ގިނަ ވިޔަފާރިތަކެއް ހުޅުވާލުމުގެ ފުރުސަތު، ފައިސާގެ މުއާމަލާތްތައް އޮންލައިންކޮށް ކުރުމަށް އެދެފި
28 މެއި 2020 | ބުރާސްފަތި 00:42މިތަންތަން ހުޅުވާލެވިގެންދާނީ އިކޮނޮމިކް މިނިސްޓްރީގެ ޚާއްސަ ހުއްދައެއްގެ ދަށުން އެކުލަވާލާފައިވާ ގަވާއިދުތަކުގެ ދަށުން
މާލޭގެ ފިހާރައެއްގައި ރައްކާތެރިކަމުގެ ފިޔަވަޅުތަކުގެ ނޯޓިސްތަކެއް ހަރުކުރެވިފައި
މެއި މަހުގެ 29 ވަނަ ދުވަހުން ފެށިގެން ލޮކްޑައުންގައި އަޅާފައިވާ ފިޔަވަޅުތަކަށް ލުއިތަކެއް ދިނުމަށް ފަށާއިރު ގިނަ ފިހާރަތަކެއް ހުޅުވާލުމުގެ ފުރުސަތު ދީފި އެވެ.
ކޮވިޑް-19 ޓާސްކު ފޯހުން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މިކަމާއި ގުޅޭގޮތުން އިތުރު ތަފްސީލު ދެއްވަމުން ޑރ ނަޒްލާ ރަފީގު ވިދާޅުވީ ސުޕަރމާކެޓްތަކާއި ބޭކަރީތަކާއި އާންމު ދިރިއުޅުމަށް ބޭނުންވާ އަސާސީ ތަކެތި ވިއްކާ ކަންމަތީ ފިހާރަތަކާއި ތަރުކާރީ އާއި މޭވާ ވިއްކާ ފިހާރަތަކައި، ފަރމަސީތައް، ދިވެހި ބޭސް ވިއްކާ ފިހާރަތައް، ބުކްޝޮޕްސް، ސްޓޭޝަނަރީ ވިއްކާ ފިހާރަތަކާއި، ކުޑަކުދިންގެ ސާމާނު ވިއްކާ ފިހާރަތައް އަދި ހާޑުވެއަރ ފިހާރަތައް ހުޅުވާލުމަށް ފުރުސަތު ދެވިގެންދާނެ ކަމަށެވެ.
އެހެންނަމަވެސް މިތަންތަން ހުޅުވާލެވިގެންދާނީ އިކޮނޮމިކް މިނިސްޓްރީގެ ޚާއްސަ ހުއްދައެއްގެ ދަށުން އެކުލަވާލާފައިވާ ގަވާއިދުތަކުގެ ދަށުން ކަމަށާއި އެއުސޫލު ފަހުން ހާމަކުރާނެ ކަމަށް ޑރ ނަޒްލާ ވިދާޅުވި އެވެ.
މީގެއިތުރުން ޑރ ނަޒްލާ ވިދާޅުވީ އޮންލައިން ޑެލިވަރީ އަށް ބައެއް ތަންތަން ހުޅުވާލެވޭނެ ކަމަށެވެ. އޭގެރޭގައި ހިމެނެނީ މޯބައިލް ފޯން ފިހާރަތަކާއި ކޮމްޕިޔުޓަރ ސާމާނު ވިއްކާ ފިހާރަތާއި ގޭގައި ބޭނުންކުރާ އިލެކްޓްރޯނިކްސް ސާމާނު ވިއްކާ ފިހާރަތަކާއި އަންނައުނު، ފޮތި، ފައިވާން އަދި ކުޅިވަރު ސާމާނު ވިއްކާ ފިހާރަތައް ކަމަށް ޑރ ނަޒްލާ ވިދާޅުވި އެވެ. މިތަންތަނުން ތަކެތި އޮންލައިންކޮށް ޑެލިވަރ ކޮށްދޭނެ ކަމަށް ޑރ ނަޒްލާ ވިދާޅުވި އެވެ.
މީގެއިތުރުން ޚިދުމަތްދޭ ތަންތަނުގެ ތެރެއިން ފޭސް 1 ގައި ހުޅުވާލެވޭނީ މުދާ ކުލިއަރކޮށް ޑެލިވަރ ކޮށްދޭ ފަރާތަކަށް ކަމަށާއި އަދި ވަކި މިންގަނޑުތަކެއްގެ ތެރޭގައި ކޮންސްޓްރަކްޝަން މަސައްކަތް ކުރެވޭނެ ކަމަށް ޑރ ނަޒްލާ ވިދާޅުވި އެވެ.
މީގެއިތުރުން ކާރު، ސައިކަލް ރިޕެއަރ ކުރާ ވާރކްޝޮޕްތަކާއި މޯބައިލް ފޯން އަދި އިލެކްޓްރޯނިކް ރިޕެއަރ ކުރާ ތަންތަންވެސް އޮންނަ ވަކި މިންގަނޑުގެ ތެރެއިން ހުޅުވާލެވޭނެ ކަމަށް ޑރ ނަޒްލާ ވިދާޅުވި އެވެ. އަދި ގޭގެއަށް ބޭނުންވާ މަރާމާތު ކުރުމުގެ ކަންކަންވެސް ކުރިޔަށް ގެންދެވޭނެ ކަމަށް ޑރ ނަޒްލާ ވިދާޅުވި އެވެ.
މިހުރިހާ ކަމެއްވެސް ކުރިޔަށްދާނީ އިކޮނޮމިކް މިނިސްޓްރީގެ ގައިޑްލައިނާ އެއްގޮތަށް ކަމަށާއި އަދި ޚިދުމަތްތައް ދިނުމުގައި މާސްކު އެޅުމާއި ގައިދުރުކަން ބެހެއްޓުމާއި ސާފުތާހިރު ކަމަށް އިސްކަން ދޭންޖެހޭނެ ކަމަށް ޑރ ނަޒްލާ ވިދާޅުވި އެވެ.
މީގެއިތުރުން ފެނާއި ކަރަންޓު ފަދަ ޔޫޓިލިޓީޒް އަލަށް ގުޅާ ދިނުމާއި ސަރވޭ ކުރުމާއި އިންސްޕެކްޓް ކުރަން ވަކި މިންގަނޑުތަކެއްގައި ކުރިޔަށް ގެންދެވޭނެ ކަމަށާއި އެކަންކަން ކުރުމަށް ވަކި މިންވަރަކަށް ޓީމުތައް ހަދައިގެން އެ މަސައްކަތް ކުރެވޭނެ ކަމަށް ޑރ ނަޒްލާ ވިދާޅުވި އެވެ.
މީގެއިތުރުން ރެސްޓޯރެންޓް ކެފޭތަކުން ޑެލިވަރީގެ ޚިދުމަތް ދެވޭނެ ކަމަށާއި ނަމަވެސް ފައިސާގެ މުއާމަލާތްތަކުގައި ވީ ވަރަކުން ކޭޝް ބޭނުންނުކޮށް އޮންލައިންކޮށް ކުރިޔަށް ގެންދިޔުމަށް ޑރ ނަޒްލާ އެދިވަޑައިގެންނެވި އެވެ.
