ކޮމިޝަންތަކުގެ ޒިންމާ އަދާ ނުކުރެވޭނަމަ، އެކަން ކުރެވޭ ބަޔަކާ ހަވާލު ކުރުމަށް ގޮވާލައްވައިފި

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު އުފައްދަވާފައިވާ ރިޔާސީ ކޮމިޝަންތައް ކަމަށްވާ، މަރާލާފައިވާ މީހުންނާއި ގެއްލިފައިވާ މީހުންގެ މައްސަލަތައް ތަހުޤީޤު ކުރާ ކޮމިޝަނާއި، އެސެޓް ރިކަވަރީ ކޮމިޝަނުން ބަލަމުންދާ މައްސަލަތައް ބެލުމުގައި ލަސްކަމެއް އުޅޭތީ އެކަމުގެ ކަންބޮޑުވުން ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު އަދި އެމްޑީޕީގެ ޗެއަރ ޕާސަން ޙަސަން ލަޠީފް ފާޅު ކުރައްވައިފި އެވެ.

އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި، ކޮވިޑް-19 އާ ގުޅިގެން ޤައުމީ ސަލާމަތަށް އިތުރު ނުރައްކަލެއް އޮތްތޯ ބެލުމަށާއި، ޓޫރިޒަމް ސިނާޢަތަށް ކޮށްފާނެ އަސަރު ދެނެގަތުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމެޓީން ދިރާސާކޮށް ނިންމިގޮތުގެ ރިޕޯޓަށް ބަހުޘް ކުރައްވަމުން ޙަސަން ލަޠީފް ވިދާޅުވީ، ކޮމެޓީގެ ރިޕޯޓުގެ 9 ހުށަހެޅުމަށް ތާޢީދު ކުރައްވާ ކަމަށެވެ. ވަކިން ޚާއްޞަކޮށް، ރިޕޯޓުގެ 4 ވަނަ ހުށަހެޅުން ޙަސަން ލަޠީފް ވަނީ ފާހަގަ ކުރައްވާފަ އެވެ.

ޙަސަން ލަޠީފް ވިދާޅުވީ، ކޮވިޑް-19 ގެ މި ޙާލަތުގައި ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ކަނޑައަޅާފައިވާ މިންގަޑުތަކާއެކު، އަދި "ނިއު ނޯމަލް" ގައިވެސް ކަންކަން ކުރާނެ އުޞޫލުތަކެއް ކަނޑައަޅައިގެން އެ ކޮމިޝަންތަކުން ބަލަމުންދާ މައްސަލަތައް ބަލަންޖެހޭ ކަމަށެވެ. އެގޮތުން، އެކޮމިޝަނުން ބަލަމުންދާ ޑރ. އަފްރާޝީމް ޢަލީ އާއި ރިޟްވާން ޢަބްދުﷲ އާއި ޔާމީން ރަޝީދު މައްސަލަތައް ބަލާ ނިންމުން އަވަސް ކުރަންޖެހޭ ކަމަށް ޙަސަން ލަޠީފް ވިދާޅުވި އެވެ. މީގެ އިތުރުން އެސެޓް ރިކަވަރީ ކޮމިޝަނުން ބަލަމުންދާ އެމްއެމްޕީއާރުސީގެ ބޮޑު ޚިޔާނާތުގެ މައްސަލަ ބަލާ ނިންމަން ޖެހޭކަމަށާއި، އެފައިސާ ދައުލަތަށް ހޯދަން ޖެހޭ ކަމަށްވެސް ޙަސަން ލަޠީފް ވިދާޅުވި އެވެ.

ޙަސަން ލަޠީފް ވިދާޅުވީ، މި ވާހަކަތައް ދައްކަމުން މިދަނީ ސަބަބެއް އޮވެގެން ކަމަށާއި، މިދިޔަ ރިޔާސީ އިންތިޚާބުގައްޔާއި އަދި މަޖިލިސް އިންތިޚާބުގައި ވެސް ރައްޔިތުން ނިކުމެ، އެމްޑީޕީއަށް ވޯޓު ދިނީ ރައްޔިތުންނަށް އިންސާފު ޤާއިމުކޮށްދޭނެ ކަމުގެ އުންމީދުގައި ކަމަށެވެ. އަދި އެ ވަޢުދުތަކުގެ ވާހަކަތާކާއެކު ރައްޔިތުންގެ ކައިރިއަށް ގޮސް އަދި ޕޯޑިއަމްތަކުގައި އެވާހަކަ ދެއްކީ އިޚުލާސްތެރިކަމާއެކުގަ ކަމަށެވެ.

ރިޔާސީ ކޮމިޝަނަށް އެމައްސަލަތައް ތަޙުޤީޤުކޮށް ނިންމާ ނުލެވި އުޅޭއިރު، މިހާރުވެސް ރާއްޖޭގައި ޓެރަރިޒަމާ ގުޅުންހުރި ކަންކަން ހިނގަމުންދާ ކަމަށް މެންބަރު ވިދާޅުވި އެވެ. އެގޮތުން، އދ. މަހިބަދޫ ބަނދަރުގައި އަޅާފައި އޮތް ހަތް އުޅަނދެއްގައި ރޯކޮށްލުމާއި، ހުޅުމާލެގައި ފަތުރުވެރިއަކާއި، ރާއްޖޭގައި މަސައްކަތް ކުރާ އޮސްޓްރޭލިއާ އަދި ޗައިނާގެ މީހަކަށް ވަޅިން ޙަމަލާދިން މައްސަލަ ޙަސަން ލަޠީފް ވަނީ ފާހަގަކުރައްވާފަ އެވެ.

ޓެރަރިސްޓް ޖަމާޢަތްތަކުގެ ޙަރަކާތްތަކާއި، ޓެރަރިސްޓް ޙަމަލާތަކާ ބެހޭ މަޢުލޫމާތު ހާމަ ކުރުމާއި، އެފަދަ މަޢުލޫމާތު ސަރުކާރުތަކަށް ފޯރުކޮށް ދިނުމުގެ މަޤުޞަދުގައި މަސައްކަތް ކުރާ, ސައިޓް އިންޓެލިޖެންސް ގްރޫޕުގައި ބުނެފައިވާގޮތުން، މަހިބަދޫ ބަނދަރުގައި އަޅާފައިވާ ލޯންޗުތަކަށް ދިން މި ޙަމަލާގެ ޒިންމާ އައިސިސް އިން ވަނީ ނަގާފަ އެވެ.

ހުޅުމާލޭގައި ބޭރު ތިން މީހަކަށް ވަޅިން ދިން ޙަމަލާއާ ގުޅިގެން ފުލުހުން ހައްޔަރުކުރި މީހުން ވަނީ އެމީހުންގެ މައްޗަށް ދަޢުވާ ނުކުރެވި، ދޫވެފަ އެވެ.

ޙަސަން ލަޠީފް ވިދާޅުވީ، ސަރުކާރުގެ ބައެއް އިދާރާތަކުގެ ވެބްސައިޓްތައް ހެކްކޮށް އިންޒާރު ދެމުން ދާއިރު، ސަރުކާރުގެ އިސް ބޭފުޅުންނާއި މަޖިލީހުގެ މެންބަރުން އަދި ބައެއް ވިޔަފާރިވެރިންގެ ވަޓްސް އެޕް އެކައުންޓުތައް ހެކް ކުރަމުން ދާއިރު، ދޭތެރެ ދޭތެރެއިން ޖަލުގައި ވެސް ހަމަ ނުޖެހުން އުފައްދަމުން އަންނަ ކަމަށެވެ.

މީގެއިތުރުން ޙަސަން ލަޠީފް ވިދާޅުވީ، 'ނިއު ނޯމަލް' ގެ ތެރޭގައި މަސައްކަތްތައް ބަލާނެ ގޮތްތަކެއް ފުލުހުން ކަނޑައަޅަންޖެހޭ ކަމަށެވެ. އަދި މައްސަލަތައް ފުލުސް އޮފީހަށް ވަންނަ ހިސާބުން، ދަޢުވާ އުފުލުމާ ހަމަޔަށް "ނިއު ނޯމަލް" ގައި ކަންކަން ކުރާނެ ގޮތުގެ ސްޓޭންޑަޑް އޮޕަރޭޓިންގ ޕްރޮސީޖަރއެއް އެބައޮންނަން ޖެހޭ ކަމަށާއި އަދި އެއަށް އަމަލު ކުރެވެންޖެހޭ ކަމަށްވެސް ޙަސަން ލަޠީފް ވިދާޅުވި އެވެ.

ޙަސަން ލަޠީފް ވިދާޅުވީ، މި ވާހަކަތައް ދައްކާނީ ވެސް އެމްޑީޕީން ކަމަށާއި، އަދި މިކަންކަން ސަރުކާރަށް ރަނގަޅުކޮށްދޭނީ ވެސް ހަމަ އެމްޑީޕީން ކަމަށެވެ. އަދި ރައްޔިތުންނަށްވީ ވަޢުދު ފުއްދޭނީ ވެސް އެމްޑީޕީއަށް ކަމަށް ޙަސަން ލަޠީފް ވިދާޅުވި އެވެ.