ދަރިފުޅަށް ކޮވިޑް-19 ޖެހޭނެ ކަމަށް އުންމީދުކުރާ ކަމަށް ބުނެ ކޮމެންޓް ކުރި ކަމަށެވެ.

ވަޓްފޯޑުގެ ފަރިތަކުރުންތަކަށް ނުކުންނަށް ޑީނީ ނިންމިއިރު، މީގެ ކުރިން އެ ކްލަބުގެ ތިން މީހަކު ވަނީ ކޮވިޑް-19ށް ޕޮޒިޓިވް ވެފައެވެ. އެއީ އެ ކްލަބުގެ ޑިފެންޑަރު އޭޑްރިއަން ޕަރިއަޕާ އާއި އެ ކްލަބުގެ ދެ އޮފިޝަލެކެވެ.

ޕްރިމިއާ ލީގުން ޖުމްލަ 12 މީހަކު މިހާތަނަށް ކޮވިޑް-19ށް ޕޮޒިޓިވް ވެފައިވީ ނަމަވެސް، ބުދަ ދުވަހު ޕްރިމިއާ ލީގުގެ ކްލަބުތަކުން ވަނީ ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރަން ފާސްކޮށްފައެވެ.

ޕްރިމިއާ ލީގުގެ މެޗުތައް ސަޕޯޓަރުން ނުވައްދާ ކުޅޭ ގޮތަށް ޖޫން މަހުގެ 19 ވަނަ ދުވަހު ފަށަން މަސައްކަތް ކުރަމުން އަންނައިރު، ލީގު ކުރިއަށްގެންދިޔުމަށް ހުރިހާ ކްލަބުތަކުން މިހާރު ވަނީ އެއްބަސްވެފަ އެވެ.