މަނަދޫން ޕޮޒިޓިވްވި 9 މީހުންނާއި ޑައިރެކްޓް ކޮންޓެކްޓްވި 52 ފަރާތެއް ދެނެގަނެވިއްޖެ: ކައުންސިލް
17 މެއި 2020 | އާދީއްތަ 06:29ޕޮޒިޓިވްވި 9 މީހުންނާއި ކޮންޓެކްޓްވި 62 ފަރާތެއް ދެނެގަނެވިފައިވޭ
ނ. މަނަދޫ މަތިން ނަގާފައިވާ މަންޒަރެއް: ކޮމިއުނިޓީ ސްޕްރެޑެއް ވަނީ ފެނިފައި
ނ. މަނަދޫން ކޮވިޑް-19ށް ޕޮޒިޓިވްވި 9 މީހުންނާއި, ޑައިރެކްޓް ކޮންޓެކްޓްވި 52 ފަރާތެއް ދެނެގަނެވިފައިވާ ކަމަށް އެ ރަށު ކައުންސިލުން ބުނެފި އެވެ.
ރާއްޖެޓީވީގެ ކޮވިޑް-19ގެ ހާއްސަ ކަވަރޭޖަށް ދެއްވި އިންޓަވިއު އެއްގައި މަނަދޫ ކައުންސިލްގެ ރައީސް މުހައްމަދު އުމަރު ވިދާޅުވީ، ކޮވިޑް-19ށް ޕޮޒިޓިވްވި 9 މީހުންނާއި ކޮންޓެކްޓްވި 62 ފަރާތެއް ދެނެގަނެވިފައި ވާކަމަށާއި އޭގެތެރެއިން ޑައިރެކްޓް ކޮންޓެކްޓްސްގެ ގޮތުގައި 52 ފަރާތެއް ފާހަގަކުރެވިފައި ވާކަމަށެވެ. އުމަރު ވިދާޅުވީ ކޮންޓެކްޓް ޓްރޭސިންގްގެ މަސައްކަތް ނިންމައި ބައެއް ފަރާތްތަކުގެ ސާމްޕަލްތައް ނެގިފައިވާކަމަށާއި 'ހައި ރިސްކް' ފަރާތްތައް އައިސޮލޭޓްކުރުމަށް ނިންމާފައިވާކަމަށެވެ. އަދި މީގެއިން އެއްވެސް މީހެއްގެ ގައިން ބަލީގެ އަލާމާތެއް ނުފެންނަކަން އޭނާ ފާހަގަކުރެއްވި އެވެ.
ބައްޔަށް ޕޮޒިޓިވްވި 9 މީހުންގެ ގައިންވެސް އަލާމާާތެއް ފެނިފައި ނުވާއިރު، އެ މީހުންނަކީ އެ ރަށުން އެންމެ ފުރަތަމަ ޕޮޒިޓިވްވި އަންހެން މީހާއާއި ކޮންޓެކްޓްވި 34 މީހުންގެ ތެރޭގައި ހިމެނޭ މީހުންނެވެ. އުމަރު ވިދާޅުވީ އެ ކޭސްއާއި ކޮންޓެކްޓްވި ފަރާތްތައް އައިސޮލޭޓް ކުރީ ގޭގައި ކަމަށާއި މިފަހަރު ފާހަގަވެފައިވާ ފަރާތްތައް ކައުންސިލްގެ ބެލުމުގެ ދަށުން ހުރިހާ އިންތިޒާމެއް ހަމަޖެހޭނެ ގޮތަކަށް މަސައްކަތް ކުރަމުން ދާކަމަށެވެ. އުމަރު ވިދާޅުވީ ރަށުން ފުރަތަމަ ފެނުނު ކޭސްއާއި ގުޅިގެން ކޮންޓެކްޓްވި ފަރާތްތައް ކަރަންޓީން ކުރީ އެމީހެއްގެ ގޭގައި ކަމަށާއި ގިނަ ކޮންޓެކްސްތަކަކީ އެއް އާއިލާއަކަށް ނިސްބަތްވާ މީހުން ކަމަށެވެ.
މަނަދޫން އިތުރު ބަޔަކު ޕޮޒިޓިވްވެ ކޮމިއުނިޓީ ސްޕްރެޑެއް ފެނިފައި ވާއިރު، މިވަގުތު ރަށުގެ ރައްޔިތުން ވެސް ތިބީ ބޮޑު ކަންބޮޑުވުމެއްގައި ކަން ފާހަގަ ކުރައްވައި ކައުންސިލްގެ ރައީސް އުމަރު އިތުރަށް ވިދާޅުވީ، ޓާސްކްފޯހާއި ކައުންސިލުން ދޭ އިރުޝާދުތަކަށް ރައްޔިތުން ބޯލަނބައި އެއްބާރުލުން ދެމުން އަންނަ ކަމަށެވެ. އަދި މިވަގުތު ރައްޔިތުން ބޭރަށް ނުކުތުން ވެސް މަނާ ކޮށްފައިވާ ކަމަށާއި، ރައްޔިތުންނަށް ބޭނުންވާ ޚިދުމަތްތައް ފޯރުކޮށްދިނުމުގެ މަސައްކަތް ޓާސްކްފޯހުން ކުރަމުންދާކަމަށް އޭނާ ވިދާޅުވި އެވެ.
