އެމްޑީގެ މުސާރަ ކަނޑައަޅަނީ ފިނޭންސް މިނިސްޓްރީން: ސްޓެލްކޯ
19 މެއި 2020 | އަންގާރަ 10:24މިސަރުކާރުގައި ކުންފުނިތަކުގެ ހިންގުން އިތުރަށް ހަރުދަނާ ކުރެވިފައިވޭ
ސްޓެލްކޯގެ މެނޭޖިންގ ޑިރެކްޓަރުގެ މަގާމުގައި ހުންނެވި ހަސަން މުގުނީ
ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) މެނޭޖިންގ ޑިރެކްޓަރުގެ މުސާރައާއި އިނާޔަތްތައް ކަނޑައަޅަނީ ފިނޭންސް މިނިސްޓްރީން ކަމަށް އެކުންފުނިން ބުނެފިއެވެ.
އެ ކުންފުނީގެ މެނޭޖިން ޑިރެކްޓަރުގެ މުސާރައާއި އިނާއަތްތަކާއި ބެހޭގޮތުން އެކި ގޮތްގޮތަށް ބައެއް ނޫސްތަކާއި އަދި ސޯޝަލް މީޑިއާގައި ފަތުރަމުންދާ ވާހަކަތަކާ ގުޅިގެން ސްޓެލްކޯއިން ނެރުނު ބަޔާނުގައި ބުނީ އެމްޑީގެ މުސާރައިގެ ޙަޤީޤަތް ދިވެހި ރައްޔިތުންނަށް ސާފުވެފައި އޮންނަން ޖެހޭ ކަމަށެވެ.
ސްޓެލްކޯއިން ބުނީ މި ސަރުކާރު އައުމުގެ ކުރިން ކުންފުނީގެ މެނޭޖިންގ ޑިރެކްޓަރުންގެ މުސާރަތައް ކަނޑައަޅަމުން އައީ ކުންފުނީގެ ޑިރެކްޓަރުންގެ ބޯޑުން ކަމަށެވެ. ނަމަވެސް މި ސަރުކާރު އައުމަށް ފަހު ކުންފުނިތަކުގެ ހިންގުން އިތުރަށް ހަރުދަނާކޮށް ކުންފުނިތަކާމެދު ރައްޔިތުންގެ އިތުބާރު ދެމެހެއްޓުމަށްޓަކައި އަޅާފައިވާ ފިޔަވަޅުތަކުގެ ތެރެއިން ސްޓެލްކޯގެ މެނޭޖިންގ ޑިރެކްޓަރު މުސާރަ ކަނޑައަޅާފައި ވަނީ ފިނޭންސް މިނިސްޓްރީން ކުންފުނިތައް ގިންތި ކޮށް، ކަނޑައަޅާފައިވާ ގޮތަށް ކަމަށް އެބަޔާނުގައި ވެއެވެ.
ސްޓެލްކޯއިން ބުނީ މުސާރައާއި އިނާއަތްތައް ބިނާވެގެން ދަނީ ސަރުކާރު ހިއްސާވާ ކުންފުނިތަކުގެ ޕަރފޮރމަންސް ލަނޑުދަނޑިތަކާއި އަދި ކީ ޕަރފޮމަންސް އިންޑިކޭޓަރސް (ކޭޕީއައި) ޙާޞިލު ކުރާ މިންވަރުގެ މައްޗަށް ކަމަށެވެ. އަދި ސްޓެލްކޯ ގިންތި ކޮށްފައި ވަނީ އޭ ކެޓަގަރީގައި ކަމަށް ވާއިރު، އެ މުސާރައާ އިނާޔަތްތަކަކީ އެ ކުންފުންޏާއި އެއް ގިންތިއެއްގައި ހިމެނޭ ހުރިހާ ކުންފުންޏެއްގެ ވެސް މެނޭޖިންގ ޑިރެކްޓަރަށް ދޭ ޢަދަދު ކަމަށް ސްޓެލްކޯއިން ބުނެއެވެ.
މީގެ އިތުރުން ސްޓެލްކޯއިން ބުނީ ކުރިޔާ ޚިލާފަށް ކުންފުނިން ހިންގަމުން ގެންދާ މަޝްރޫޢުތަކާއި، ކުރަމުން ގެންދާ މަސައްކަތްތައް ޢާންމުންނާއި ހަމަޔަށް މީޑިއާއާއި، ސޯޝަލް މީޑިއާގެ ވަޞީލަތްތައް މެދުވެރިކޮށް ގެނެސްދީ، ރައްޔިތުންނާއި ވީހާ ވެސް ގާތުން މަސައްކަތްކުރާ ކުންފުންޏަކަށް ބަދަލު ކުރެވިފައިވާ ކަމަށެވެ. އަދި ސްޓެލްކޯއިން ވަނީ ދައުލަތުގެ އެއްވެސް އިދާރާއަކަށް ނުވަތަ ޢާންމު ރައްޔިތުންނަށް ފޯރުކޮށްދޭން ޖެހޭ އެއްވެސް މަޢުލޫމާތެއް ކަނޑައެޅިފައިވާ އުޞޫލުތަކުގެ ތެރެއިން ޖެހިލުމެއް ނެތި އެންމެ ފުރިހަމަ ގޮތުގައި ފޯރުކޮށްދެމުންދާނެ ކަމުގެ ޔަޤީންކަން ކަސްޓަމަރުންނާއި، ދިވެހި ރައްޔިތުންނަށް އަރުވާފަ އެވެ.
ދިވެހި ރައްޔިތުންނަށް ފައިދާއާއި ލާބަ ހުރި ކޮންމެ ކަމެއްގައި ނަމޫނާ ދައްކާނެ ކުންފުންޏެއް ގޮތުގައި ދެމި އޮންނާނެ ކަމުގެ ޔަޤީންކަން ވެސް ސްޓެލްކޯގެ ބަޔާނުގައި ދީފައި ވެއެވެ.
