ކޮވިޑް-19 އާއި ގުޅިގެން ގިނަ ގައުމުތަށް ލޮކްޑައުންކޮށްފާއިރު، އެއީ ބޭކާރުކަމެއް ކަމަށް ނޯބްލް ޕްރައިޒް ލިބިފައިވާ ސްޓޭންފޯރޑްގެ ސައިންޓިސްޓެއްކަމަށްވާ މައިކަލް ލީވިޓް ވިދާޅުވެއްޖެއެވެ.

އޭނާ ވިދާޅުވީ ލޮކްޑައުންގެ ސަބަބުން ބަލި ނުޖެހިތިބި މީހުންގެ އަދަދަށްވުރެ މަރުވި މީހުންގެ އަދަދު އިތުރުކަމަށެވެ. މައިކަލް ވިދާޅުވީ ގޭގައި ތިބުމަށް އެންގީ، ރައްކާތެރިކަމުގެ ފިޔަވަޅެއްގެ ގޮތުގައި ނޫން ކަމަށާއި، އެއީ ޕެންޑެމިކް އާއި ގުޅިގެން އައި ހާސްކަމާއި އެކު ނިންމި ނިންމުމެއް ކަމަށެވެ.

ޕްރޮފެސަރ ވިދާޅުވީ ގައުމުތަކުން ލޮކްޑައުންއަކަށް ދާން ނިންމާފައިވަނީ ވައިރަސް ޖެހިގެން މަރުވާނެ މީހުންގެ އަދަދު ކަމަށް ލަފާކޮށް، ނެރެފައިވާ މޮޑެލްއަކާއި ގުޅިގެން ކަމަށެވެ. އަދި ލޮކްޑައުންއާއި ގުޅިގެން މި ވަރިަސް ކޮންޓްރޯލް ކުރެވިފައި ނުވާކަމަށާއި އޭގެ ސަބަބުން، މީހުންގެ ދިރިއުޅުމަށް ނޭދެވޭ އަސަރުކޮށްފައިވާ ކަމަށެވެ.

ބައެއް ގައުމުތަކުން ލޮކްޑައުންއަށް މަޑުމަޑުން ލުއިތައް ދޭން ފަށާފައިވާއިރު، ބައެއް ގައުމުތަކުގައި ކުޑަ ސަރޖެއް އަންނަ ކަން ވަނީ ފާހަގަވެފައެވެ. އެހެންނަމަވެސް، ބައެއް ގައުމުތަކުގައި ކޭސްތަކުގެ އަދަދު އެއްވަރެއްގައި ހިފެހެއްޓިފައިވާކަން ވެސް ފާހަގަކޮށްލެވެއެވެ. އެގޮތުން، ޑެންމާރކުގައި ސްކޫލްތަކާއި ޝޮޕިންގް މޯލްތައް ހުޅި ނަމަވެސް، ވައިރަސް ފެތުރެމުންދާ ރޭޓްވަނީ ދަށްވެފައެވެ. އަދި ޖަރމަނީގައިވެސް ލޮކްޑައުންއާއި ގުޅިގެން އެޅިފައިވާ ފިޔަވަޅުތަކަށް ލުއި ދިން ފަހުން މި ރޭޓް ވަނީ 1.0 ގައި ހިފެހެއްޓިފައެވެ.