ރާއްޖޭގައި ކޮވިޑް-19 ގެ މަސައްކަތުގައި އިސްސަފުގައި ޙަރަކާތްތެރިވާ މީހުންގެ ތެރެއިން ކޮވިޑް-19ށް ޕޮޒިޓިވްވީ މީހުންގެ ޢަދަދު 199ށް އަރާފައިވާ ކަމަށް ޑރ. އިބްރާހިމް އަފްޒަލް ވިދާޅުވެއްޖެ އެވެ.

ހޮނިހިރު ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑޮކްޓަރ އަފްޒަލް ވިދާޅުވީ، ރާއްޖެއިން މިހާތަނަށް ފެނިފައިވާ ޕޮޒިޓިވް ކޭސްތަކުގެ ތެރެއިން އިސްސަފުގައި މަސައްކަތް ކުރާ 199 މީހަކު ޕޮޒިޓިވްވެފައިވާ ކަމަށެވެ.

ޑޮކްޓަރ އަފްޒަލް އެހެން ވިދާޅުވެފައި ވާއިރު، ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ޑރ އަފްޒަލް ވަނީ ރާއްޖޭގައި މަސައްކަތް ކުރާ 137 މީހަކު ޕޮޒިޓިވްވިކަން އިއުލާނު ކޮށްފަ އެވެ. އެއަށްފަހު މިހާތަނަށް އިސް ސަފުގައި މަސައްކަތްކުރާ އިތުރު 62 މީހަކު ޕޮޒިޓިވްވެ، މި ޢަދަދު މިހާރު 199ށް އަރާފައިވާކަން ޑޮކްޓަރ ފާހަގަ ކުރެއްވި އެވެ.

ތަފާސްހިސާބުތައް ދައްކާގޮތުން އެންމެ ގިނައިން އިސްސަފުގައި މަސައްކަތްކުރާ ފަރަކާތްތައް ޕޮޒިޓިވްވެފައި ވަނީ މެއި މަހުގެ 8 ވަނަ ދުވަހުގަ އެވެ. އެ ދުވަހު 51 މީހަކު ވަނީ ޕޮޒިޓިވްވެފަ އެވެ. އެގޮތުން ރާއްޖެއިން ފެނިފައިވާ ބޮޑެތި ކްލަސްޓަރތަކުގެ ތެރޭގައި ވެސް މި ފަރާތްތައް ހިމެނޭ ކަމަށް ޑރ. އަފްޒަލް ވިދާޅުވެފައިވެއެވެ.

ރާއްޖެއިން މިހާތަނަށް 1078 މީހަކު ކޮވިޑް-19 އަށް ޕޮޒިޓިވްވެފައި ވާއިރު، އެ ކޭސްތަކާ ގުޅިގެން ކޮންޓެކްޓް ޓްރޭސިންގއާއި ސާމްޕަލް ނެގުމުގެ މަސައްކަތް އަދިވެސް ކުރިއަށްދެއެވެ.