ފިތުރު ޒަކާތުގެ ގޮތުގައި 6.6 މިލިއަން ރުފިޔާ ލިބިފައިވޭ: އިސްލާމިކް މިނިސްޓްރީ
26 މެއި 2020 | އަންގާރަ 08:33މާލޭ ސިޓީގެ 156740 މީހުން ޒަކާތް ދައްކާފައިވޭ
މީގެ ކުރީގެ އަހަރެއްގައި ފިތުރު ޒަކާތް އިސްލާމިކް މިނިސްޓްރީގައި ބަލައިގަންނަނީ: ކޮވިޑް-19 އާ ގުޅިގެން މިއަހަރު ފިތުރު ޒަކާތް ބަލައިގަންނަނީ އޮންލައިން ޕޯޓަލް މެދުވެރިކޮށް
މާލޭ ސިޓީން 156740 މީހުންޒަކާތް ދައްކާފައިވާއިރު ފިތުރު ޒަކާތުގެ ގޮތުގައި 6.6 މިލިއަން ރުފިޔާ ލިބިފައިވާ ކަމަށް އިސްލާމިކް މިނިސްޓްރީން ބުނެފި އެވެ.
ކޮވިޑް-19ގެ މި ހާލަތާއި ގުޅިގެން މުޅި ރާއްޖޭގައި ފިޠުރު ޒަކާތުގެ ފައިސާ ނެގުމާއި ބެހުމުގެ އިންތިޒާމުތައް އޮންލައިންކޮށް އިސްލާމިކް މިނިސްޓްރީން ވަނީ ހަމަޖައްސާފަ އެވެ. އެގޮތުން ބީއެމްއެލް، މޯލްޑިވްސް އިސްލާމިކް ބޭންކް، އޫރިދޫ އަދި ދިރާގު މެދުވެރިކޮށް ޒަކާތް ދެއްކޭނެ މަގު ފަހިކޮށްދިނެވެ.
މި އިންތިޒާމްގެ ދަށުން މާލޭ ސިޓީގައި ފިތުރު ޒަކާތް އޮންލައިންކޮށް ބަލައިގަންނަން ފަށާފައިވަނީ 1 ރަމަޟާން 1441ވަނަ ދުވަހުން ފެށިގެން 28 ރަމަޟާން 1441ވަނަ ދުވަހުގެ 18:00އާއި ހަމައަށެވެ. މި މިއހަމައަށް މާލޭ ސިޓީގެ 156740 މީހުންޒަކާތް ދައްކާފައި ވާއިރު ފިތުރު ޒަކާތުގެ ގޮތުގައި ޖުމުލަ 6,649,697.00 (ހަމިލިއަން ހަލައްކަ ސާޅީސް ނުވަހާސް ހަސަތޭކަ ނުވަދިހަ ހަތް ރުފިޔާ)ލިބިފައިވާ ކަމަށް އިސްލާމިކް މިނިސްޓްރީން ބުނެވެ.
ފިޠުރު ޒަކާތުގެ ފައިސާ އަކީ އެ ރަށަކަށް ލިބޭ ފައިސާ އެ ރަށެއްގައި ދިރިއުޅޭ ފަގީރުންނާއި މިސްކީނުންނަށް އީދު ނަމާދުގެ ކުރިން ބަހައި ހުސްކުރަން ޖެހޭ އެއްޗެކެވެ.
އެގޮތުން އެ ރަށަކުން ލިބުނު ފައިސާ އެ ރަށެއްގައި ރަޖިސްޓްރީވެފައިވާ ފަގީރުންނާއި މިސްކީނުންނަށް ބަހާއިރު މާލެ އާއި އަތޮޅުތެރޭގެ އެކި ރަށްތަކުގައި ބޮލަކަށް ޖެހޭ ޢަދަދު ތަފާތުވާނެ ކަމަށް މިނިސްޓްރީން ބުނެއެވެ.
އިސްލާމިކް މިނިސްޓްރީން ބުނީ މާލެ ސިޓީ އަދި ރަށްރަށުގައި ނަގާފައިވާ ފިތުރު ފައިސާ އީދު ނަމާދުގެ ކުރިން އެ ރަށެއްގައި ދިރިއުޅޭ ފަގީރުންނާއި މިސްކީނުންނަށް ބަހާފައިވާ ކަމަށެވެ. އަދި މާލެ ސިޓީން ފަގީރުންނާއި މިސްކީނުންގެ ދަފުރަތުގައި ހިމެނޭ1715 މީހުންގެތެރެއިން މި އަހަރު ފިތުރު ފައިސާ ހަވާލު ކުރެވުނީ 1697 މީހުންނަށް ކަމަށް މިނިސްޓްރީން ބުނެއެވެ.
އިސްލާމިކް މިނިސްޓްރީން ބުނީ ފަގީރުންގެ ދަފުތަރަށް ޖުމުލަ 6,448,600.00 (ހަމިލިއަން ހަތަރުލައްކަ ސާޅީސް އަށްހާސް ހަސަތޭކަ ރުފިޔާ)ބަހާފައިވާ ކަމަށެވެ. އެ މިނިސްޓްރީގެ ބެލުމުގެ ދަށުން ހުރިހާ ރަށެއްގައި ފިތުރު ފައިސާ ނަގާ ބަހާފައިވާއިރު ރަށްރަށުގައި ފިތުރު ޒަކާތް ބެހިގޮތުގެ ތަފްސީލު ލިބޭނީ މިނިސްޓްރީއަށް ހުރިހާ ކައުންސިލަކުން އެ ތަފްޞީލްތައް ހިއްސާ ކުރުމުން ކަމަށެވެ.
މީގެ އިތުރުން އިސްލާމިކް މިނިސްޓްރީން ބުނީ ފިޔަވަތި، ކުޑަކުދިންގެ ހިޔާ އަދި ކ.ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒަށް 201,097.00 (ދެލައްކަ އެއްހާސް ނުވަދިހަ ހަތް ރުފިޔާ)ވަނީ ހަވާލުކުރެވިފައިވާ ކަމަށެވެ. 28 ރަމަޟާން 1441ވަނަ ދުވަހާއި ހަމައަށް އެކައުންޓްގެ ތަފްސީލް ލިބިފައިވާ ޖުމްލަ 1621 މީހުންނަށްފިތުރު ފައިސާ އެމީހުންގެއެކައުންޓްތަކަށްޖަމާކޮށްފައިވާ ކަމަށް މިނިސްޓްރީން ބުނެއެވެ.
ނަމަވެސް 30 ރަމަޟާން 1441ވަނަ ދުވަހާއި ހަމައަށް އެކައުންޓްގެ ތަފްސީލް ލިބިފައިނުވާ މީހުންނަށް ފައިސާ ދެވޭނެ އިންތިޒާމްތަށް ހަމަޖައްސައި އިތުރު 76 މީހުންނަށް ފައިސާ ދޫކޮށްފައިވާ ކަމަށް މިނިސްޓްރީން ބުނެއެވެ.
