ގޭގައި ކަރަންޓީންވާން އެދޭ ފަރާތްތަކުން އެކަމަށް އެދި ހުށައެޅުމުގެ ފުރުސަތު ހުޅުވާލައިފި
24 މެއި 2020 | އާދީއްތަ 06:54ޗެކްލިސްޓެއް ފުރިހަމަކުރުމަށްފަހު މެއިލް ކުރުމަށް ވަނީ އެދިފައި
ގޭގައި ކަރަންޓީން ކުރެވޭ މީހުން 14 ދުވަސް ފަހުން ޓެސްޓް ކުރެވޭނެ، އަދި ނަތީޖާ ނެގެޓިވް ނަމަ ކަރަންޓީނުން ދޫކޮށްލެވޭނެ
ކޮވިޑް-19 އާ ގުޅިގެން ގޭގައި ކަރަންޓީންވާން އެދޭ ފަރާތްތަކުން އެކަމަށް އެދި ހުށައެޅުމުގެ ފުރުސަތު ހެލްތު ޕްރޮޓެކްޝަން އޭޖެންސީ (އެޗްޕީއޭއިން) ހުޅުވާލައިފި އެވެ.
"ކޮވިޑް-19 އާ ގުޅިގެން ގޭގައި ކަރަންޓީން ވުމުގެއުސޫލު" ހޮނިހިރު ދުވަހުގެރޭ އާންމު ކޮށްފައި ވާއިރު، މި އުސޫލުގެ ދަށުން ކަރަންޓީން ކުރެވޭނީ ބައްޔަށް ހުށައެޅިފައިވާ މީހުންގެ ތެރެއިން އަލާމަތްތައް ނުފެންނަ މީހުން ކަމަށާއި، އެކަމުގެ މަޤްސަދަކީ ބަލި ހުރިކަން އަވަހަށް ދެނެގަތުން ކަމަށް އެޗްޕީއޭއިން ބުނެއެވެ.
އެޗްޕީއޭއިން ވަނީ ގޭގައި ކަރަންޓީނު ވުމަށް ބޭނުންވާ ފަރާތްތަކުން ޗެކްލިސްޓެއް ފުރިހަމަކުރުމަށްފަހު homequarantine@health.gov.mv އަށް އީމެއިލް ކުރުމަށް އެދިފަ އެވެ.
އެކަމާބެހޭ އުސޫލުގައި ވަނީ ގޭގައި ކަރަންޓީންވާން އެދި ހުށައަޅާ ފަރާތްތަކުން ފުރިހަމަކުރަން ޖެހޭ ޝަރުތުތައް ތަފްސީލުކޮށް ބަޔާން ކޮށްފައެވެ. އެގޮތުން ނިދާ ތަނާއި، ފާޚާނާގެ އިތުރުން، ބޭނުން ކުރާ ތަކެތި ގެންގުޅުމުގައިވެސް ވަކި ޚާއްސަ އުސޫލުތަކެއް ވަނީ ބަޔާން ކޮށްފަ އެވެ. މިސާލެއްގެ ގޮތުން ގޭގައި ކަރަންޓީންވާން އެދޭ ފަރާތްތަކުން ކަރަންޓީން ކުރާ މީހާ ބެހެއްޓުން އެކަށީގެން ވަނީ ވައި ދައުރުވާ ގޮތަށް ފާޚާނާއާއެކު ހުންނަ ކޮޓަރިއެއްގައި ކަން ބަޔާން ކޮށްފައިވެ އެވެ.
އޭގެ އިތުރުން، ފާޚާނާގައި ވެސް ރައްކާތެރި ކަމާއެކު އަތް ދޮވެ، ސާފު ފެން ލިބޭނެ އިންތިޒާމުތައް ހަމަޖެއްސުން ލާޒިމު ކޮށްފައި ވާއިރު، ގޭގައި އުޅޭ އުމުރުން 60 އަހަރުން މަތީގެ ނުވަތަ ދާއިމީ ބައްޔަކަށް ބޭސް ފަރުވާ ކުރާ މީހުންނާ އެއް ފާޚާނާއެއް ކަރަންޓީން ކުރާ މީހާ ބޭނުންކޮށްގެން ނުވާނެކަންވެސް ފާހަގަ ކޮށްފައި ވެއެވެ.
އެޗްޕީއޭއިން ބުނީ، ގޭގައި ކަރަންޓީން ކުރާނީ 14 ދުވަހަށް ކަމަށާއި، އެ މުއްދަތު ހަމަވުމުން ކޮވިޑް-19 އަށް ޓެސްޓް ކުރުމަށް ފަހު ނަތީޖާ ނެގެޓިވްވުމުން ކަރަންޓީނުން ދޫކޮށްލެވޭނެ ކަމަށެވެ. އަދި 60 އަހަރުން މަތީގެ މީހެއް މި ބީދައިން ކަރަންޓީން ކުރެވޭނީ އެހީތެރިއަކު ހުންނަ ގޭގޭގައި އެކަނި ކަމަށްވެސް ބަޔާން ކޮށްފައި ވެއެވެ. އެގޮތުން އެހީތެރިއާ އަކީ 60 އަހަރުން ދަށުގެ މީހަކަށް ވުމާއި، ދާއިމީ ބައްޔަކަށް ބޭސް ފަރުވާ ކުރާ މީހަކަށް ވެގެން ނުވާނެކަމަށް ބުނެފައި ވެއެވެ.
