އެސޯސިއޭޝަންތަކާއެކު ވަޒީރު މަޝްވަރާ ކުރައްވައިފި

ކުޅިވަރުގެ ކަންކަން ހައްލު ކުރުމަށް ދިވެހިރާއްޖޭގެ ކުޅިވަރު އެސޯސިއޭޝަންތަކުގެ އިސްވެރިންނާއެކު ކުޅިވަރާ ބެހޭ ވަޒީރު އަހުމަދު މަހުލޫފް މަޝްވަރާ ކުރައްވައިފި އެވެ.

މިހާރު ފެތުރެމުންދާ ކޮރޯނާވައިރަސް (ކޮވިޑް-19) ރާއްޖެއިން ފެނުމާއެކު ކުޅުވަރާ ބެހޭ ވުޒާރާއިން ވަނީ އެ ވުޒާރާގެ ދަށުގައިވާ ހުރިހާ ކުޅިވަރު ކުޅެ ތަންތަނާއި މަރުކަޒުތައް މާޗު މަހުގެ 15 ވަނަދުވަހުން ފެށިގެން ބަންދު ކޮށްފައެވެ.

ކޮވިޑް-19 އާ ގުޅިގެން ގައުމީ ޓީމުތަކުގެ ފަރިތަކުރުންތައް ވެސް ހުއްޓާލާފައިވާއިރު، މީގެ ކުރިން ވަޒީރު ވަނީ ކުޅުންތެރިންގެ އެލަވަންސް އަކީ ކުޅުންތެރިންގެ ހާޒިރީ އާއި ފަރިތަކުރުންތައް ދާގޮތަށް ބެލުމަށް ފަހު ދެވޭ އެއްޗެއް ކަމުން، މި ދަނޑިވަޅުގައި ކުޅުންތެރިންގެ އެލަވަންސް ނުދޭކަން ހާމަކުރައްވާފައެވެ.

އަދި ކޮވިޑް-19 އާ ގުޅިގެން ރާއްޖޭގެ ކުޅިވަރު އެކެޑަމީތަކުން ވަނީ އެ އެކެޑަމީތަކުގެ ހަރަކާތްތައްވެސް ހުއްޓާލާފައެވެ. މީގެ ތެރެއިން ގިނަ އެކެޑަމީތަކުގެ ކޯޗުންނަކީ އެ އެކެޑަމީތަކުން ލިބޭމުސާރައަށް ބަރޯސާވާ ކޯޗުންނަށް ވާއިރު، މިފަދަ ދަނޑިވަޅެއްގައި އެ ކޯޗުންނަށް ގިނަ ގޮންޖެހުންތަކަކާއި ކުރިމަތިލާން ޖެހޭނެއެވެ.

މިކަމާ ގުޅިގެން މީގެ ކުރިން ކުޅިވަރު އެކި ތަޖުރިބާކާރުން ވަނީ ކުޅުންތެރިންނަށް އެލަވަންސް ދިނުމަށާއި، އެކެޑަމީތަކުގެ ކޯޗުންނަށް ހައްްލެއް ހޯދައިދިނުމަށް ގޮވާލާފައެވެ.

މިކަންކަމަށް ހައްލެއް ހޯދުމުގެ ގޮތުން ހޯމަ ދުވަހުގެރޭގެ ވަގުތެއްގައި ކުޅިވަރާ ބެހޭ ވަޒީރު އަހުމަދު މަހުލޫފް ވަނީ ރާއްޖޭގެ ގައުމީ ހުރިހާ ކުޅިވަރު އެސޯސިއޭޝަންތަކުގެ އިސްވެރިންނާ އެކު ވީޑިއޯކޮންފަރެންސް މެދުވެރިކޮށް ބައްދަލުކުރައްވާފައެެވެ.

އެ ބައްދަލުވުމާ ގުޅޭގޮތުން މަހުލޫފް ކުރެއްވި ޓްވީޓެއްގައި ވިދާޅުވީ، ކުޅިވަރު އެސޯސިއޭޝަންތަކާ އެކު ބޭއްވުނު ބައްދަލުވުމަކީ ވަރަށް ކާމިޔާބު ބައްދަލުވުމެއް ކަމަށާއި، ގައުމީ ޓީމުތަކުގެ ކުޅުންތެރިންނާއި، ކުޅިވަރު އެކެޑެމީތަކަށް އެލަވަންސްތައް ދިނުމާ ބެހޭ ގޮތުން މަޝްވަރާ ކުރެވުނު ކަމަށެވެ. އަދި ނިއު ނޯމަލްއާ އެކު ކުޅިވަރުތައް އަލުން ފަށާނެ އުސޫލުތަކެއް އެކުލަވާލުމަށްވެސް މި ބައްދަލުވުމުގައި މަޝްވަރާ ކުރެވުނު ކަމަށް މަހުލޫފް ވިދާޅުވި އެވެ.

ކޮވިޑް-19 އާ ގުޅިގެން ރާއްޖޭގައި ކުޅިވަރު ހަރަކާތްތައް ހުއްޓާލާފައިވާއިރު، ސެޕްޓެމްބަރު މަހު ފުޓްބޯޅަ އަލުން ފަށަން އަންނަނީ މަސައްކަތް ކުރަމުންނެވެ. އެގޮތުން ފުޓްބޯޅަ އަލުން ފެށުމަށްފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އަންނަނީ އުސޫލުތައް ކަނޑައެޅުމުގެ މަސައްކަތް ކުރަމުންނެވެ.

ކޮވިޑް-19 ރާއްޖޭގައި ހަލުވިކަމާއެކު ފެތުރެމުންދާއިރު، މިހާތަނަށް ރާއްޖެއިން މި ވައިރަހަށް 1106 މީހަކު ވަނީ ޕޮޒިޓިވް ވެފައެވެ. މި ވައިރަސް ޖެހިގެން ރާއްޖެއިން 4 މީހަކު މަރުވެފައިވާއިރު، 80 މީހަކު ވަނީ ވައިރަހުން ރަނގަޅު ވެފައެވެ.