ނިއު ނޯމަލްގައި ކޯސްތައް ކުރިއަށް ގެންދާނެ ގޮތާމެދު މަޝްވަރާ ކުރަނީ
21 މެއި 2020 | ބުރާސްފަތި 13:02ކްލާސްތައް ހިންގާނެ ގޮތާ މެދު މަޝްވަރާ ކުރެވޭ
ކޮވިޑް-19އާ ގުޅިގެން ގައުމީ ޔުނިވާސިޓީގެ ކޯސްތައް ވެސް މެދުކަނޑާލާފައި
'ނިއު ނޯމަލް'ގައި ކޯސްތައް ކުރިއަށް ގެންދާނެ ގޮތާމެދު ޔުނިވަރސިޓީ، ކޮލެޖްތަކާއެކު މަޝްވަރާތައް ކުރަމުންދާ ކަމަށް ހަޔަރ އެޑިޔުކޭޝަނުން ބުނެފި އެވެ.
ބުދަ ދުވަހުގެ ރޭ ރާއްޖެޓީވީއަށް ދެއްވި އިންޓަވިއުއެއްގައި ހަޔަރ އޭޑިޔުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވީ ސަރުކާރުގެ ދެ ޔުނިވަރސިޓީއާ، ޕްރައިވެޓް ކޮލެޖުތަކާއެކު 'ނިއު ނޯމަލް'ގައި ކޯސްތައް ހިންގާނެ ގޮތާމެދު މަޝްވަރާ ކުރުމުންދާ ކަމަށެވެ.
އެގޮތުން 'ނިއު ނޯމަލް'އަށް ޔުނިވަރސިޓީ އަދި ކޮލެޖުތައް ތައްޔާރުވެފައިވާ މިންވަރާއި، ދިމާވާ ދަތިތަކާއި، ކިޔަވާދޭނެ ގޮތްތަކާއި، ކްލާސް ރޫމްތަކުގައި އެންމެ ގިނަ ވެގެން ދަރިވަރުންނަށް ތިބޭނެ އަދަދުތަކާ ބެހޭ މައުލޫމާތު އޮޅުން ފިލުވާ ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ 'ނިއު ނޯމަލް'ގައި ވެސް ކިޔަވާ ދިނުމުގެ ކަންކަން ކުރިއަށް ގެންދާނީ ދަރިވަރުންގެ އިތުރުން ޔުނިވަރސިޓީ އަދި ކޮލެޖުތަކަށް ދަތި ނުވާނެ ގޮތަށް ކަމަށެވެ.
ކޮވިޑް-19އާ ގުޅިގެން ރާއްޖޭގެ ޔުނިވަރސިޓީ އަދި ކޮލެޖުތަކުގެ ކިޔެވުން ވަނީ މެދުކަނޑާލާފަ އެވެ. ބައެއް ކޯސްތައް އޮންލައިންކޮށް ކުރިއަށް ގެންދިޔަ ނަމަވެސް މާލެއިން ކޭސްތައް ފެނުމާ ގުޅިގެން އޮންލައިންކޮށް ކިޔަވާ ދިނުން ވެސް މެދުކަނޑާލި އެވެ. ނަމަވެސް މިހާރު ހާލަތު ބަދަލުވަމުން ދާތީ ބައެއް ލުއިތައް ދިނުމަށް ސަރުކާރުން ނިންމާފަ އެވެ.
މޯލްޑިވްސް ނޭޝަނަލް ޔުނިވަރސިޓީ (އެމްއެންޔޫ) އިން ވަނީ މިމަހުގެ 31 ވަނަ ދުވަހު އޮންލައިން ކޯސްތައް ފެށުމަށް ނިންމާފަ އެވެ.
