ވެކްސިންއެއް ލިބެންދެން ކޮވިޑް-19އާއެކު ދިވެހިން ދިރިއުޅެން ދަސް ކުރަންޖެހޭ:ޑރ.މުރާދު
25 މެއި 2020 | ހޯމަ 12:17ލޮކްޑައުންއަށް ލުއި ދިނުމަށް ދަނީ ތައްޔާރުވަމުން
ކޮވިޑް-19އާ ގުޅޭ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމެއްގެ ތެރެއިން އައިޖީއެމްއެޗްގެ އެތެރެހަށީގެ ޚާއްސަ ޑރ. މުސާ މުރާދު
ދާއިމީ ވެކްސިން އެއް ލިބެންދެން ކޮވިޑް-19އާއެކު ދިރިއުޅެން ދަސްކުރަން ޖެހޭ ކަމަށް އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް)ގެ އެތެރެހަށީގެ ޚާއްސަ ޑރ. މުސާ މުރާދު ވިދާޅުވެއްޖެ އެވެ.
ރާއްޖެޓީވީގެ ކޮވިޑް-19ގެ ކަވަރޭޖަށް ދެއްވި އިންޓަވިއުއެއްގައި ޑރ.މުރާދު ވިދާޅުވީ 'ލޮކްޑައުން' އަށް ލުއި ދިނުމަށް ސަރުކާރުން ތައްޔާރުވަމުން އަންނައިރު ލިބޭ ފަސޭހަތަކުގެ ބޭނުންކުރަން ވާނީ ވީ އެންމެ މަދު މިންވަރަށް ކަމަށެވެ.
ޑރ. މުރާދު ވިދާޅުވީ ކުއްލި އަކަށް މި ހާލަތުން އަރައި ނުގަނެވޭނެ ކަމަށާއި، ކަށަވަރު ވެކްސިންއެއް ލިބެންދެން ކޮންމެވެސް ވަރަކަށް ބަލި ފެންނަމުންދާނެ ކަމަށެވެ. އަދި އެގޮތަށް ބަލި ފެންނައިރުގަ ބަލި ފެތުރުން ކޮންޓްރޯލް ކުރެވޭނީ ހުރިހާ އެންމެން ވެސް އެކުގަ މަސައްކަތް ކުރެވިގެންކަން ޑރ. މުރާދު ފާހަގަކުރެއްވި އެވެ.
އެގޮތުން ލިބޭ ލުއިތަކުގެ ބޭނުން ހިފައި، ފަރުދީ ޒިންމާ ނެގުމަށް ޑރ. މުރާދު އިލްތިމާސް ކުރެއްވި އެވެ. އަދި އެހެން މީހުންނަށް ބަލި ނުފެތުރޭ ގޮތަށް އަމަލުތައް ބެހެއްޓުމަށް ވެސް އިލްތިމާސް ކުރެއްވި އެވެ.
