ގޯއާގެ ކަރަންޓީނު ފެސިލިޓީސްގެ ހާލަތު ފެނި ޕޫޖާ ރުޅިގަދަވެއްޖެ
ރޫމްތަކަށް ވަރަށް ބޮޑަށް ވަނީ ފާޑުކިޔާފައި
ޕޫޖާ ބޭދީ ގޯއާ އަށް ގޮސްފައިވަނީ އޭނާގެ ލޯބިވެރިޔާއާ އެކު
އިންޑިއާގެ ގޯއާގެ ކަރަންޓީނު ފެސީލީޓީސް ތަކުގެ ސާފުތާހިރުކަން ކުޑަވެގެން ބޮލީވުޑްގެ އެކްޓަރ ޕޫޖާ ބޭދީ ފާޑުކިޔައިފި އެވެ.
އިންޑިއާ ލޮކްޑައުން ކޮށްފައިވާ މި ދަނޑިވަޅުގައި ޕޫޖާ ވަނީ އޭނާގެ ލޯބިވެރިޔާ މަނެކް ކޮންޓްރެކްޓަރ އާއި އެކު ގޯއާގައި ހުންނަ އޭނާގެ ގެއަށް ގޮސްފަ އެވެ. ޕޫޖާ ވަނީ ޓްވިޓަރ މެދުވެރިކޮށް ގޯއާގެ ބޯޑަރ ކޮންޓްރޯލް އާއި، ކޮވިޑް-19 ޓެސްޓިންގެ އިތުރުން ގޯއާގެ ކަރަންޓީނު ފެސިލިޓީސް ގެ ހާލަތު ހިއްސާކޮށްފަ އެވެ.
ގޯއާގެ ކަރަންޓީނު ފެސިލިޓީއެއްގައި ޕޫޖާ ވަނީ އެއްރޭ ހޭދަކޮށްފަ އެވެ. އޭނާގެ އޮފިޝަލް ޓްވިޓަރ އެކައުންޓުގައި ހިއްސާކޮށްފައިވާ ވީޑިއޯގެ ކެޕްޝަންގައި ޕޫޖާ ލިޔެފައިވަނީ، ކަރަންޓީނު ފެސިލިޓީސްގެ ރޫމްތައް އެއްވެސް ވަރަކަށް ސެނެޓައިޒްވެސް ކޮށްފައިނުވާ ކަމަށެވެ.
ކޮވިޑް-19 ނުޖެހޭ މީހާވެސް އެ ރޫމްތަކުން ބަލި ޖެހިދާނެ ކަމަށް ޕޫޖާގެ ޓްވީޓްގައި ބުންޏެވެ. ޕޫޖާ ބުނީ، ކަރަންޓީނުވީ ކޮޓަރިއަށް ފައިސާ ދައްކައިގެން ކަމަށެވެ.
