ލަންކާގެ ކެބިނެޓް މިނިސްޓަރ ތޮންޑަމަންގެ އައިލާއަށް ރައީސް ނަޝީދު ތައުޒިޔާ ވިދާޅުވެއްޖެ
27 މެއި 2020 | ބުދަ 09:01ތޮންޑަމަން އަކީ ދިވެހިންނަށް ވަރަށްބޮޑު ރަހުމަތްތެރިކަމެއް އަބަދުވެސް ބަހައްޓަވާ ބޭފުޅެއް: ރައީސް ނަޝީދު
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު؛ ރައީސް ނަޝީދު ވަނީ ތޮންޑަމަންގެ އާއިލާއަށް ތައުޒިޔާ ވިދާޅުވެ އެވާހަކަފުޅު މަޖިލީހުގައި ދައްކަވާފައި
ސިލޯން ވާރކާސް ކޮންގްރެސްގެ ލީޑަރު އަދި ސްރީލަންކާގެ ކެބިނެޓް މިނިސްޓަރު ސުވަމިއަމޫރްތީ އަރުމުގަމް ރަމަނަތަން ތޮންޑަމަން އަވަހާރަވުމާއި ގުޅިގެން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ތަޢުޒިޔާ ވިދާޅުވެއްޖެ އެވެ.
ތޮންޑަމަން އަވަހާރަވީ އަންގާރަ ދުވަހުގެ ވަގުތެއްގައި ހިތުގެ އާލާސްކަންފުޅަށް ފަރުވާ ހޯއްދަވަމުން ގެންދަވަނިކޮށް، ހާޓް އެޓޭކެއް ޖެހިގެންނެވެ.
ރައީސް ނަޝީދު ކުރެއްވި ޓްވީޓުގައި ވިދާޅުވީ ގާތް އެކުވެރި މިނިސްޓަރ އަދި ޓްރޭޑް ޔޫނިއަން ލީޑަރު ތޮންޑަމަން އަވަހާރަވި ވާހަކަ އެއްސެއްވީ ކުއްލި ހައިރާން ކަމާއި ހިތާމައާއެކުގައި ކަމަށެވެ. ރައީސް ނަޝީދު ވިދާޅުވީ ތޮންޑަމަންއަކީ ސުވަމިއަމޫތީ ތޮންޑަމަންގެ ކާފަ ދަރިފުޅު ކަމަށާއި، އެމަނިކުފާނަކީ ސިލޯން ވާރކާސް ކޮންގްރެސްގެ ބާނީ ކަމަށެވެ. އަދި މި ހިތާމަވެރި ދަނޑިވަޅުގައި ޢާއިލާއަށް ތަޢުޒިޔާ ދަންނަވާ ކަމަށެވެ.
ސްރީލަންކާގެ ޓްރޭޑް ޔޫނިއަންގެ ލީޑަރުކަން ވެސް ކުރެއްވި ތޮންޑަމަން އަވަހާރަވީ އަންގާރަ ދުވަހު ތަލަންގަމާ ބޭސް ހޮސްޕިޓަލުގައެވެ. އުމުރުން 55 އަހަރު ފުޅުގައި އަވަހާރަވީ އިރު، އެމަނިކުފާނުގެ ތިން ބޭފުޅުން ދުނިޔޭގެ އެބަތިއްބެވި އެވެ.
ތޮންޑަމަންއަކީ ސިލޯން ވޯކާރސް ކޮންގްރެސްގެ ލީޑަރުގެ އިތުރުން، ލަންކާގެ ޓްރޭޑް ޔޫނިއަންގެ ފަރާތުން ލަންކާގެ ޤާނޫނު ހަދާ މަޖިލީހުގައި ނޫރަލިޔާ ޑިސްޓްރިކްޓްގެ ތަމްސީލު ކުރައްވާ ފަރާތެވެ.
ތޮންޑަމަން ފަސްދާނުލެއްވުމަށް ހަމަޖެހިފައި ވަނީ އާދީއްތަ ދުވަހު ނޫރވުޑް ސްޓޭޑިއަމްގަ އެވެ.
