އެކި ދުވަސް މަތިން ބުރުމާތަކެއް ވަގަށް ނެގި މީހަކު ހައްޔަރު ކޮށްފި

ގިނަ އަދަދެއްގެ ބުރުމާތަކެއް ވަގަށް ނެގި މީހަކު ރ ދުވާފަރު ފުލުހުން ހައްޔަރުކޮށްފި އެވެ.

ހޯމަ ދުވަހު ފުލުހުން ކުރި ޓްވީޓެއްގައި ބުނީ، ފާއިތުވި ދެމަހެއްހާ ދުވަހުގެ ތެރޭގައި އެކި ދުވަސްމަތިން ބުރުމާތަކެއް ވަގަށް ނެގި މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. އަދި މި މައްސަލަ ފުލުހުންނަށް ހުށައަޅާފައި ވަނީ އާދިއްތަ ދުވަހުގެ ވަގުތެއްގައި ކަމަށާއި، މައްސަލަ ހުށައެޅުނުތާ 6 ގަޑިއިރުގެ ތެރޭގައި ރ. ދުވާފަރު ފުލުހުންގެ އެހީގައި އެމީހާ ހޯދާފައިވާކަމަށް ފުލުހުންގެ އިދާރާއިން ބުނެއެވެ.

ފުލުހުން ބުނީ، މި މައްސަލައިގައި ވައްކަމުގެ ތުހުމަތު ކުރެވެނީ އުމުރުން 24 އަހަރުގެ ދިވެހި ފިރިހެނަކަށް ކަމަށެވެ.

މި މައްސަލަ ފުލުހުން ދަނީ އިތުރަށް ތަހުޤީޤު ކުރަމުންނެވެ.

މިއަހަރުގެ މިހާތަނަށް ހުށައެޅިފައިވާ ވައްކަމުގެ މައްސަލަތަކަށް ބަލާއިރު، ވައްކަމާ ގުޅޭ 1449 މައްސަލައެއް ފުލުހުންނަށް ރިޕޯޓު ކޮށްފައި ވެއެވެ.