ދުބާއީގެ ކްލާސް ރޫމްތަކުގައި ވަރަށް އަވަހަށް ރޮބޮޓްތައް ފެނިގެންދާނެ

ދުބާއީ ކުލާސް ރޫމްތަކުގައި ރޮބޮޓްތައް ވަރަށް އަވަހަށް ފެނިގެންދާނެ ކަމަށް ބައެއް ނޫސްތައް ބުނެފިއެވެ.

މިއަހަރު އޮކްޓޯބަރ މަހުގެ ތިން ވަނަ ދުވަހު ބާއްވަން ހަމަޖެހިފައިވާ ފަސް ވަނަ އަރަބް ރޮބޮޓިކްސް ކޮންފަރެންސް އަށްފަހު "ޓީޗިންގ އެސިސްޓަންޓް" ރޮބޮޓްސްތައް ބައެއް ސްކޫލްތަކަށް ފޯރުކޮށްދެވިގެންދާނެ ކަމަށް ބައެއް ރިޕޯޓްތައް ބުނެއެވެ.

ޓެކްނޮލޮޖީ ބޭސްޑް ލާނިންގ ސޮލިއުޝަންސް ކުންފުންޏެއް ކަމަށްވާ އެޓްލެބްގެ ޑައިރެކްޓަރ ސެންތިލް މުރުގަން ވިދާޅުވީ ރޮބޮޓްތަކުގެ ސަބަބުން ޒުވާން އުމުރު ފުރައިގެ ކުދިންނަށް މަޖާ މަހައުލެއްގައި ކިޔެވުމުގެ ފުރުސަތު ހުޅުވާލެވިގެންދާނެ ކަމަށެވެ.

ސެންތިލް ވިދާޅުވީ ޕްރޮފައިލް ހެދުމަށްފަހު ރޮބޮޓްއަށް ލޯޑްކޮށްދިނުމުން އޭތި އަމިއްލައަށް މީހާގެ ތަފްސީލް ރަޖިސްޓްރީ ކުރާނެ ކަމަށާއި އެއަށް ފަހު ޓީޗަރު ކުދިން ކުރަންޖެހޭ މަސައްކަތްތައް ހަވާލުކުރުމުން ރޮބޮޓް ކުދިންނަށް އެ މަސައްކަތްތައް ކުރުމުގައި އެހީ ވެދޭނެ ކަމަށެވެ.

އެޓްލެބް ކުންފުންޏާއި ދުބާއީގެ އެޑިއުކޭޝަން މިނިސްޓްރީ އާއި އަބޫ ދާބީގެ އެޑިއުކޭޝަން ކައުންސިލުން އަންނަނީ ފާއިތުވި ފަސް އަހަރުން ފެށިގެން ސުކޫލް ޕްރޮގްރާމްގެ ހިއްސާއެއް ގޮތަށް ރޮބޮޓްތައް ހިމެނުމަށް މަސައްކަތް ކުރަމުންނެވެ.