ބެލްޖިއަމްގައި ހުންނަވާ ދިވެހި ސަފީރު، އީއީއޭއެސްއާ ރާއްޖޭގެ ހާލަތާ ބެހޭ ގޮތުން މަޝްވަރާ ކުރައްވައިފި
20 މެއި 2020 | ބުދަ 20:18ރާއްޖޭގެ އިގްތިސާދަށް ވަނީ ވަރަށް ބޮޑަށް ނޭދެވޭ އަސަރުކޮށްފައި
ދިވެހި ސަފީރު، އީއީއޭއެސްގެ ޑެޕިއުޓީ މެނޭޖިން ޑިރެކްޓަރު ޕައުލާ ޕަންޕަލޯނީއާއެކު ބޭއްވި ބައްދަލުކުރެއްވުމުގެ ތެރެއިން
ބެލްޖިއަމަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރު، ހަސަން ސޯބިރު, ޔޫރަޕިއަން އެކްސްޓަރނަލް އެކްޝަން ސަރވިސް (އީއީއޭއެސް) ގެ ޑެޕިއުޓީ މެނޭޖިން ޑިރެކްޓަރު ޕައުލާ ޕަންޕަލޯނީއާ ބައްދަލުކުރައްވައި މަޝްވަރާ ކުރައްވައިފި އެވެ.
ރާއްޖޭގެ ހާލަތާ ބެހޭ ގޮތުން މަޝްވަރާ ކުރުމަށް ބޭއްވެވި މިބައްދަލު ކުރެއްވުމުގައި ސޯބިރު ވަނީ ކޮވިޑް-19 އާ ގުޅިގެން ރާއްޖޭގެ މިހާރުގެ ހާލަތު ބަޔާންކޮށް ދެއްވާފަ އެވެ. އަދި މި ހާލަތުގައި ރާއްޖޭގެ އިގްތިސާދަށް ކޮށްފައިވާ އަސަރުގެ މައްޗަށް އަލިއަޅުއްވާލައްވާ މަޝްވަރާ ކުރެއްވި އެވެ.
މިބައްދަލުވުމުގައި މި ހީނަރު ކަމުން އަރައިގަތުމަށް ޔޫރަޕިއަން ޔޫނިއަންއާ ބައިނަލްއަގުވާމީ އެހީތެރިކަން ބޭނުންވާ ކަމަށް ސަފީރު ވިދާޅުވި އެވެ. އަދި މި ދަނޑިވަޅުގައި ގައުމުތަކުން ގުޅިގެން މަސައްކަތް ކުރުމުގެ މުހިންމުކަމުގެ މައްޗަށް ވެސް އަލިއަޅުއްވާލެއްވި އެވެ.
ކޮވިޑް-19 އާ ގުޅިގެން ރާއްޖޭގެ އިގްތިސާދުގެ 75 އިންސައްތަ ހިއްސާކުރާ ފަތުރުވެރިކަމުގެ ދާއިރާ ވަނީ ހުއްޓުމަކަށް އައިސްފަ އެވެ. މިކަމުގެ ސަބަބުން އިގްތިސާދަށް އެތައް ނޭދެވޭ އަސަރެއްކޮށް، ގިނަ ބައެއްގެ ވަޒީފާ މިހާރު ވަނީ ގެއްލިފަ އެވެ. މިގެއްލުންތައް ކުޑަ ކުރުމަށް ދިވެހި ސަރުކާރުން ދަނީ ގިނަ މަސައްކަތްތަކެއް ވެސް ކުރަމުންނެވެ.
ކޮވިޑް-19 އާ ގުޅިގެން މިހާރު ވެސް ބޭރުގެ ގިނަ ގައުމުތަކުން ދަނީ ރާއްޖެއަށް އެކި ގޮތްގޮތުން އެހީތެރިކަން ފޯރުކޮށްދެމުންނެވެ.
