މި އަހަރުގެ ހުޅަނގު މޫސުމުގެ ވިއްސާރައިގައި ލިބުނު ގެއްލުންތަކުގެ ސަބަބުން ރަސްފަންނު "ގިރައި ގޮސްފި" ކަމަށް މާލެ ސިޓީ ކައުންސިލްގެ މޭޔަރު ޝިފާ މުހައްމަދު ވިދާޅުވެއްޖެ އެވެ.

ހޮނިހިރު ދުވަހުގެރޭ ބޭއްވި، ރައްޔިތުންގެ މަޖިލީހުގެ އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީގެ ބައްދަލުވުމުގައި ޝިފާ ވިދާޅުވީ މާލެ ސަރަހައްދުން އެންމެ ބޮޑު ގެއްލުމެއް ލިބުނީ ރަސްފަންނަށް ކަމަށެވެ. ރަސްފަންނު އަލުން މަރާމާތުކުރަން ބޮޑު ހަރަދެއް ހިނގާނެ ކަމަށް މޭޔަރު ވިދާޅުވި އެވެ.

ރަސްފަންނަށް ލިބިފައިވާ ގެއްލުންތަކުގެ ތަފްސީލު ދެއްވަމުން ޝިފާ ވިދާޅުވީ، އެތަނުގައި ހުރި ބްރޭކްވޯޓަރުގައި ހުރި ހަތަރު ނެޓު ވަނީ އެއްކޮށް ހަލާކުވެފައި ގޮސްފައި ކަމަށެވެ. އަދި އެތަނުގައި އާންމުންގެ ބޭނުމަށް ހުރި ފާހަނާތަކާއި، ގެތަކާއި، ބާބަކިއު ފަދަ ތަކެތި އެއްކޮށް ހަލާކުވެފައިވާ ކަމަށް ވެސް ވިދާޅުވި އެވެ.

ކުރީގެ ރައީސް އަބްދުﷲ ޔާމީންގެ ދައުރުގައި 40 މިލިއަނަށް ވުރެ ގިނަ ރުފިޔާ ހަރަދުކޮށްގެން ހެދި ރަސްފަންނަށް، މީގެ ކުރިން ވެސް ގެއްލުންތަކެއް ވެގެން މަރާމާތުކޮށްފައި ވެއެވެ. އެގޮތުން ރަސްފަންނަށް އުދަ އަރައި، ވެލިގަނޑު ކަނޑައިގެން ދިއުމާއި ގުޅިގެން އެކިފަހަރު މަތިން ވެލި އަޅާފައި ވެއެވެ.

މޭޔަރު ޝިފާ ވަނީ، އެންމެ ފަހުން ކުރި ވިއްސާރައިގައި ސުނާމީ ބިނާ ހުރި ޕާކު ސަރަހައްދަށް ބޮޑެތި ގެއްލުންތަކެއް ވެފައިވާކަން ހާމަކުރައްވާފަ އެވެ. އެގޮތުން، ސުނާމީ ބިނާ ސަރަހައްދުގައި ހުރި ގާތަކާއިއެކު ވެލިގަނޑު އެއްކޮށް ދަމައިގެންފައިވާކަމަށް ވިދާޅުވި އެވެ.

އެ ސަރަހައްދުގެ ކަނޑުތޮށި ކައިރީގައި ހުރި ޝީޓްޕައިލްތައް ވެސް ވަނީ ހަލާކުވެފަ އެވެ. ޝީޓްޕައިލްތަކަށް ލިބުނު ގެއްލުންތަކާއި ގުޅިގެން، އެ ސަރަހައްދަށް ކައިރިވުމަކީ ނުރައްކާތެރި ކަމެއްގެ ގޮތުގައި ޝިފާ ސިފަކުރެއްވި އެވެ.

ސުނާމީ ބިނާ ޕާކު ހުންނަ މާލޭ ހުޅަނގު ދެކުނު ސަރަހައްދުގައި ހުންނަ ނެރަކީ ގިނަ އަދަދެއްގެ އުޅަނދުފަހަރު ބޭނުންކުރާ ނެރެކެވެ. ކޮންސްޓްރަކްޝަން ސާމާނުތަކާއި، ގޭސް ފަދަ ބައެއް ސަމާނު އަތޮޅު ތެރެއަށް ގެންދިއުމަށް ދޯނިތަކަށް މުދާ ބަރުކުރަނީ މި ސަރަހައްދުގަ އެވެ. ވިލިމާލެ އަށް ދަތުރުކުރާ ފެރީ ދޯނި ފަހަރު ވެސް ވަންނަނީ މި ނެރުންނެވެ.

ސުނާމީ ބިނާ އެންމެ ފުރަތަމަ ބެހެއްޓުނީ ލޮނުޒިޔާރަތްކޮޅުގަ އެވެ. ނަމަވެސް، ރައީސް ޔާމީންގެ ސަރުކާރުން އެ ސަރަހައްދު ތަރައްގީކުރުމަށް އެ ބިނާ މިހާރު އެހުރި ސަރަހައްދަށް ބަދަލުކުރީ އެވެ.