ބަޔާންގެ އެއްބަސްވުން އާކުރަން އުޅޭ ވާހަކަތައް ނޯޔާ ދޮގުކޮށްފި

ބަޔާން މިއުނިކްގެ އެއްބަސްވުން އާކުރަން ގޯލްކީޕަރު މެނުއެލް ނޯޔާ އުޅޭ ކަމަށް އެ ކްލަބުގެ ޗެއާމަން ކާލް-ހެއިންޒް ރުމެނިގާ ދެއްކި ވާހަކަތައް ނޯޔާ ދޮގުކޮށްފި އެވެ.

ޖަރުމަންގެ ޝަލްކާއިން 2011 ވަނަ އަހަރު ބަޔާނަށް ބަދަލުވި ނޯޔާ، އެކުލަބާއިއެކު ހަދާފައިވާ އެއްބަސްވުން އަންނަ ސީޒަނުގައި ހަމަވާނެއެވެ.

އުމުރުން 34 އަހަރުގެ ނޯޔާގެ އެއްބަސްވުން އާކުރަން ބަޔާނުން މަސައްކަތް ކުރަމުން އަންނައިރު، އެއްބަސްވުން އާކުރަން ނޯޔާ ބޭނުންވަނީ އިތުރު ފަސް އަހަރަށް ކަމަށް ރިޕޯޓުތައް ބުނެއެވެ. އެކަމަކު ބަޔާނުން ނޯޔާއާއެކު މަޝްވަރާ ކޮށްފައިވަނީ އިތުރު ދެ އަހަރަށް އެއްބަސްވުން އާކުރާށެވެ.

ޖަރުމަން ލީގުގައި އާދީއްތަ ދުވަހުގެރޭ ޔޫނިއަން ބާލިންއާ ދެކޮޅަށް ބަޔާން ކުޅުނު މެޗުގެ ކުރިން އެ ކްލަބުގެ ޗެއާމަން ކާލް-ހެއިންޒް ރުމެނިގާ ވަނީ ބަޔާން އާއެކު ނޯޔާ ހަދާފައިވާ އެއްބަސްވުން އާކުރުމާ ގާތަށް ގޮސްފައިވާ ކަމަށް ބުނެފައެވެ. އެކަމަކު މެޗަށްފަހު ނޯޔާ ވަނީ އެކަން ދޮގު ކޮށްފައެވެ. ނޯޔާ ބުނީ އެއްބަސްވުމާ ގުޅޭ އިތުރު ކަމެއް އިއުލާން ކުރަން މިވަގުތު ނެތް ކަމަށެވެ.

މީގެ ކުރިން ބަޔާންގެ އެއްބަސްވުން އާކުރުމަށް ދެކެވުނު ވާހަކަތައް މީޑިއާގައި ލީކުވުމުން ނޯޔާ ވަނީ ހިތްހަމަނުޖެހުން ފާޅު ކޮށްފައެވެ.

ނޯޔާގެ އެއްބަސްވުން އާކުރަން ބަޔާނުން މަސައްކަތް ކުރަމުން އަންނައިރު، ނޯޔާ ގަތުމަށް ޗެލްސީން އަންނަނީ މަސައްކަތް ކުރަމުންނެވެ.

ޝާލްކާ އިން 2004 ވަނަ އަހަރު ކެރިއަރު ފެށި ނޯޔާ ބަޔާނަށް ބަދަލުވީ 2011 ވަނަ އަހަރުގައެވެ. އެ ފަހަރު ވެސް އޭނާ ހޯދުމަށް ޔޫރަޕުގެ ބޮޑެތި ކްލަބުތަކުން ވަނީ މަސައްކަތް ކޮށްފައެވެ. އޭގެ ތެރޭގައި މެންޗެސްޓާ ޔުނައިޓެޑާއި ލިވަޕޫލް ވެސް ހިމެނެއެވެ.