ސްޓްރޯބެރީ ނަޓެއްލާ ޕިއްޒާ

ޕިއްޒާއޭ ބުނުމުން ކޮބާހޭ ކިޔައި ބަދިގެޔަށް ދިޔުމަށް އަވަސްް ވެގަންނަ އަދި އެންމެ ފަހު ފޮއްޗަށް ހިފާ ކުދިންނަށް މި ޑިޒާޓް ޕިއްޒާ ހަމަ ގައިމުވެސް ވަރަށް ކަމުދާނެ އެވެ.

އެންމެ ފުރަތަމަ ފުށްގަނޑު ތައްޔާރު ކޮށްލުމަށް، ހަކުރު، ޔީސްޓު އަދި ފެންފޮދު ތައްޓެއްގައި އެއްކޮށްލާފައި 10 މިނެޓު ބަހައްޓާލާށެވެ.

އެއަށްފަހު ލޮނާއި ތެޔޮ އަޅާފައި ފުށް އަޅަމުން، އެއްކުރަމުން ދާށެވެ.

ފުށްގަނޑު މާ ދިޔާ ވެއްޖެނަމަ ފުށް އިތުރަށް އަޅައި، މޮޑެލާށެވެ.

ދެން 'ސްމޫތު' ވަންދެން ފުށްގަނޑު މޮޑެލާފައި، 5 މިނެޓް ވަންދެން ބަހައްޓާލާށެވެ.

އެއަށްފަހު ބޭނުންވާ ބޯ މިނަަކަށް ދަމާލާފައި، ޓްރޭއެއްގައި އަތުރާލާފއި 8 ވަރަކަށް މިނެޓް 180 ޑިގްރީ ސެލްސިއަސްގައި ފިހެލާށެވެ.

ޕިއްޒާ ފިހެވުމުން އޭގެ މައްޗަށް ބޭނުންވާ ވަރަކަށް ނަޓެއްލާ އަޅާށެވެ. އޭގެ ފަހުން ސްޓްރޯބެރީ އަދި ދޮންކެޔޮ ތުނިކޮށް ކޮށާފައި ޕިއްޒާ މަތީގައި އަތުރާލާށެވެ.

އަތުރާލުމަށް ފަހު، މައްޗަށް ވައިޓް ޗޮކްލެޓް ޗިޕްސް އަޅާފައި ބޭނުންވާ ސައިޒަކަށް ޕިއްޒާ ކަފާލާށެވެ.

މި ޕިއްޒާއަށް އިތުރު ކްރަންޗެއް ގެންނަން ބޭނުމިއްޔާ ތުނިކޮށް ކޮށާފައި ހުރި އަލްމަންޑު ވެސް މައްޗަށް އެޅިދާނެ އެވެ.