ދަރަނބޫދޫ ގެ ދިގު އިންތިޒާރަށް ނިމުމަކަށް، ރަށުގެ ބަނދަރު ހެދުމުގެ މަސައްކަތް ފަށަނީ
27 މެއި 2020 | ބުދަ 17:46މި މަޝްރޫޢުގެ ކޮންޓްރެކްޓް އަގަކީ 38،296،692.30 ރުފިޔާ
ދަރަނބޫދޫ ބަނދަރު ހެދުމަށް ބޭނުންވާ ތަކެތި ގެންދަނީ
ފ. ދަރަނބޫދޫގެ ބަދަރު ހެދުމުގެ މަސައްކަތް ފެށުމުގެ ތައްޔާރީތައް ވަމުންދާ ކަމަށް އެރަށު ކައުންސިލުން ބުނެފި އެވެ.
ރާއްޖެ އެމްވީއަށް މައުލޫމާތު ދެއްވަމުން ދަރަނބޫދޫ ކައުންސިލްގެ ރައީސް އަލީ މުހައްމަދު ވިދާޅުވީ އެރަށުގެ ބަނދަރު ހެދުމަށްޓަކައި ބޭނުންތަކެތި ބުދަ ދުވަހު ރަށަށް ގެންގޮސްފައިވާ ކަމަށެވެ. އަދި ޓެންޓް ޖެހުމުގެ މަސައްކަތް ބުރާސްފަތި ދުވަހު ފަށާނެ ކަމަށާއި ބަނދަރު ހެދުމުގެ މަސައްކަތް ދެ ދުވަހެއްގެ ތެރޭގައި ފެށޭނެ ކަމަށެވެ. އަލީ މުހައްމަދު ވިދާޅުވީ ދަރަނބޫދޫގެ ބަނދަރު ހަލާކުވެފައި އޮންނަތާ 12 ވަރަކަށް އަހަރު ވެފައިވާ ކަމަށާއި ބަނދަރު ހަލާކުވުމުގެ ސަބަބުން ލަފާފުރުމަށް ދަތި އުނދަގޫތައް ދިމާވަމުންދާ ކަަމަށެވެ.
އާބާދީގައި 592 މީހުން ދިއުޅޭ ދަރަނބޫދޫގެ ބަނދަރު ހެދުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ވައުދުފެޅެއް ކަމަށާއި ރައްޔިތުންނަށް ޓަކައި މިފަދަ ބޮޑު ކަމެއް ކޮށްދެއްވަމުން ގެންދަވާތީ އެކަމަށްޓަކައި ރައީސް އަށް ޝުރުކު އަދާކުރައްވާ ކަމަށް އޭނާ ވިދާޅުވުއެވެ.
ދަރަނބޫދޫގެ ބަނަދަރު ހެދުމުގެ މަސައްކަތް ކުރުމަށް ކޮންޓްރެކްޓަރ އުސޫލުން މިދިޔަ ޑިސެމްބަރު މަހުގެ 10 ވަނަ ދުވަހު ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި އެވެ. 397 ދުވަހުގެ ތެރޭގައި މަސައްކަތް ނިންމުމަށް ހަވާލުކޮށްފައިވާ މި މަޝްރޫޢުގެ ކޮންޓްރެކްޓް އަގަކީ 38،296،692.30 ރުފިޔާ އެވެ.
