ތޫފާން އަމްޕަންއާ ގުޅިގެން މިނިސްޓަރު ޝާހިދު ހަމްދަރުދީ ފޮނުއްވައިފި
21 މެއި 2020 | ބުރާސްފަތި 17:47އިންޑިއާގެ އިރުމައްޗަށް ތޫފާން އެރުމާ ގުޅިގެން ބޮޑެތި ގެއްލުންތަކެއް ލިބިފައިވޭ
ފޮރިން މިނިސްޓަރު އަބްދުﷲ ޝާހިދު، ކޮވިޑް-19އާ ގުޅިގެން ގިނަ ގައުމުތަކާ އެކުގައި ދަނީ މަސައްކަތް ކުރަމުން
ބޭ އޮފް ބެންގާލްގައި އުފެދިފައިވާ ތޫފާން އަމްޕަންއާއި ގުޅިގެން، ޠޫފާނުގެ އަސަރުކޮށްފައިވާ ބަންގްލަދޭޝްއާއި އިންޑިއާއަށް ފޮރިން މިނިސްޓަރު ޢަބްދުﷲ ޝާހިދު ހަމްދަރުދީގެ މެސެޖެއް ފޮނުއްވައިފި އެވެ.
ހަމްދަރުދީގެ މެސެޖުތައް މިނިސްޓަރ ޝާހިދު ފޮނުއްވާފައި ވަނީ ވަކިވަކިން، ބަންގްލަދޭޝްގެ ފޮރިން މިނިސްޓަރު އޭ.ކޭ އަބްދުލް މޮމެން އާއި، އިންޑިއާގެ އެކްސްޓަރނަލް އެފެއަރޒް މިނިސްޓަރު ޑރ. ސުބްރަމާނިއަމް ޖައިޝަންކަރަށެވެ.
އިންޑިއާގެ އިރުމައްޗާއި، ބަންގްލަދޭޝްގެ އައްސޭރިފަށަށް ތޫފާން އަމްޕަން އެރުމާ ގުޅިގެން އެ ޞަރަޙައްދަށް ބޮޑެތި ގެއްލުންތަކެއް ލިބުމާ ގުޅިގެން މިނިސްޓަރު ޝާހިދު ފޮނުއްވި ހަމްދަރުދީގެ މެސެޖުގައި، މި ޠޫފާނުގައި ބައެއް މީހުންގެ ފުރާނަ ގެއްލި، ބައެއް އަވަށްތައް އެއްކޮށް ސުންނާފަތިވެ އަދި ގިނަ ޢަދަދެއްގެ ބައެއްގެ ގެދޮރު ގެއްލުނު ޚަބަރު އެއްސެވީ ފުން ހިތާމަޔާއެކުގައި ކަމަށް ވިދާޅުވި އެވެ.
ތޫފާނުގެ ސަބަބުން ލިބޭ ގެއްލުންތައް ކުޑަކުރުމަށާއި، ޙާލުގައި ޖެހުނު ފަރާތްތަކަށް އެހީވުމަށް ދެޤައުމުގެ ސަރުކާރުން ކުރާ މަސައްކަތްތައް މިނިސްޓަރ ޝާހިދު ވަނީ ފާހަގަކުރައްވާފަ އެވެ.
ވަކިން ޚާއްޞަކޮށް މި ދުވަސްވަރަކީ ކޮވިޑް-19 އާ ދެކޮޅަށް މުޅި ދުނިޔެއާއި އަދި އެ ދެޤައުމުން ވެސް ހަނގުރާމަ ކުރަމުންދާ ދުވަސްވަރެއްކަމުން، ޠޫފާނުގެ ސަބަބުން އިތުރު ގޮންޖެހުންތަކާ ކުރިމަތިލާން ޖެހޭނެކަން އެމަނިކުފާނު ފާހަގަކުރެއްވި އެވެ. އަދި ކާރިޘާތަކުން އަރައިގަތުމަށް ޞަރަޙައްދުގެ ޤައުމުތަކާ ގުޅިގެން ރާއްޖެއިން މަސައްކަތް ކުރާނެކަމުގެ ޔަޤީންކަން މިނިސްޓަރު ޝާހިދު ވަނީ އަރުވާފަ އެވެ.
މިނިސްޓަރ ޝާހިދު ވަނީ ދިވެހި ސަރުކާރާ ރައްޔިތުންގެ ނަމުގައި ބަންގްލަދޭޝްއާއި އިންޑިއާގެ ސަރުކާރަށް ހަމްދަރުދީއާއި ތަޢުޒިޔާ ދަންނަވާފަ އެވެ.
