ރަށަށް ފޮނުވަން ބޭނުންވި ނަމަވެސް އަތޮޅު ތެރޭގެ ރަށްތައް 'ރިސްކަށް' ނުލެވޭނެ: މަބްރޫކް
18 މެއި 2020 | ހޯމަ 08:45ކެޓަގަރީއަށް ފެތެނީ 1600 މީހުން
ނޫސްވެރިންގެ ބައްދަލުވުމުގައި ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް
މާލެސިޓީ ލޮކްޑައުން ކުރުމާއި ގުޅިގެން މާލޭގައި ތާށިވެފައި ތިބި އަތޮޅުތެރޭގެ ރައްޔިތުން ރަށަށް ފޮނުވަން ބޭނުންވާ ކަމަށާއި، ނަމަވެސް ރަށްތައް 'ރިސްކަށް' ނުލެވޭނެ ކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވެއްޖެއެވެ.
އާދިއްތަ ދުވަހުގެ ރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ރަށަށް ދާން ބޭނުންވެގެން ގާތްގަނޑަކަށް 5000 މީހުން ނަން ހުށަހެޅި ކަމަށެވެ. ނަމަވެސް މީގެ ތެރެއިން ކެޓަގަރީއަށް ފެތެނީ 1600 މީހުން ކަމަށް މަބްރޫކް ވިދާޅުވި އެވެ.
މަބްރޫކް ވިދާޅުވީ މި މީހުންގެ ތެރެއިން ކޮންމެ ދުވަހަކު ވެސް ވަކި ބަޔަކު ފެސިލިޓީތަކަށް ގެންދިއުމުގެ މަސައްކަތް ކުރަމުންދާ ކަމަށާއ، 1600 މީހުންގެ ތެރެއިން ޖުމުލަ 598 މީހަކު ގެންދެވިފައިވާ ކަމަށެވެ. އަދި ވިދާޅުވީ 14 ދުވަސް ހަމަކުރި 8 މީހަކު ދޫކޮށްލާފައިވާ ކަމަށެވެ.
މީގެ އިތުރުން މަބްރޫކް ވިދާޅުވީ މާލޭގައި ތަށިވެފައި ތިބި މީހުން ރަށްތަަކަށް ފޮނުވުމަށް ބޭނުންވާ ކަމަށާއި، އެކަމަށް އެއްވެސް ފަރާތަކުން ހުރަސް ނާޅާ ކަމަށެވެ. ނަމަވެސް އެކަން ކުރުމަށްޓަކައި ރަށްރަށް 'ރިސްކްއަށް' ނުލެވޭނެ ކަމަށް މަބްރޫކް ވިދާޅުވިއެވެ.
ކުރިއަށް އޮތް ދުވަސްތަކުގައި ހާލުގައި ޖެހިފައި ތިބި މީހުން ގެންގޮސްދޭނެ ކަމަށާއި، ކޮޓަރިތައް އިތުރުކުރުމުގެ މަސައްކަތް ކުރިޔަށްދާކަންވެސް މަބްރޫކް ފާހަގަކުރެއްވިއެވެ.
