ޕެންޝަން ފަންޑުގެ އިންވެސްޓްމަންޓްތައް ފުޅާކުރުމުގެ ދިރާސާ ވޯލްޑް ބޭންކްގެ ފަންނީ އެހީއާއިއެކު މިހާރު ކުރަމުންދާކަމަށް މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން ބުނެފި އެވެ.
ހޮނިހިރު ދުވަހު ނޭޝަނަލް އެމެޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ޕެންޝަން އޮފީހުގެ އެކްޓިންގ ސީއީއޯ ފާތިމަތު ސުޖާތާ ހަލީމް ވިދާޅުވީ، ޕެންޝަން އޮފީހުން މުހިންމު ކަންތައްތަކެއް ކުރިއަށް ގެންދިއުމަށް ރާވާފައިވާ ކަމަށެވެ. ޕެންޝަން ފަންޑުގެ އިންވެސްޓްމަންޓްތައްތައް ފުޅާކުރުމުގެ ދިރާސާ ވޯލްޑް ބޭންކްގެ ފަންނީ އެހީއާއިއެކު މިހާރު ކުރަމުންދާ ކަމަށާއި، މިމަސައްކަތް ނިމުމުން ޕެންޝަން ފަންޑުން އިތުރު އެސެޓް ކްލާސްތަކުގައި އިންވެސްޓްކުރުމުގެ މަސައްކަތް ކުރެވޭނެ ކަމަށް ސުޖާތާ ވިދާޅުވިއެވެ.
ސުޖާތާ ވިދާޅުވީ އިތުރު ބެނެފިޓް ސްކީމްތައް ތަޢާރަފް ކުރެވިގެންދާނެ ކަމަށެވެ. އެގޮތުން ޕެންޝަން ފަންޑުގެ ބައިވެރިން ޑިސެބިލިޓީ އިންޝުއަރެންސް ސްކީމެއްގެ ދަށުން އިންޝުއަރ ކުރުން މިސްކީމްގެ ދަށުން ވަޒީފާ އަދާކުރަމުން ދަނިކޮށް ދިމާވާ ނުކުޅެދުންތެރި ކަމުގެ ހާލަތްތަކުގައި މާލީ އެހީތެރިކަން ލިބޭނެ ގޮތް ހަމަޖެހިގެންދާނެ ކަމަށް ސުޖާތާ ވިދާޅުވި އެވެ.
ސުޖާތާ ވިދާޅުވީ ރިޓަޔަރމަންޓް އެނުއިޓީ ތަޢާރަފް ކުރެވުމުން ރިޓަޔަރމަންޓް ޕެންޝަންގެ ގޮތުގައި ތަފާތު ބާވަތްތަކުގެ ޕެންޝަނާއި އިނާޔަތް އިންޝުއަރެންސް ކުންފުނިތައް މެދުވެރިކޮށް ހޯދުމަށް މަގުފަހިވާނެ ކަމަށެވެ. އަދި މަސްވެރިންނާއި ދަނޑުވެރިންނަށް ޚާއްސަ ޕެންޝަން ސްކީމްތައް ތައްޔާރުކުރާނެ ކަމަށް ވެސް ސުޖާތާ ވިދާޅުވިއެވެ.
