ކުޓީނިއޯ ނުގަންނަން ބަޔާން މިއުނިކުން ނިންމައިފި

ބްރެޒިލްގެ ތަރި ފިލިއްޕޭ ކުޓީނިއޯ 110 މިލިއަން ޕައުންޑަށް ގަތުމަށް ލިބުނު ފުރުސަތުގެ ބޭނުން ހިފާފައިނުވާ ކަމަށް ބަޔާންގެ ޗެއާމަން ކާލް-ހެއިންޒް ރުމެނިގާ ވިދާޅުވެއްޖެ އެވެ.

އުމުރުން 27 އަހަރުގެ ކުޓީނިއޯ ބަޔާނަށް ކުޅެމުން އަންނަނީ ބާސެލޯނާގެ ލޯނު އެއްބަސްވުމެއްގެ ދަށުންނެވެ. މި ސީޒަން ނިމުމުން ބަޔާންގެ ލޯނު އެއްބަސްވުން ހަމަވާއިރު، ބަޔާނުން ބޭނުންވެއްޖެނަމަ ކުޓީނިއޯ ދާއިމީކޮށް ގަނެވޭ ގޮތަށް އެއްބަސްވުމުގައި ވަނީ ހިމަނާފަ އެވެ.

އެކަމަކު ރުމެނިގާ ވިދާޅުވީ އެ ފުރުސަތު ލިބޭ މުއްދަތު މިހާރު ފަހަނައަޅައި ގޮސްފި ކަމަށެވެ. އަދި ދެން އޮތީ އަންނަ ސީޒަނަށް ސްކޮޑް ޕްލޭން ކުރުން ކަމަށާއި، ކުޓީނިއޯ އަދާކުރާނެ ދައުރެއް އޮތްތޯ ނެތްތޯ ބަލާނެ ކަމަށެވެ. އެހެންކަމުން ދެން ބަޔާނުން ކުޓީނިއޯ ބަހައްޓަން ބޭނުންވެއްޖެ ނަމަ ޖެހޭނީ ލޯނުގެ މުއްދަތު އިތުރު ކުރާށެވެ.

ރިޕޯޓުތައް ބުނާ ގޮތުން ލޯނު އެއްބަސްވުން ހަމަވުމުން، އަންނަ ސީޒަނުގައި ކުޓީނިއޯ ބާސާއަށް އަލުން ބަދަލުވާނެއެވެ. އެކަމަކު ބާސާ އިން އޭނާ ވިއްކާލާނެ ކަމަށް ބެލެވޭއިރު، އާސެނަލާއި މެންޗެސްޓާ ޔުނައިޓެޑް އަދި ޗެލްސީން އަންނަނީ ކުޓީނިއޯ ގަތުމަށް މަސައްކަތް ކުރަމުންނެވެ.

އެކަމަކު މީގެ ކުރިން ބާސާގެ ކޯޗު ކިކޭ ސެޓިއެން ވަނީ ކުޓީނިއޯ އަންނަ ސީޒަނުގައި ބާސާގައި މަޑުކުރާނެ ކަމުގެ އުންމީދު އެބައޮތް ކަމަށް ބުނެފައެވެ.

2018 ވަނަ އަހަރުގެ ޖެނުއަރީ މަހު ލިވަޕޫލުން 142 މިލިއަން ޕައުންޑަށް ބާސާއަށް ބަދަލުވި ކުޓީނިއޯއަށް އެ ކްލަބުގައި އެންމެ އެދެވޭ ކުޅުން ދެއްކިފައެއް ނުވެ އެވެ. އެގޮތުން ކުޓީނިއޯ ބާސެލޯނާގައި ކުޅުނު 76 މެޗުގައި ޖެހިފައިވަނީ 21 ލަނޑެވެ.

އޭގެ ފަހުން މިދިޔަ ސީޒަނުގައި ލޯނު އެއްބަސްވުމެއްގެ ބަޔާނަށް ބަދަލުވި ކުޓީނިއޯއަށް މިހާތަނަށް އެޓީމަށް ކުޅެދިން 32 މެޗުގައި ކާމިޔާބުކރެވިފައިވަނީ އެންމެ 9 ލަނޑެވެ.