ލޮކްޑައުންގައި ނަފުސާނީ ދުޅަހެޔޮކަން ބެލެހެއްޓުމާ ގުޅޭގޮތުން މަޝްހޫރު ނަފްސާނީ އިލްމުވެރިޔާ ޑރ އައިޝަތު އަލީ ނާޒްގެ ޚާއްސަ 'ފޭސްބުކް ލައިވް' އެއް ތާވަލުކޮށްފި އެވެ.
މޯލްޑިވްސް އިންސްޓިޓިއުޓް ފޮރ ސައިކޮލޮޖިކަލް ސަރވިސަސް (މިޕްސްޓަރ)އިން އިންތިޒާމު ކޮށްގެން ކުރިއަށްގެންދާ މި ލައިވް އިވެންޓުގައި 'ލޮކްޑައުން' ގައި ނަފުސާނީ ދުޅަހެޔޮކަން ބެލެހެއްޓުމާއި، އެކަމުގެ މުހިންމު ކަމުގެ މައްޗަށް އަލިއަޅުވާލެވޭނެ ކަމަށް "ރާއްޖެއެމްވީ"އަށް މައުލޫމާތު ދެމުން މިޕްސްޓަރއިން ބުނެފައި ވެއެވެ.
އެގޮތުން ހޯމަ ދުވަހުގެރޭ 20:30 ގައި ލައިވް ފެށުމަށް ހަމަޖެހިފައި ވާއިރު، މިރޭ ކުރިއަށްގެން ދަނީ މި މައުޟޫގެ ދަށުން ކުރިއަށްގެންދާ 8 ވަނަ ބައިކަމަށް މިޕްސްޓަރއިން ބުނެއެވެ. އަދި މިރޭގެ މައުޟޫގައި އަމިއްލަ ސިއްޙަތާ މެދު ކަންބޮޑުވެ ހާސްވުމާއި، އެކަމާ ގުޅުންހުރި ނަފުސާނީ މައްސަލަތަކުން އަރައިގަންނާނެގޮތް ޑރ ނާޒް ތަފުސީލުކޮށް ދެއްވާނެ އެވެ.
އެކަމާ ގުޅޭގޮތުން ޑރ ނާޒް ވިދާޅުވީ، 'ލޮކްޑައުން' ގައި ގޭގައި ތިބޭއިރުވެސް ނަފުސާނީ ދުޅަހެޔޮކަމަށް ސަމާލުކަން ދިނުމަކީ މުހިންމު ކަމެއް ކަމަށެވެ. އެގޮތުން ނަފުސާނީ ދުޅަހެޔޮކަމާ ގުޅޭ މުހިންމު މައުލޫމާތުތައް ޑރ ނާޒްގެ ޔޫޓިއުބް ޗެނަލުން ވެސް ލިބޭނެކަމަށް ވިދާޅުވި އެވެ.
ޑރ ނާޒް ވަނީ މީގެ ކުރިންވެސް މިފަދަ މައުލޫމާތު ސެޝަންތަކެއް ކުރިއަށް ގެންގޮސްފަ އެވެ. އެގޮތުން އެންމެ ފަހުގެ ސެޝަންގައި ވަނީ 'ލޮކްޑައުން' ގައި އެކަނި ހުންނަ ވަގުތުގައި ދިމާވެދާނެ ނަފުސާނީ މައްސަލަތަކުން އަރައިގަންނާނެ ގޮތް ކިޔާދީފަ އެވެ.
