ގަވާއިދާ ހިފާލުވެގެން ދެ މީހަކު ފުލުހުންގެ ބެލުމުގެ ދަށަށް ގެންގޮސްފި

ލޮކްޑައުންއާއި ހިލާފުވެގެން ހޯމަ ދުވަހު 2 މީހަކު ފުލުހުންގެ ބެލުމުގެ ދަށަށް ގެންގޮސްފި އެވެ.

ނެޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ސެންޓަރުގެ ތަރުޖަމާނު މަބްރޫކް އަޒީޒު ވިދާޅުވީ ލޮކްޑައުންގެ ހާލަތާއި ގުޅިގެން އާންމުން ގަވާއިދާ އެއްގޮތަށް އުޅެމުންދޭތޯ ފުލުހުން ބަލަމުންދާ ކަމަށެވެ. މިގޮތުން ހޯމަ ދުވަހު ގަވާއިދާ ހިލާފުވެގެން 2 މީހަކު ފުލުހުންގެ ބެލުމުގެ ދަށަށް ގެނެވިފައިވާ ކަމަށާއި، 92 މީހަކު ޖޫރިމަނާ ކުރެވިފައިވާ ކަމަށެވެ.

މަބްރޫކް ވިދާޅުވީ މިހާތަނަށް އައި އިރު ފުލުހުންގެ ބެލުމުގެ ދަށަށް 230 މީހަކު ގެންދެވިފައިވާ ކަމަށެވެ. އަދި ޖޫރިމަނާ ކުރެވުނު މީހުންގެ އަދަދު 4313 ށް އަރާފައިވާ ކަމަށެވެ.

އާދީއްތަ ދުވަހު އެކަނި ވެސް 108 މީހަކު ޖޫރިމަނާ ކޮށް، 4 މީހަކު ފުލުހުންގެ ބެލުމުގެ ދަށަށް ގެންގޮސްފައި ވެއެވެ. އެގޮތުން މާލެއިން 93 މީހަކު، ހުޅުމާލެއިން 15 މީހަކު ޖޫރިމަނާކޮށްފައި ވާކަމަށް ފުލުހުން ވަނީ ބުނެފަ އެވެ.

ލޮކްޑައުންއާއި ޚިލާފުވެގެން މިހާތަނަށް ޖޫރިމަނާ ކުރި މީހުންގެ ޖުމުލަ ޢަދަދު 4313 އަށް އަރާފައިވާ އިރު، ޖޫރިމަނާ ކޮށްފައިވާ ފަރާތްތަކުން ދައުލަތަށް ދައްކަން ޖެހޭ ފައިސާގެ އަދަދަކީ 4،313،000 (ހަތަރު މިލިއަން ތިންސަތޭކަ ތޭރަ ހާސް) ރުފިޔާ އެވެ.

ފުރަބަންދު އަމުރާ ޚިލާފުވާ ފަރާތްތައް ޖޫރިމަނާ ކުރަނީ 1000ރ. އިންނެވެ. މި ޢަމަލު ތަކުރާރު ކުރާނަމަ، ޤާނޫނުލް އުޤޫބާތުގެ 533 ވަނަ މާއްދާގެ (ހ) ދަށުން ހައްޔަރުކުރުމުގެ ބާރު ފުލުހުންނަށް ލިބެ އެވެ.