ފުރަތަމަ ދެ ހަފްތާގައި އިތުރު ޓެކްސީތަކަށް ހުއްދަދެނީ، މަގުމަތިން މީހުން އެރުވުމަކީ މަނާކަމެއް
ފަސިންޖަރުންނާއި ޑްރައިވަރުންވެސް މާސްކު އަޅަންޖެހޭނެ
ސިނަމާލެ ބްރިޖް ސަރަހައްދުގައި ޓެކްސީތަކެއް ދުއްވާފައި ދަނީ
ކުރިޔަށް އޮތް ދެ ހަފްތާގައި ލޮކްޑައުންގައި އަޅާފައިވާ ފިޔަވަޅުތަކަށް ފުރަތަމަ ފޭސްގެ ދަށުން ލުއިތަކެއް ދޭއިރު އިތުރު ޓެކްސީތަކަށް ހުއްދަދޭނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
މިކަމާއި ގުޅޭގޮތުން އިތުރު ތަފްސީލު ދެއްވަމުން ކޮވިޑް-19 ޓާސްކް ފޯހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ ނަޒްލާ ރަފީގު ވިދާޅުވީ އިތުރު ޓެކްސީތަކަށް ހުއްދަ ދިން ނަމަވެސް ވަކި ޚާއްސަ އުސޫލުތަކެއް އެކުލަވާލާފައިވާ ކަމަށާއި އެއުސޫލުތަކަށް އަމަލުކުރަން ޖެހޭނެ ކަމަށެވެ. އެގޮތުން ޓެކްސީއަކީ ވަރަށް ބަންދުވެފައި ވަރަށް ކައިރި ކައިރީގައި މީހުން ތިބެވޭނެ ގޮތަށް އޮންނަ އެއްޗެއްކަމުން ބަލި ޖެހިފައިތިބި މީހުން ރައްކާތެރިކަމުގެ ފިޔަވަޅު ނާޅާ ޓެކްސީއަށް އަރާނަމަ އެކަމުގެ ސަބަބުން ބަލި ފެތުރޭނެ ކަމަށް ޑރ ނަޒްލާ ވިދާޅުވި އެވެ.
އެހެންކަމުން ޓެކްސީއަށް އަރާ ފަރާތްތަކުން މިކަމަށް ޚާއްސަ ސަމާލުކަމެއް ދޭންޖެހޭ ކަމަށް ޑރ ނަޒްލާ ވިދާޅުވި އެވެ. އަދި ފަސިންޖަރުންނާއި ޑްރައިވަރުންވެސް މާސްކު އަޅަންޖެހޭނެ ކަމަށް ޑރ ނަޒްލާ ވިދާޅުވި އެވެ.
މީގެއިތުރުން ދެ ހަފްތާ ފަހުން ހުރިހާ ޓެކްސީތަކަށް ޚިދުމަތް ދިނުމުގެ ފުރުސަތު ލިބިގެންދާނެ ކަމަށާއި އެހެންކަމުން ކޮންޓެކްޓް ޓްރޭސިން އެޕް ބޭނުންކުރަން ޖެހޭނެ ކަމަށް ޑރ ނަޒްލާ ވިދާޅުވި އެވެ.
މީގެއިތުރުން ޕިކަޕް އަދި ވޭން ގައި ދަތުރުކުރާއިރުވެސް ވަކި ޚާއްސަ އުސޫލުތަކެއް އެކުލަވާލާފައިވާ ކަމަށް ޑރ ނަޒްލާ ވިދާޅުވި އެވެ. އެގޮތުން ކުޑަ ޕިކަޕަކަށް 2 ފަސިންޖަރުން އަދި ބޮޑެތި ޕިކަޕަށް އެރުވޭނީ 3 ފަސިންޖަރުން ކަމަށް ޑރ ނަޒްލާ ވިދާޅުވި އެވެ. އަދި މިގޮތަށް އަރާއިރުވެސް ކުރީ ސީޓަށް ނޭރޭނެކަމަށާއި ފަސިންޖަރުން އަރަންޖެހޭނީ ފަހަތަށް ކަމަށް ޑރ ނަޒްލާ ވިދާޅުވި އެވެ.
ޕިކަޕް އަދި ވޭނަށް މިހާރު ދީފައިހުރި ހުއްދަތަކުގައި ޚިދުމަތްދެވޭނެ ކަމަށާއި ދެހަފްތާފަހުން ހުރިހާ ޕިކަޕަކަށް އިތުރަށް ހުއްދަދެވޭނެ ކަމަށް ޑރ ނަޒްލާ ވިދާޅުވި އެވެ. އެހެންނަަމަވެސް ޚިދުމަތްދޭންޖެހޭނީ މިފިޔަވަޅު ތަކާއެކު ކަމަށް ޑރ ނަޒްލާ ވިދާޅުވި އެވެ.
މީގެއިތުރުން ހުޅުމާލެ އަދި ވިލިމާލޭގެ ފެރީގެ ޚިދުމަތް ދޭއިރުވެސް ސީޓްތައް ހުންނަންވާނީ ދުރުމިން ބެހެއްޓޭގޮތަށް ކަމަށާއި ވެއިޓިން އޭރިއާގައިވެސް ދުރުދުރުގައި ތިބެވޭ ގޮތަށް އިންތިޒާމުތައް ހަމަޖެހިފައި ހުންނަންވާނެ ކަމަށް ޑރ ނަޒްލާ ވިދާޅުވި އެވެ. އަދި ޚިދުމަތް ދޭ ފަރާތްތަކުން މާސްކު އަޅައިގެން ތިބެންޖެހޭއިރު ޕަބްލިކް ބަހުގެ ޚިދުމަތުގައިވެސް އަމަލުކުރަން ޖެހޭނީ މިއުސޫލުން ކަަމަށް ޑރ ނަޒްލާ ވިދާޅުވި އެވެ. ޑިސްއިންފެކްޓް ކުރުމުގެ އިތުރުން ދޮރުތައް ހުންނަންވާނީ ހުޅުވާފައި ކަމަށް ޑރ ނަޒްލާ ވިދާޅުވި އެވެ.
މީގެއިތުރުން ރަށްރަށުގައިވެސް ހުއްދަ އޮންނާނީ މިހާރުވެސް ހުއްދަ އޮތްގޮތަށް ސަޕްލައި ދޯނި ތަކަށް ކަމަށް ޑރ ނަޒްލާ ވިދާޅުވި އެވެ.
