މާލެ ސިޓީން ކޮވިޑް-19 ފެނުމާ ގުޅިގެން އަޅާފައިވާ ފިޔަވަޅުތަކަށް ބައެއް ލުއިތައް ދިނުމަށް ނިންމާފައިވާކަމުގެ އިޝާރަތެއް ހެލްތު މިނިސްޓަރު ޢަބްދުﷲ އަމީން ދެއްވައިފި އެވެ.
މާލެ ސިޓީން ކޮވިޑް-19ގެ ކޭސްއެއް ފެނުމާ ގުޅިގެން އޭޕްރީލް 15 ވަނަ ދުވަހުން ފެށިގެން ވަނީ މާލެ ސިޓީ ވަނީ ލޮކްޑައުން ކޮށްފަ އެވެ. އަދި ލޮކްޑައުން ހަމަވާނީ މިމަހުގެ 28ގެ ނިޔަލަށެވެ.
ދައުލަތުގެ މީޑިއާއަށް ދެއްވި އިންޓަވިއުއެއްގައި މިނިސްޓަރު އަމީން ވިދާޅުވީ ކޮވިޑް-19ން ކޮންޓްރޯލް ކުރުމަށް މާލެ ސިޓީގެ އިތުރުން އަތޮޅުތެރޭގެ ހުރިހާ ރަށެއްގައި ވެސް ވަރަށް ގިނަ ފިޔަވަޅުތަކެއް އަޅާފައިވާ ކަމަށެވެ. ނަމަވެސް މިހާރު މި ފިޔަވަޅުތަކަށް ލުއިތަކެއް ދޭންޖެހޭ ކަމަށް ޤަބޫލުކުރައްވާ ކަމަށް މިނިސްޓަރު އަމީން ވިދާޅުވި އެވެ.
މާލެ ސިޓީގެ ލޮކްޑައުން އަށް ލުޔެއް ދޭނެކަމުގެ އިޝާރާތެއް ދެއްވާ މިނިސްޓަރު އަމީން ވިދާޅުވީ ލޮކްޑައުންގައި އަބަދު ނުތިބެވޭނެ ކަމަށާއި، ލޮކްޑައުންއާ ގުޅިގެން ބައެއް ރައްޔިތުންނަށް ދަތި އެތައް އުދަނގޫކަމެއް އުފުލަން ޖެހިފައިވާ ކަމަށެވެ.
މާލެ ސިޓީގެ ޙާލަތަށް އަލިއަޅުއްވާލައްވާ މިނިސްޓަރު އަމީން ވިދާޅުވީ ލޮކްޑައުންގެ އިތުރުން ބައެއް ފިޔަވަޅުތަކަށް ލުއި ދޭނީ ކަންކަން ބޮއްސުން ލައިގެން ނުދާނެ ފަދަ ގޮތަކަށް ޚާއްޞަ ޕްލޭނެއްގެ ދަށުން ކަމަށެވެ.
އަތޮޅުތެރޭގެ ރަށްތަކަށް ދެވޭ ލުއި ތަކާ ބެހޭ ގޮތުން މިނިސްޓަރު އަމީން ވިދާޅުވީ ރައްކާތެރިކަމުގެ ފިޔަވަޅުތައް ކަށަވަރުކޮށްފައިވާ ރަށްރަށަށް ލުއިދޭން ޖެހޭ ކަމަށް ޤަބޫލުކުރައްވާ ކަމަށެވެ.
އެގޮތުން އެއްވެސް މީހަކު އަރާ ނުފައިބާތާ 30 ދުވަސް ނުވަތަ 15 ދުވަހަށްވުރެ ގިނަ ދުވަސްވެފައިވާ ރަށްރަށް އެބަހުރިކަމަށާ، އެރަށްރަށް ލުޔެއް ދޭންޖެހޭ ކަމަށް މިނިސްޓަރު އަމީން ވިދާޅުވިއެވެ. އަދި ވިދާޅުވީ ލުއިތައް ނުދީ މަޑުކުރީ މިދުވަސްވަރު ޕީކަށް ދާނެ ކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގެ ޑޮކްޓަރުންގެ ޓީމުން އެގޮތަށް ލަފާކޮށްފައިވާތީ ކަމަށެވެ.
މިނިސްޓަރު އަމީން ވިދާޅުވީ މިހާރުން މިހާރަށް ލުއިތައް ދެވޭނެ ރަށްތައް އެބަހުރި ކަމަށާއި، ދެވޭނެ ލުއިތައް ކަނޑައަޅާ ޚާއްޞަ އުޞޫލެއް އެކުލަވާލާފައިވާ ކަމަށެވެ. ނަމަވެސް ލުއިތައް ދޭއިރު ރައްޔިތުންގެ ޢަމަލުތައް ވެސް ހުންނަން ޖެހޭނީ ވަކި ގޮތަކަށް ކަމަށާއި، ނަފުސާއި އެހެން މީހުންގެ ރައްކާތެރިކަމަށް ކޮންމެހެން ކުރަން ޖެހޭ ކަންކަމަށް ފަރުވާ ކުޑަ ކޮށްގެން ނުވާނެ ކަމަށް މިނިސްޓަރު އަމީން ވިދާޅުވިއެވެ.
