ޗިލްޑްރެންސް އޮމްބަޑްސްޕަރސަންގެ މުސާރައަކީ 35،000ރ ކަމަށް ކޮމެޓީން ކަނޑައަޅައިފި

ކުޑަކުދިންގެ ޙައްޤުތައް ރައްކާތެރިކުރުުގެ ޤާނޫނުގެ 113 ވަނަ މާއްދާގައިވާ ގޮތުގެ މަތީން، ޗިލްޑްރަންސް އޮމްބަޑްސްޕަރސަންގެ މަޤާމަށް ޢައްޔަނުކުރާ ބޭފުޅަކަށް މަހު މުސާރައިގެ ގޮތުގައި 35،000ރ ދޭން ރައްޔިތުންގެ މަޖިލީހުގެ މާލިއްޔަތު ކޮމެޓީން ނިންމައިފި އެވެ.

ޗިލްޑްރަންސް އޮމްބަޑްސްޕާސަން އަށް މުސާރައާއި އިނާޔަތްތައް ކަނޑައެޅުމުގެ މައްސަލަ ދިރާސާކުރި ރައްޔިތުންގެ މަޖިލީހުގެ މާލިއްޔަތު ކޮމެޓީން ނިންމި ރިޕޯޓުގައިވާ ގޮތުން، ޗިލްޑްރަންސް އޮމްބަޑްސްޕަރސަންގެ މުސާރަ އަކީ 25،000ރގެ އިތުރުން އެލަވަންސްގެ ގޮތުގައި 10،000ރ އާއެކު ޖުމުލަ 35،000ރ އެވެ.

ޗިލްޑްރަންސް އޮމްބަޑްސްޕަރސަންގެ މަސްއޫލިއްޔަތުތައް:

* ދައުލަތުގެ އިދާރާތަކުން ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނަށް ޢަމަލުކުރާ މިންވަރު ދެނެގަނެ، މި ޤާނޫނު ތަންފީޒުކުރުމަށް، ކުރަންޖެހޭ އެންމެހައި ކަންކަން ކުރުމަށް ބާރުއެޅުން.

* ކުޑަކުދިންގެ ޙައްޤުތަށް ރައްކާތެރިކުރުމާ ބެހޭ މުޢާހަދާއާ އެއްގޮތަށް ދައުލަތުގެ އިދާރާތަކުން ޢަމަލުކުރާ މިންވަރު ދެނެގަނެ، އެ މުޢާހަދާއާ އެއްގޮތަށް ޢަމަލުކުރާކަން ކަށަވަރުކުރުމުގެ ގޮތުން ކުރަންޖެހޭ އެންމެހައި ކަންކަންކުރުން.

* ދިވެހިރާއްޖޭގެ ކުޑަކުދިންގެ ޙައްޤުތައް ރައްކާތެރިކޮށްދިނުމުގައި ޙަރަކާތްތެރިވާ އިދާރާތަކާއި މުވައްޒަފުން މޮނީޓަރކޮށް، އިވެލުއޭޓްކުރުން، އަދި

* ދިވެހިރާއްޖޭގައި ކުޑަކުދިންގެ ޙައްޤުތައް ރައްކާތެރިކޮށްދިނުމުގައި ޙަރަކާތްތެރިވާ އިދާރާތަކާއި މުވައްޒަފުންގެ ޢަމަލުތައް ތަޙުޤީޤުކޮށް، މުޠާލިޢާކުރުން.

ކުޑަކުދިންގެ ޙައްޤުތައް ރައްކާތެރިކުރުުގެ ޤާނޫނުގެ 113 ވަނަ މާއްދާގައިވާ ގޮތުގެ މަތީން، ޗިލްޑްރަންސް އޮމްބަޑްސްޕަރސަންގެ މަޤާމަށް ޢައްޔަނު ކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ، ސިޔާނަތު ހާޝިމް، ގދ. ތިނަދޫ ހިރިޔާ އަށް ރުހުން ދިނުމަށް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމެޓީން ވަނީ ނިންމާފަ އެވެ.

ޗިލްޑްރަންސް އޮމްބަޑްސްޕަރސަންގެ މަޤާމަށް ޢައްޔަނު ކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅު ދިރާސާކޮށް ގޮތެއް ނިންމުމަށް އެ މައްސަލައާ ގުޅޭ ދާއިމީ ކޮމިޓީއަށް ފޮނުއްވާފައި ވަނީ މިދިޔަ އޭޕްރީލް މަހުގެ 22 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާއިންނެވެ.

އޮމްބަޑްސްޕަރސަންގެ މަޤާމަށް ސިޔާނަތުގެ ނަން ކޮމެޓީން ފާސްކުރި ރިޕޯޓާއި މަޤާމުގެ މުސާރަ ކަނޑައެޅި މާލިއްޔަތު ކޮމެޓީގެ ރިޕޯޓު ދެން ފޮނުވޭނީ ރައްޔިތުންގެ މަޖިލީހުގެ ތަޅުމަށެވެ. އަދި އެ ދެ ރިޕޯޓު މަޖިލީހުގެ ޖަލްސާއަށް އެޖެންޑާ ކުރުމަށް ފަހު ފާސްކުރުމާ މެދު ގޮތެއް ނިންމާނީ ރައްޔިތުންގެ މަޖިލީހުގެ ޖަލްސާގައި ނަގާ ވޯޓުން ނެވެ.