ދުވާލެއްގެ މައްޗަށް ހާހަކަށް ވުރެ ގިނަ ޓެސްޓު ކުރެވޭ: އަމީން
28 މެއި 2020 | ބުރާސްފަތި 07:53ރަށްރަށުގައި ކޮވިޑަށް ޓެސްޓު ކުރެވޭތޯ ދަނީ ބަލަމުން
އައިޖީއެމްއެޗްގެ ލެބޯޓަރީގައި ކޮވިޑް-19 އަށް ޓެސްޓު ކުރުމުގެ މަސައްކަތުގައި ލެބް ޓެކްނިޝަނަކު ހަރަކާތްތެރިވަނީ
ރާއްޖޭގައި ކޮވިޑް-19 އަށް ދުވާލެއްގެ މައްޗަށް 1100 ޓެސްޓު ކުރުމުގެ ކެޕޭސިޓީ މިހާރު އެބަހުރި ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެ އެވެ.
ބުދަ ދުވަހުގެރޭ އެންއީއޯސީ ގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަށް ޖަވާބު ދެއްވަމުން އަމީން ވިދާޅުވީ، ހާލަތަށް ބެލުމަށް ފަހު ޓެސްޓު ކުރެވޭ އަދަދު އިތުރަށް ރިވައިޒް ކުރަމުންދާ ކަމަށެވެ.
މިނިސްޓަރު ވިދާޅުވި ގޮތުގައި ޓެސްޓު ކުރުމުގެ ކެޕޭސީޓީ އިތުރު ކުރަމުންދަނީ ލޮކްޑައުން އަށް ލުއިދޭ ފުރަތަމަ ފޭސް އަށް ބަލައިގެން ކަމަށެވެ. ދާދި ފަހުން ފުލުހުން ލެބޯރަޓަރީގެ އިތުރުން އޭޑީކޭ ހޮސްޕިޓަލުގައިވެސް ކޮވިޑަށް ޓެސްޓުކުރަން ވަނީ ފަށާފައި އެވެ.
އެވަރޭޖްކޮށް އައިޖީއެމްއެޗުން ދުވާލެއްގެ މައްޗަށް 600 އާއި 700 އާ ދެމެދުގެ ޓެސްޓު ހެދޭކަން ފާހަގަކުރައްވަމުން މިނިސްޓަރު ވިދާޅުވީ، އެ ހޮސްޕިޓަލުގެ ކެޕޭސިޓީވެސް އިތުރު ކުރުމުގެ މަސައްކަތް ކުރަމުންދާ ކަމަށެވެ.
ކުރިޔަށް އޮތް ތަނުގައި ރަށްރަށުގައި ކޮވިޑް-19 އަށް ޓެސްޓު ކުރުމުގެ އިންތިޒާމް ހަމަޖެއްސުމުގެ މަސައްކަތް ސަރުކާރުން ދަނީ ކުރަމުންނެވެ.
