ސްޓެލްކޯ އެމްޑީގެ މުސާރަ ސިއްރެއް ނުކުރެވޭނެ
19 މެއި 2020 | އަންގާރަ 12:05އަމިއްލަ އިސްނެގުމަށް ހަމާކުރަން ޖެހޭ މައުލޫމާތެއް
އިންފޮމޭޝަން ކޮމިޝަނަރު ހުސޭން ފިޔާޒް މޫސާ: މައުލޫމާތު ހާމަކުރުމަށް ބާރުއަޅަމުންދޭ
ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ މެނޭޖިން ޑިރެކްޓަރުގެ މުސާރައަކީ ސިއްރެއެއް ނޫން ކަމަށާއި، އެއީ އަމިއްލަ އަމިއްލަ އިސްނެގުނެގުމަށް ހާމަކުރަންޖެހޭ މައުލޫމާތެއް ކަމަށް އިންފޮމޭޝަން ކޮމިޝަނަރުގެ އޮފީސް (އައިކޮމް) އިން ބުނެފި އެވެ.
އަންގާރަ ދުވަހު އައިކޮމުން ނެރެފައިވާ ބަޔާނެއްގައި ބުނީ، ދައުލަތުގެ މަސްއޫލިއްޔަތެއް އަދާކުރާ އެއްވެސް އިދާރާއެއްގެ މުވައްޒަފެއްގެ މުސާރަ އާއި އިނާޔަތަކީ ރައްޔިތުންނަށް ސިއްރުވާން ޖެހޭ މައުލޫމާތެއް ނޫން ކަަމަށެވެ.
އަދި އެއީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން، މުއައްސަސާގެ އަމިއްލަ އިސްނެގުމަށް ހާމަކުރަންޖެހޭ މައުލޫމަތެއް ކަމަށެވެ.
ސްޓެލްކޯގެ އެމްޑީގެ މުސާރަ ބަޔާންކޮށް ރައްޔިތުންގެ މަޖިލީހަށް ފޮނުވި ސިޓީއެއް ސޯޝަލް މީޑިއާގައި އާންމުވުމުން އެ ސަބަބު ހޯދަން އެ ކުންފުނިން ވަނީ މަޖިލީހަށް ސިޓީއެއް ފޮނުވާފައެވެ. ލީކްވި ސިޓީގައި ބުނާ ގޮތުން އެ ކުންފުނީގެ އެމްޑީ ހުސައިން މުއުނީއަށް މުސާރާއައި އިނާޔަތްތަކާއި އެކު މަހަކު 98،000 ރުފިޔާ ލިބެ އެވެ.
ސިޓީ ލީކުވާން ޖެހުނު ސަބަބު ހޯދުމަށް ސްޓެލްކޯއިން މަސައްކަތް ކުރުމަކީ އިންތިހާއަށް ކަންބޮޑުވާ ކަމެއްގެ ގޮތުގައި އައިކޮމް އިން ވަނީ ފާހަގަކޮށްފަ އެވެ.
ހާމަކަން ބޮޑު ހިންގުމުގެ ނިޒާމެއް ގާއިމުކޮށް، އެ ސަގާފަތަށް އަހުލުވެރިވުމަކީ ފަސާދަ މަދުވެ ދައުލަތާއި މެދު ރައްޔިތުންގެ އިތުބާރު ބޮޑުވާނެ ކަމެއް ކަމަށާއި، އަދި އިދާރާތަކުގެ ތަސައްވުރު ރަނގަޅުވެގެންދާނެ ކަމެއް ކަމަށް އައިކޮމް އޮފީހުން ނެރުނު ބަޔާނުގައި ވަނީ ބުނެފައެވެ. އެ މަގަށް ކުންފުނިތަކާއި ދައުލަތުގެ އެންމެހާ އިދާރާތަކުން މަސައްކަތް ކުރުމަށް ވެސް ބަޔާނުގައި ވަނީ ހަނދާން ކޮށްދީފައެވެ.
ސްޓެލްކޯގެ އެމްޑީގެ މުސާރައާ ގުޅޭ ގޮތުން އެކުންފުނިން ބުނެފައިވަނީ މުސާރައާއި އިނާޔަތްތައް ކަނޑައަޅަނީ ފިނޭންސް މިނިސްޓްރީން ކަމަށެވެ.
