ހައްދު ޖެހުމުގެ އަދަބު ނުދޭގޮތައް ސައުދީ ސަރުކާރުން ނިންމައިފި
20 މެއި 2020 | ބުދަ 20:13ހައްދު ޖެހުމުގެ ބަދަލުގައި ޖަލަށް ޙުކުމް ކުރުން ނުވަތަ ޖޫރިމަނާ ކުރެވިދާނެކަމަށް ނިންމާފައިވޭ
ސައުދީން ހައްދުގެ އަދަބު ދިނުން ހުއްޓާލުން:އިންސާނީ ޙައްޤުތަކުގެ ދާއިރާއިން އެޅި މުހިންމު ފިޔަވަޅެއް
ތަޢުޒީރު ކުރުމުގެ އަދަބު ނުވަތަ ހައްދު ޖެހުން ޢަދަބެއްގެ ގޮތުގައި ދިނުން ހުއްޓާލަން ސަޢުދީ ސަރުކާރުން ނިންމައިފި އެވެ.
ސަޢުދީ ސަރުކާރުގެ މި ނިންމުން އެޤައުމުގެ ޢަދުލު އިންސާފާ ބެހޭ ވުޒާރާއިން ރަސްމީކޮށް އިޢުލާނު ކުރީ އަންގާރަ ދުވަހުގެ ވަގުތެއްގަ އެވެ. މިކަން ހާމަކުރައްވާ އެ ވުޒާރާއިން ޢާންމު ކުރެއްވި ބަޔާނުގައި ވަނީ ހައްދު ޖެހުމުގެ ޢަދަބުގެ ބަދަލުގައި ޖަލަށް ޙުކުމް ކުރުމާއެކު ޖޫރިމަނާ ކުރެވިދާނެ ކަމަށެވެ. އަދި މި ދެ ޢަދަބު ވަކި ވަކިންވެސް ދެވިދާނެ ކަަމަށެވެ.
އަދި ހައްދުގެ ޢަދަބު ދޭންޖެހޭ ކުށްތަކަށް ބަދަލުގައި އެހެން އަދަބެއް ކަނޑައަޅާއިރު، އެކުރި ކުށަކަށް ރިޢާޔަތްކޮށް، ހައްޤު އަދަބު ދޭން ކޯޓުތަކުން ޙިކުމަތްތެރިކަމާއި އިންސާފުވެރިކަމާއެކު ޝަރީޢަތް ނިންމަން ޖެހޭނަކަމަށް ބަޔާނުގައި ވެއެވެ. އެ ވުޒާރާގެ ޓްވިޓަރގައިވެސް މިކަން ވަނީ ރަސްމީ ކޮށް އިޢުލާނު ކުރައްވާފަ އެވެ.
ސަޢުދީ ޢަރަބިއްޔާގެ ޢަދުލު އިންސާފާ ބެހޭ ވަޒީރު ވަލީދު އަލް-ސަމާނީ ވިދާޅުވީ ސަރުކާރުގެ މި ނިންމުން، ކަމާއި ގުޅުން ހުރި ހުރިހައި އިދާރާއަކަށް ސަރކިއުލަރ އަކުން އަންގަވާފައި ވާނެކަމަށެވެ. އަދި ވިދާޅުވީ، ހައްދު ޖެހުން ޤާނޫނީ ގޮތުން މަނާ ކުރި ނަމަވެސް ކީރިތި ޤުރުއާނާއި ރަސޫލާގެ ޙަދީޘާއި އިސްލާމީ ޝަރުޢީ ޤާނޫނުތަކުގައި 'ހައްދު ގެ އަދަބު' ދޭން ކަނޑައަޅާފައިވާ ކުށްތައް މީގެއިން އިސްތިޘްނާވާނެ ކަމަށެވެ.
ސަޢުދީ ސަރުކާރުގެ މި ނިންމެވުމަށް އެޤައުމުގެ ހިއުމަން ރައިޓްސް ކޮމިޝަނުން ވަނީ މަރުޙަބާ ކިޔާފަ އެވެ. މިއީ ރަސްގެފާނު ސަލްމާން ބިން ޢަބްދުލް-ޢަޒީޒާއި ވަލީ އަޙުދު މުޙައްމަދު ބިން ސަލްމާނުގެ ޙިކުމަތްތެރި ސިޔާސަތުގެ ދަށުން އިންސާނީ ޙައްޤުތަކުގެ ދާއިރާއިން އެޅުއްވި އިޞްލާޙީ ވަރަށް މުހިންމު ފިޔަވަޅެއްގެ ގޮތުގައި އެކޮމިޝަނުން ބަޔާންކޮށްފައި ވެއެވެ.
އެ ކޮމިޝަނުގެ ރައީސް، އައްވާދު އަލް-އައްވާދު ވިދާޅުވެފައި ވަނީ، މިއީ ސަޢުދީ ޢަރަބިއްޔާގެ އިންސާނީ ޙައްޤުތަކުގެ އެޖެންޑާއަށް ލިބިގެން ދިޔަ ވަރަށް ބޮޑު ކުރިއެރުމެއް ކަމަށެވެ. އަދި މިއީ އެޤައުމުގެ ރަސްކަމުގެ ދަރުބާރުން ރައްޔިތުންނަށް ފާގަތި ދުޅަހެޔޮ ޙަޔާތެއް ބިނާކޮށް ދިނުމަށް ކުރަމުންދާ މަސައްކަތުގެ ތެރެއިން، ގިނަ ބަޔަކަށް މީގެ މަންފާ ސީދާގޮތުންނާއި، ނުސީދާގޮތުން ލިބޭނެ ފިޔަވަޅެއްގެ ގޮތުގައި ސިފަކުރެއްވި އެވެ.
ސަޢުދީ ސަރުކާރުން އެޤައުމުގެ އިންސާނީ ޙައްޤުތަކުގެ ޙާލަތު ރަނގަޅުކޮށް، ބައިނަލްއަޤުވާމީ މައިދާނުގައި މިދާއިރާއިން ކުރިއެރުން ހޯދަން މަސައްކަތްކުރަމުން ދާއިރު، ފާއިތުވި ފަސް އަހަރު ދުވަހުގެ ތެރޭގައި ރަސްގެފާނު ސަލްމާން ޢަބްދުލް ޢަޒީޒު ވަނީ، އިންސާނީ ޙައްޤުތަކުގެ ދާއިރާއިން 70 އިޞްލާޙެއް ގެންނަވާފަ އެވެ. މީގެ ތެރޭގައި އެ ޤައުމުގެ ޤާނޫނުލް އުޤޫބާތު އިޞްލާޙު ކުރެއްވުމާއި، ހަރުކަށި އަދަބުތައް ލުއި ކުރެއްވުމާއި، އިންސާނީ ޙައްޤުތަކުގެ ނަޒަރިއްޔާތުން ބަލާއިރު، އިންސާނީ ކަރާމާތް ގެއްލޭގޮތައް ހުރި އެޤައުމުގައި ޢަމަލު ކުރަމުން އައި ޤާނޫނުތައް އިޞްލާޙު ކުރެއްވުމުގެ މަސައްކަތް ހިމެނެ އެވެ.
ސަޢުދީ ސަރުކާރުން ހައްދު ޖެހުމުގެ ޙުކުމް ތަންފީޒު ކުރުން ހުއްޓާލިކަން އިޢުލާނުކޮށްފައި މިވަނީ އެޤައުމުގައި އުމުރުން އަށާރަ އަހަރުން ދަށުގެ ކުދިންނަށް މަރުގެ އަދަބު ދިނުން ހުއްޓާލިތާ ހަފުތާއެއް ފަހުންނެވެ.
