ދިވެހިރާއްޖޭގައި ފުރަތަމަ ފަހަރަށް ވީޑިއޯ ކޮންފަރެންސް މެދުވެރިކޮށް ވަޒީރުންގެ މަޖިލީހުގެ ބައްދަލުވުމެއް ބާއްވައިފި އެވެ.
ސިސްކޯ ވެބް މެދުވެރިކޮށް ރައީސް ވަޒީރުންނާ އަންގާރަ ދުވަހު ބައްދަލު ކުރައްވާފައިވަނީ ލޮކްޑައުން އާ ގުޅިގެން ބަންދުވެފައި އޮންނަތާ ގިނަ ދުވަސްތަކެއް ވެފައި ވަނިކޮށެވެ. އަދި ވަޒީރުން ގޭގައި ތިބެ މަސައްކަތް ކުރަމުންދާ ވަގުތެއްގަ އެވެ.
ކޮވިޑް-19 އާ ގުޅިގެން ރާއްޖޭގެ އެކި ކަންކޮޅުތަކުގައި އަޅާފައިވާ ފިޔަވަޅުތަކަށް ލުއި ދެއްވުމުގައި ޢަމަލުކުރައްވާނެ ގޮތްތަކާ ބެހޭ ގޮތުން ވަޒީރުން ވަނީ މަޝްވަރާ ކުރައްވާފަ އެވެ.
އަދި މިކަމުން އަރައިގަތުމަށްޓަކައި ހުރިހާ ވުޒާރާތަކުން ވެސް ރާވަމުން ގެންދާ ކަންތައްތަކާއި ގައުމު އާރާސްތު ކުރުމަށް އިތުރަށް ކުރެވެން ހުރި ކަންކަމާ ބެހޭގޮތުންވެސް މަަޝްވަރާ ކުރެވުނު ކަމަށް ރައީސް އޮފީހުން ބުންޏެވެ.
ރާއްޖޭގައި މި ބަލި ފެތުރުން ކުޑަކުރެއްވުމާއެކު ފަންނީ މާހިރުންގެ ލަފާގެމަތިން ރައްޔިތުންގެ ފުރާނަ ސަލާމަތް ކުރެއްވުމަށް ރައީސް އިބްރާހިމް މުހައްމަދު ސާލިހުގެ އިރުޝާދާއެކު އަޅުއްވާފައިވާ އަދި އަޅުއްވަމުން ގެންދަވާ ހިކުމަތްތެރި ފިޔަވަޅުތައް ވަޒީރުންގެ މަޖިލީހުގެ މެންބަރުން ވަނީ ފާހަގަ ކުރައްވާފަ އެވެ.
އަދި ކޮވިޑް-19 އިން ރާއްޖޭގެ ރައްޔިތުން ރައްކާތެރިކުރުމަށް އެކި ވުޒާރާތަކުން ގުޅިގެން ކުރަމުން ގެންދާ ބުރަ މަސައްކަތްތައް ފާހަގަކުރައްވައި އެކަމަށް ވަޒީރުންގެ މަޖިލީހުގެ ހުރިހާ މެންބަރުންނަށް ރައީސް ވަނީ ޝުކުރު އަދާކުރައްވާފަ އެވެ.
