ވިޔަފާރިއާ ގުޅުންހުރި ދެ ބިލަކަށް އާންމުންގެ ހިޔާލަށް ހުޅުވާލައިފި
23 މެއި 2020 | ހޮނިހިރު 07:53އަންނަ ޖޫން މަހުގެ 7 ވަނަ ދުވަހުގެ 12:00 ގެ ކުރިން ހިޔާލު ނުވަތަ ކޮމެންޓް ކުރެވޭނެ
ރައްޔިތުންގެ މަޖިލީހުގެ އިގްތިދާސީ ކޮމެޓީގެ ބައްދަލުވުމެއްގެ ތެރެއިން: އެކޮމެޓީން މިހާރު ދިރާސާ ކުރަމުންދާ ދެ ބިލަކާ ގުޅިގެން މިވަނީ އާންމުންގެ ހިޔާލަށް ހުޅުވާލާފައި
ރައްޔިތުންގެ މަޖިލީހަށް ހުށަހެޅި އަދި ދިރާސާ ކުރަމުންދާ، ވިޔަފާރިއާ ގުޅުންހުރި ދެ ބިލަކާ ގުޅިގެން، އެ ދެ ބިލަށް އާންމުންގެ ހިޔާލު ހުށަހެޅުމުގެ ފުރުސަތު މަޖިލީހުގެ އިދާރާއިން ހުޅުވާލައިފި އެވެ.
މި ދެ ބިލަކީ، ވިޔަފާރީގެ ދާއިރާގައި ވާދަވެރިކަން އުފައްދައި ދެމެހެއްޓުމުގެ ބިލާއި، މުދާ ގަންނަ ފަރާތްތަކާއި ހިދުމަތް ލިބިގަންނަ ފަރާތްތައް ހިމާޔަތް ކުރުމުގެ ބިލެވެ.
މި ދެ ބިލާއި ގުޅިގެން ހިޔާލެއް ނުވަތަ ކޮމެންޓެއްް ކުރައްވަން ބޭނުންވާ ފަރާތްތަކުން އަންނަ ޖޫން މަހުގެ 7 ވަނަ ދުވަހުގެ 12:00ގެ ކުރިން، committee@majlis.gov.mv އަށް ލިޔުމުން އީމެއިލް ކުރެއްވުމަށާއި ނުވަތަ ލިޔުމުން މަޖިލީހުގެ އިދާރާއަށް ފޮނުއްވުން އެދޭ ކަމަށްް މަޖިލީހުގެ އިދާރާއިން ބުނެއެވެ.
ސަރުކާރުގެ ފަރާތުން، މަކުނުދޫ ދާއިރާގެ މެންބަރު މުޙައްމަދު ރާޢީ ހުށަހަޅުއްވާފައިވާ، ވިޔަފާރީގެ ދާއިރާގައި ވާދަވެރިކަން އުފައްދައި ދެމެހެއްޓުމުގެ ބިލާއި، ސަރުކާރުގެ ފަރާތުން، ކުޅުދުއްފުށި ދެކުނު ދާއިރާގެ މެންބަރު ޖަމްޝީދު މުޙައްމަދު ހުށަހަޅުއްވާފައިވާ، މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ޙިމާޔަތްކުރުމުގެ ބިލު މިހާރު އޮތީ، އިގްތިޞާދީ ކޮމެޓީން ދިރާސާ ކުރުމުގެ މަރުހަލާގަ އެވެ.
