ޑަބްލިޔުއެޗްއޯއިން ކުރިޔަށް ގެންދާ ތަހުގީގަށް އެއްބާރުލުން ދޭނެ ކަމަށް ޗައިނާއިން ބުނެފި

ކޮވިޑް-19 ފެތުރެންދިމާވި ސަބަބުތަކާއި ގުޅޭގޮތުން ދުނިޔޭގެ ސިއްހަތު ޖަމިއްޔާއިން ކުރިޔަށް ގެންދާ ތަހުގީގަށް ވައިރަސް ފެތުރުން ކޮންޓްރޯލްވުމުން އެހީތެރިކަން ފޯރުކޮށްދޭނެ ކަމަށް ޗައިނާގެ ރައީސް ޝީ ޖިންޕިންގ ވިދާޅުވެއްޖެ އެވެ.

ޑަބްލިޔުއެޗްއޯގެ އަހަރީ އާންމު ބައްދަލުވުމުގައި ވީޑިއޯ މެދުވެރިކޮށް ވާހަކަ ދައްކަވަމުން ވަނީ ވަކިން ޚާއްސަކޮށް ޔޫރަޕިއަން ޔޫނިއަން އަދި އޮސްޓްރޭލިއާ އިން އިސްނަގައިގެން ވައިރަސް އުފެދުނު ގޮތާއި ވައިރަސް ފެތުރެން ދިމާވި ސަބަބުތައް ދެނެގަތުމަށް ކުރަމުންދާ މަސައްކަތާއި ގުޅޭގޮތުން ވާހަކަ ދައްކަވާފަ އެވެ. މިވައިރަސް ގައި މުޅި ދުނިޔެއިން ތިން ލައްކަ އަށް ވުރެ ގިނަ މީހުން މަރުވެފަ އެވެ.

ޗައިނާ އިން މީގެ ކުރިން ވަނީ ތަކުރާރުކޮށް މިފަދަ ތަހުގީގަކަށް އެއްބާރުލުން ނުދޭނަކަން ހާމަކޮށްފަ އެވެ. އެމެރިކާއިން މީގެކުރިން އެފަދަ ތަހުގީގެއް ހިންގަންޖެހޭ ކަމަށް ބުނުމުން ޗައިނާއިން ވަނީ އެކަމާ ދެކޮޅު ހަދާފަ އެވެ.

އާންމު ބައްދަލުވުމުގައި ވާހަކަ ދައްކަވަމުން ޝީ ވިދާޅުވީ މިފަދަ ތަހުގީގެއް ހިނގަންޖެހޭނީ ސައިންޓިފިކް އަދި ޕްރޮފެޝަނަލް ކޮށް ޑަބްލިޔުއެޗްއޯ އިސްވެ އޮވެގެން ކަމަށެވެ. ޝީ ވަނީ ވައިރަސް އާ ގުޅިގެން ޗައިނާއިން އެއްވެސް ކަމެއް ނުފޮރުވާ ކަމަށާއި އެކަމާއި ގުޅޭ ހުރިހާ މައުލޫމާތެއް ހާމަކުރަންޖެހޭ ފަރާތްތަކާއި ހާމަކޮށްފައިވާ ކަމަށް ވިދާޅުވާ ވިދާޅުވުން ތަކުރާރު ކުރައްވާފަ އެވެ.

މީގެއިތުރުން ޝީ ވަނީ 2 ބިލިއަން އެމެރިކާގެ ޑޮލަރުގެ އެހީތެރިކަން ކޮވިޑް-19 އިން އަރައިގަތުމަށް ތަރައްޤީވަމުންދާ ގައުމުތަކުން ކުރަމުންދާ މަސައްކަތްތަކަށް އެހީތެރިވުމުގެ ގޮތުން ދޭނެކަމަށް ބުނެފަ އެެވެ. މިއީ ކުރިޔަށް އޮތް ދެ އަހަރު ދުވަހުގެ ތެރޭގައި ޗައިނާއިން ދެމުންދާނެ އެހީތެރިކަމެވެ. މީގެ އިތުރުން ކޮވިޑް-19 އަށް ވެކްސިނެއް ތައްޔާރުކުރުމަށް މަސައްކަތްކުރާއިރު އޭގެ ފައިދާ ހުރިހާ އެންމެންނަށް ކުރާނެ ގޮތަށް މަސައްކަތް ކުރާނެ ކަމަށް ޝީ ވިދާޅުވި އެވެ. އަދި އދ އާ ގުޅިގެން އިންސާނީ އެހީތެރިކަން ފޯރުކޮށްދިނުމަށް މަސައްކަތްކުރާނެ ކަމަށްވެސް ޝީ ވަނީ ވިދާޅުވެފަ އެވެ.