ކޮވިޑް-19އާ ގުޅިގެން ފަތުރުވެރިކަމުގެ ޙަރަކާތްތައް ހުއްޓުމަކަށް އައުމަކީ ކ. ދިއްފުއްޓަށް ލިބުނު ވަރަށް ބޮޑު ހީނަރު ކަމެއް ކަމަށް އެރަށު ކައުންސިލުން ބުނެފިއެވެ.

ރާއްޖެޓީވީގެ ކޮވިޑް-19ގެ ކަވަރޭޖަށް ދެއްވި އިންޓަވިއުއެއްގައި ކައުންސިލްގެ ރައީސް އިބްރާހިމް އަޒީމް ވިދާޅުވީ ފަތުރުވެރިކަަން ހުއްޓުމަކަށް އައުމަކީ އިގްތިސާދުގެ ބޮޑު ބައެއް ހުއްޓުމަކަށް އައުން ކަމުގައި ދެކޭ ކަމަށެވެ. އަދި މަސްވެރިކަމާ ފަތުރުވެރިކަމަށް އިގުތިސާދު ބަރޯސާވެފައި އޮންނައިރު، އެރަށުގެ ގިނަ އަދަދެއްގެ ރައްޔިތުންގެ ދިރިއުޅެމުން އައީ ފަތުރުވެރިކަމުގެ ސިނާއަތަށް ބަރޯސާވެގެން ކަމަށެވެ.

އަޒީމް ވިދާޅުވީ ފަތުރުވެރިކަން ހުއްޓުމަކަށް އައުމާއި ގުޅިގެން އެރަށަށް ބޮޑު ހީނަރު ކަމެއް އައިސްފައިވާ ކަމަށެވެ. އެގޮތުން އެރަށުން ގެސްޓް ހައުސްގެ ވިޔަފާރި ހިންގުމަށް ކުއްޔަށް ނަގާފައިވާ ތަންތަން ވެސް ބައެއް މީހުން ދޫކުރަމުންދާކަން އޭނާ ފާހަގަ ކުރެއްވިއެވެ.

ރަށުގެ އާންމު ހާލަތަށް އަލިއަޅުއްވާލައްވާ އަޒީމް ވިދާޅުވީ މާސްކް، އަންގި ފަދަ އާލަތްތައް ލިބެން އެބަހުރި ކަމަށާއި، ކާބޯތަކެއްޗަށް ވެސް ދަތި ނުވާ ކަމަށެވެ.

މީގެ އިތުރުން އަޒީމް ވިދާޅުވީ ކޮވިޑް-19ގެ ކޭސްއެއް އެރަށުން ފެނިއްޖެ ނަމަ، އެފަދަ ހާލަތަކަށް ތައްޔާރުވެފައިވާ ކަމަށެވެ. އެގޮތުން ފިހާރަތަކުން ޑެލިވަރ ކޮށްދިނުމުގެ އިންތިޒާމުތައް ވެސް ހަމަޖެހިފައިވާ ކަމަށް އަޒީމް ވިދާޅުވިއެވެ.

އަޒީމް ވިދާޅުވީ ކޮވިޑް-19ން ރައްކާތެރިވުމަށް ގިނަ ފިޔަވަޅުތަކެއް އަޅާފައިވާ ކަމަށާއި، ރަށުގެ ދިރިއުޅޭ ބިދޭސީންގެ ހާލަތު ވެސް ވަރަށް ގާތުން ބަލަމުން އަންނަ ކަމަށެވެ. އަދި އެރަށުގައި ދިރިއުޅޭ ގިނަ ބިދޭސީންނަކީ އެއްވެސް ލިޔެކިޔުމެއް ނެތް މީހުން ކަމަށާއި، އެމީހުންގެ ދަފުތަރު މިހާރު އެކުލަވާލާފައިވާ ކަމަށް އަޒީމް ވިދާޅުވިއެވެ.