ސްޕެއިންގައި ކޮވިޑް-19 ޖެހިގެން މަރުވީ މީހުންގެ ހަނދާނުގައި ހިތާމަފާޅުކުރުމުގެ 10 ދުވަސް ސްޕެއިން ސަރުކާރުން ކަނޑައަޅައިފި އެވެ.

މިކަން ހާމަކުރައްވާ މެޑްރިޑްގައި ބޭއްވި ނޫސްވެރިންގެ ބައްދަލުވުމެއްގައި، އެޤައުމުގެ ސަރުކާރުގެ ތަރުޖަމާނު މާރިއާ ޖީސަސް މޮންޓޭރީ ވިދާޅުވީ، 10 ދުވަސް ހިތާމަ ފާޅުކުރަން ނިންމީ އަންގާރަ ދުވަހު ބޭއްވި ކެބިނެޓުގެ ބައްދަލުވުމެއް ކަމަށާއި، 10 ދުވަސް ގުނަން ފަށާނީ ބުދަ ދުވަހުން ފެށިގެން ކަމަށެވެ.

ސްޕެއިން ސަރުކާރުން ކޮވިޑް-19 ގައި ދުނިޔެއާއި އަލްވަދާޢުކީ މީހުންގެ ހަނދާނުގައި ދިހަ ދުވަސް ކަނޑައަޅާފައި ވާއިރު، ސަރުކާރުގެ މި ނިންމުމުގެ މަތިން ސަރުކާރުގެ ހުރިހައި އިމާރާތެއްގަޔާއި އަސްކަރިއްޔާގެ މަނަވަރުތަކުގައި ޤައުމީ ދިދަ ބައި ދަނޑިއަށް ތިިރިކުރާނެ އެވެ.

ހިތާމަ ފާޅުކުރަން ކަނޑައެޅުމާއި ގުޅިގެން އެޤައުމުގެ ބޮޑުވަޒީރު ޕެދްރޯ ސާންޗޭސް ކުރެއްވި ޓްވީޓެއްގައި ވިދާޅުވީ، މިއީ ސްޕެއިންގެ ޑިމޮކްރެޓިކް ހަޔާތުގައި ހިތާމަ ފާޅުކުރުމަށް މިހާ ދިގު މުއްދަތެއް ކަނޑައެޅި ފުރަތަމަ ފަަހަރު ކަމަށެވެ. މިއީ ކޮވިޑް-19 ގައި ދުނިޔެއާއި ވަކިވީ މީހުންގެ ގެ ހަނދާން އާކުރުމަށާއި، އަދި އެ ވޭނާއި ތަދު އިހުސާސްކުރެވޭ ކަން ހަނދުމަ ކުރުމުގެ ގޮތުން ކަނޑައެޅި ދުވަސްތަކެއް ކަމަށެވެ. އަދި އެމީހުންގެ ހަނދާންތައް އަބަދުވެސް އެކުގައި ވާނެކަމަށް ވިދާޅުވެފައި ވެއެވެ.

ސްޕެއިންގައި މިހާތަނަށް 27،000 މީހުން ވަނީ މަރުވެފަ އެވެ.