ފުލުހުންގެ ސަރވައިލެންސްގެ ދަށުގައި ތިބި ފަރާތްތަށް ކޮވިޑް-19 އަށް ސްކްރީން ކުރުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ޓީމެއް ނުކުމެއްޖެ އެވެ.
މިކަމާއި ގުޅިގެން އެޗްޕީއޭ އިން ބުނީ އާދީއްތަ ދުވަހުގެ ހެނދުނު ފުލުހުންގެ ސަރވައިލެންސްގެ ދަށުގައި ހުރި ބިދޭސީން ދިރިއުޅެމުންދާ ތަންތަނަށް ޚާއްސަކޮށް، މޯބައިލް މެޑިކަލް އޮޕަރޭޝަނެއް ކުރިއަށް ގެންދެވުނު ކަމަށެވެ.
އެގޮތުން، މި އޮޕަރޭޝަނުގައި 80 މީހަކު ސްކްރީން ކުރެވި، ޞިއްޙީ އެހީތެރިކަން ބޭނުންވާ މީހުންނަށް އެ އެހީތެރިކަން ފޯރުކޮށްދީފައި ވާކަމަށެވެ.
އަދި އެތަންތަނުގެ ދިރިއުޅުމުގެ ހާލަތާއި ގުޅޭ އެސެސްމެންޓެއްވެސް ހަދާފައިވާ ކަމަށް އެޗްޕީއޭއިން ބުންޏެވެ.
ބިދޭސީން ދިރިއުޅޭ ތަންތަން މޮނިޓަރ ކުރަން ފަށާފައި ވާއިރު، މާލޭގައި ތޮއްޖެހިގެން ދިރިއުޅޭ ބައެއް ބިދޭސީން ވަނީ ހުޅުމާލެގައި ސަރުކާރުން ގާއިމުކޮށްފައިވާ ވަގުތީ ހިޔާއަށް ބަދަލުކޮށްފަ އެވެ. މާލޭގައި ކޮވިޑް-19 ފެތުރެމުން ދާއިރު ބައްޔަށް ޕޮޒިޓިވްވި މީހުންގެ ތެރޭގައި ގިނަ އަދަދެއްގެ ބިދޭސީން ތިބުމުން އެ މީހުންގެ ތެރެއިން ގިނަ އަދަދެއްގެ ބަޔަކަށް ބަލި ޖެހިދާނެ ކަމުގެ ބިރު މިހާރު ވަނީ ހީވެފަ އެވެ.
