އައު ކޮމިޝަނަރ ޖެނެރަލަށް ޑިރެކްޓަރުންގެ ބޯޑުގެ މެމްބަރުންގެ މުސާރަ ދިނުމަށް ނުފެންނަ ކަމަށް ނިންމައިފި
އެކޮމިޓީން އެގޮތަށް ނިންމީ ޓެކްސް ނެގުމާބެހޭ އިދާރީ ޤަނޫނަށް ގެނެވުނު އިސްލާހަށް 2019 ވަނަ އަހަރުގެ ސެޕްޓެމްބަރ މަހުގެ 12 ވަނަ ދުވަހު އަމަލު ކުރަން ފެށުމާ ގުޅިގެން
މީރާ
ޓެކްސް ނެގުމާއި ބެހޭ އިދާރީ ޤާނޫނަށް ގެނެވުނު 2 ވަނަ އިސްލާހަށް އަމަލުކުރަން ފެށުމުން އަލަށް އެކުލަވާލެވުނު މީރާގެ ބޯޑުގައި ކޮމިޝަނަރ ޖެނެރަލް އޮފް ޓެކްސޭޝަން ހިމެނި ވަޑައިގަންނަވަނީ އެ ޤާނޫނުގައި ބަޔާންކޮށްފައިވާ ގޮތަށް ވޯޓު ނުދެވޭ ގޮތުގައި މެމްބަރެއްގެ ގޮތުގައި މަގާމުގެ ހައިސިއްޔަތުން ކަަމަށްވާތީ އާ ކޮމިޝަނަރ ޖެނެރަލަށް ޑިރެކްޓަރުންގެ ބޯޑުގެ މެމްބަރުންގެ މުސާރަ ދޭން ނުފެންނަކަމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމައިފި އެވެ.
އެކޮމިޓީން އެގޮތަށް ނިންމީ ޓެކްސް ނެގުމާބެހޭ އިދާރީ ޤަނޫނަށް ގެނެވުނު އިސްލާހަށް 2019 ވަނަ އަހަރުގެ ސެޕްޓެމްބަރ މަހުގެ 12 ވަނަ ދުވަހު އަމަލު ކުރަން ފެށުމާ ގުޅިގެން މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ބޯޑުގެ މެމްބަރުންގެ މުސާރަ ދިނުމުގައި އަމަލުކުރާނެ އުސޫލަކާއި ގުޅޭގޮތުން ލަފައަކަށް އެދި މީރާއިން ހުށަހަޅާފައިވާ މައްސަލައާ މެދު ކޮމިޓީން މަޝްވަރާ ކުރުމަށްފަހު ކޮމިޓީގެ މެމްބަރުންގެ އަޣްލަބިއްޔަތުންނެވެ.
ދެން ކޮމިޓީން ނިންމާފައިވަނީ ދައުލަތުގެ މާލިއްޔަތުގެ ކަންކަން ބެލެހެއްޓުމުގެ މަސްއޫލިއްޔަތު ހަވާލުކޮށްފައިވާ ވުޒާރާގައި ޓެކުހާ ބެހޭ ސިޔާސަތުތަކާ ގުޅޭ ކަންކަން ބެލެހެއްޓުމަށް މިނިސްޓަރ ކަނޑައަޅުއްވާ ފަރާތެއްގެ ގޮތުން ބޯޑުގެ ޗެއަރ ޕާސަންގެ ގޮތުގައި އައްޔަނުކުރުމާއެކު މިހާރުގެ ޗެއަރޕާސަނަށް ޑިރެކްޓަރުންގެ ބޯޑުގެ ޗެއަރޕާސަން މުސާރަ ދިނުމަށް ފެންނަ ކަމަށެވެ.
އޭގެ އިތުރުން، ދައުލަތުގެ މާލިއްޔަތުގެ ކަންކަން ބެލެހެއްޓުމުގެ މަސްއޫލިއްޔަތު ހަވާލުކޮށްފައިވާ ވުޒާރާގައި ޓެކުހާ ބެހޭ ސިޔާސަތުތަކާއި ގުޅޭ ކަންކަން ބެލެހެއްޓުމަށް ފިނޭންސް މިނިސްޓަރ ކަނޑައަޅުއްވާ ފަރާތެއްގެ ގޮތުން ބޯޑުގެ ޗެއަރޕާސަންގެ ގޮތުގައި އައްޔަނުކުރުމާއެކު އެތާރީޚުން ފެށިގެން ކުރީގެ ކޮމިޝަނަރ ޖެނެރަލަށް ޑިރެކްޓަރުންގެ ބޯޑުގެ މެމްބަރުންގެ މުސާރަ ދިނުމަށް ނުފެންނަ ކަމަށްވެސް ކޮމިޓީން ވަނީ ނިންމާފަ އެވެ.
ކޮމިޓީ ރިޕޯޓްގައި ބުނެފައިވަނީ 2015 ވަނަ އަހަރު މީރާގެ ޑިރެކްޓަރުންގެ ބޯޑުގައި ހިމެނޭ 5 މެންބަރެއްގެ މަޤާމުގެ މުއްދަތު 2 އޮގަސްޓު 2015 ގައި ހަމަވުމާ ގުޅިގެން، 10 އޮގަސްޓު 2015 ވަނަ ދުވަހު ޢައްޔަން ކުރައްވާފައިވާ އާބޯޑުގެ މެންބަރުންނާއެކު ބޭއްވި ޑިރެކްޓަރުންގެ ބޯޑުގެ ބައްދަލުވުމުގައި، ބޯޑުގެ ޗެއަރޕަރސަން ކަމަށް ކޮމިޝަނަރ ޖެނެރަލް އޮފް ޓެކްސޭޝަން ޔަޒީދު މުޙައްމަދު އަދި ޑެޕިއުޓީ ޗެއަރޕަރސަން ކަމަށް ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން ހަސަން ޒަރީރު ބޯޑުގެ މެންބަރުންގެ އަޢްލަބިއްޔަތުން ޢައްޔަންކުރެއްވުމާ އެބޯޑުގެ ޗެއަރޕަރސަންއަށް އަދި ވައިސް ޗެއަރޕަރސަން އަށްދެއްވަމުން ގެންދަވާ މުސާރަ އެފަރާތްތަކަށް ދިނުމާ މެދު މާލިއްޔަތު ކޮމިޓީގެ ލަފައަކަށް ފޮނުއްވާފައިވާ ކަމަށެވެ.
ޑިރެކްޓަރުންގެ ބޯޑުގައި މަޤާމުގެ ހައިޞިއްޔަތުން ހިމެނިވަޑައިގަންނަވާ މެންބަރުންނަށް އެބޭފުޅުންނަށް ކަނޑައެޅިފައިވާ މުސާރައާއި ޢިނާޔަތްތައް ފިޔަވައި އެހެން އެލަވަންސެއް ލިބިދިނުމަށް ނުފެންނަކަމަށް 18 ވަނަ މަޖިލީހުގެ މާލިއްޔަތު ކޮމިޓީގެ ބައެއް މެންބަރުން ފާހަގަ ކުރެއްވިނަމަވެސް، ޑިރެކްޓަރުންގެ ބޯޑުގައި މަޤާމުގެ ހައިސިއްޔަތުން ހިމެނިވަޑައިގަންނަވާ ބޭފުޅުންނަށް، އެބޭފުޅުންގެ މުސާރަ އާއި ޢިނާޔަތްތަކުގެ އިތުރުން އެލަވަންސް ލިބިވަޑައިގަންނަވާ ކަމަށްވެސް 18 ވަނަ މަޖިލީހުގެ މާލިއްޔަތު ކޮމިޓީގެ ބައެއް މެންބަރުން ފާހަގަކުރެއްވިކަން ޔައުމިއްޔާއިން އެގެން އޮތްކަމަށެވެ.
މީރާގެ ކޮމިޝަނަރ ޖެނެރަލް އޮފް ޓެކްސޭޝަން އަދި ޑެޕިއުޓީކޮމިޝަނަރ ޖެނެރަލް އޮފް ޓެކްސޭޝަން، މީރާ ގެ ބޯޑުގައި ހިމެނި ވަޑައިގަންނަވަނީ މަޤާމުގެ ހައިޞިއްޔަތުން ކަމުގައި ވީނަމަވެސް، އަލުން އެ ބޯޑު އެކުލަވާ ލެއްވިއިރު، ކޮމިޝަނަރ ޖެނެރަލް އޮފް ޓެކްސޭޝަން އެ ބޯޑުގެ ޗެއަރޕަރސަން ކަމަށް އަދި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން އެ ބޯޑުގެ ވައިސް ޗެއަރޕަރސަން ކަމަށް ޢައްޔަނު ކުރައްވާފައިވާތީ، ރައްޔިތުންގެ މަޖިލީހުން ފާސްކުރައްވާފައިވާ މުސާރައިގެ އޮނިގަނޑުގައި މީރާގެ ޑިރެކްޓަރުންގެ ބޯޑުގެ ޗެއަރޕަރސަން އަދި ވައިސް ޗެއަރޕަރސަން ކަނޑައަޅުއްވާފައިވާ މުސާރަ އޮތޯރިޓީގެ ޑިރެކްޓަރުންގެ ބޯޑަށް 2015 ވަނަ އަހަރު ޢައްޔަންކުރެވުނު ޗެއަރޕަރސަންއާއި ޑެޕިއުޓީ ޗެއަރޕަރސަން އަށް ދެއްވަމުން ގެންދެވުމަށް ނިންމަވާފައިވާ ކަމަށެވެ.
މި ނިންމުމާ ގުޅިގެން، ކޮމިޝަނަރ ޖެނެރަލް އޮފް ޓެކްސޭޝަން ޑިރެކްޓަރުންގެ ބޯޑުގެ ޗެއަރޕަރސަންގެ މުސާރަ އަދި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން ވައިސް ޗެއަރޕަރސަންގެ މުސާރަ ނެންގެވުމަށް ހަމަޖެހި، ބޯޑުގައި ހިމެނިވަޑައިގަންނަވާ ނޮން އެގްޒެކެޓިވް 5 މެންބަރުންނަށް، ބޯޑުގެ މެންބަރުންގެ މުސާރަ ހަމަޖެހި، އޭރުގެ މީރާ ބޯޑުގެ 7 މެންބަރުންނަށް މުސާރަ ހަމަޖެހިގެން ގޮސްފައިވާކަމަށް ކޮމިޓީ ރިޕޯޓްގައި ވަނީ ފާހަގަކޮށްފަ އެވެ.
މިހާރު މީރާގެ ޑިރެކްޓަރުންގެ ބޯޑުގެ ޗެއަރ ޕާސަން އަށް މަހަކު 17،000 ރުފިޔާ، ޑިރެކްޓަރުންގެ ބޯޑުގެ ޑެޕިއުޓީ ޗެއަރ ޕާސަން އަށް މަހަކު 16،000 ރުފިޔާ ލިބިވަޑައިގަންނަވަ އެވެ. އަދި ޑިރެކްޓަރުންގެ ބޯޑުގެ މެމްބަރުންނަށް 15،000 ރުފިޔާ ލިބިވަޑައިގަންނަވަ އެވެ.
