ކުރީގެ ނައިބްރައީސް ޖަމީލުގެ ބޮޑެތި ތުޙުމަތުތަކެއް މިނިސްޓަރ އަމީން އާއި މިނިސްޓަރ އަމީރަށް!
ސަރުކާރުގެ ހިޔާނާތުގައި އެންމެ އިސް ރޯލެއް އަދާކުރަނީ އެ ދެ ވަޒީރުންކަމަށް ވިދާޅުވި
ޑރ ޖަމީލް ވިދާޅުވީ، ސަރުކާރުގެ ތެރޭގައި ހިންގާ ކޮރަޕްޝަންގައި އެންމެ އިސްކޮށް އުޅުއްވަނީ މިނިސްޓަރ އަމީންއާއި މިނިސްޓަރ އަމީރު ކަމަށް
ހެލްތް މިނިސްޓަރ އަބްދުﷲ އަމީން އާއި، ފިނޭންސް މިނިސްޓަރ އިބްރާހިމް އަމީރުގެ މައްޗަށް ކުރީގެ ނައިބްރައީސް ޑރ މުހައްމަދު ޖަމީލް އަހުމަދު ކޮރަޕްޝަންގެ ބޮޑެތި ތުހުމަތުތަކެއް ކުރައްވައިފިއެވެ.
ރައީސް ޤައުމާ މުޚާތަބު ކުރައްވައި ދެއްކެވި ވާހަކަފުޅަށް ރައްދު ދެއްވައި ބުދަ ދުވަހު ޑރ ޖަމީލް ކުރެއްވި ޓްވީޓެއްގައި ވަނީ ޤައުމު އަލުން ހުޅުވާލުމަށް މަސައްކަތް ކުރަމުންދާއިރު، ވަޒީރުންނާއި ކުންފުނިތަކުގެ ވެރިންގެ ބޮޑެތި ކޮރަޕްޝަންގެ އަމަލުތަކެއް ހިމެނޭކަމަށް ތުހުމަތު ކުރައްވާފައެވެ. އަދި އެ ހިޔާނަތްތަކަށް ޖަވާބުދާރީ ކުރުވޭނެ ކަމަށްވެސް ވިދާޅުވެފައިވެއެވެ.
އެކަމާ ގުޅޭގޮތުން "ރާއްޖެއެމްވީ" އިން ސުވާލުކޮށްލުމުން ޑރ ޖަމީލް ވިދާޅުވީ، ސަރުކާރުގެ ހިޔާނާތުގައި އެންމެ އިސް ރޯލެއް އަދާ ކުރަނީ ހެލްތް މިނިސްޓަރ އަބްދުﷲ އަމީންއާއި، ފިނޭންސް މިނިސްޓަރ އިބްރާހިމް އަމީރު ކަމަށެވެ. އަދި އެކަމުގައި ދައުލަތުގެ ވިޔަފާރި ކުންފުނި އެސްޓިއޯގެ ބޭނުން ހިފަމުންދާކަމަށްވެސް ޑރ ޖަމީލް ވަނީ ތުހުމަތު ކުރައްވާފައެވެ.
ޖަމީލް ވިދާޅުވީ، މި ހިޔާނަތްތައް ނިސްބަތުން އެމްއެމްޕީއާރްސީގެ ހިޔާނާތަށްވުރެވެސް ބޮޑު ކަމަށާއި، އައު ސަރުކާރެއް އައިސް މިނިވަން ތަހުޤީޤެއް ހިންގަން ފުރުސަތު ލިބިއްޖެނަމަ މި ތުހުމަތުތައް ސާބިތުވެސް ކުރެއްވޭނެ ކަމުގެ ފުރިހަމަ ޔަޤީންކަން އެބައޮތް ކަމަށެވެ.
މި ތުހުމަތުތަކާ ގުޅިގެން ރާއްޖެޓީވީން ދެންނެވި ސުވާލަކާ ގުޅިގެން ހެލްތް މިނިސްޓަރ އަބްދުﷲ އަމީން ވިދާޅުވީ، ވަޒީރުން ކުރަމުންދާ މަސައްކަތްތަކަށް ފާރަވެރިވެ ޒިންމާދާރު ކުރުވުމުގެ ނިޔަތުގައި އެކަންކަމަށް ފާޑުކިއުމަކީ މައްސަލައެއް ނޫން ކަމަށެވެ. އަދި މައްސަލައެއް އޮތް ނަމަ ޒިންމާދާރު ކުރެވޭނެ އެކިއެކި މުއައްސަސާތައް ހުރިކަން ފާހަގަ ކުރައްވައި މިނިސްޓަރ ވިދާޅުވީ، ސަރުކާރުގެ ހުރިހާވެސް އަމާޒެއް ހުރީ ރައްޔިތުން މި ބަލިމަޑުކަމުން ސަލާމަތް ކުރުމަށް ކަމަށެވެ.
މިކަމާ ގުޅިގެން ފިނޭންސް މިނިސްޓަރުގެ ބަހެއް ހޯދުމަށް ގުޅާލުމުން ފޯނަށް ޖަވާބު ދެއްވާފައެއް ނުވެއެވެ.
