ކުނަހަންދޫއިން ޕެނަޑޯލް ގުޅައެއް ލިބޭނެ ހާލު ވެސް ނެތް: ކައުންސިލް
15 މެއި 2020 | ހުކުރު 18:16ކަރަންޓީން ކުރަންޖެހޭ ހާލަތުގައި އެކަން ކުރެވޭނެ އިންތިޒާމް މިހާރު ވަނީ ހަމަޖެހިފައި
ލ.ކުނަހަންދޫގައި ހުރި ވަސީލަތްތައް ބޭނުންކޮށްގެން ރައްކާތެރިވުމުގެ ގޮތުން ވަނީ ގިނަ ފިޔަވަޅުތަކެއް އަޅާފައި
ލ. ކުނަހަންދޫގެ ސިއްހީ މަރުކަޒުގެ ހާލަތު ވަރަށް ދަށް ކަމަށާއި، ޕެނަޑޯލް ގުޅައެއް ލިބޭނެ ހާލަތު ވެސް ނެތް ކަމަށް އެރަށުގެ ކައުންސިލުން ބުނެފި އެވެ.
ރާއްޖެޓީވީގެ ކޮވިޑް-19ގެ ކަވަރޭޖަށް ދެއްވި ބަސްތީގަތުމެއްގައި ކުނަހަންދޫ ކައުންސިލްގެ ނައިބް ރައީސް ލިރްޣާމް ސައީދު ވިދާޅުވީ ރަށުގެ އާންމު ހާލަތު ރަނގަޅުވި ނަމަވެސް ސިއްހީ މަރުކަޒުގެ ހާލަތު އެހެން ރަށްރަށާއި އަޅާބަލާއިރު ވަރަށް ދަށް ކަމަށެވެ.
ލިރްޣާމް ވިދާޅުވީ ސިއްހީ މަރުކަޒުގައި ވަސީލަތްތައް ނެތް ކަމަށާއި، ބޭސް ލިބުމުގައި ދަތިތައް ކުރިމަތިވެފައިވާ ކަމަށެވެ. އެގޮތުން ޕެނަޑޯލް ގުޅައެއް ވެސް ލިބެން ނެތް އޭނާ ވިދާޅުވި އެވެ. އަދި ވިދާޅުވީ އައިވީ ވެސް ހުރީ ވަރަށް މަދުވެފައި ކަމަށެވެ.
ކޮވިޑް-19އާ ގުޅިގެން ސިއްހީ މަރުކަޒާއެކު ގިނަ މަސައްކަތްތައް ކުރެވޭކަން ފާހަގަކުރައްވައި ލިރްޣާމް ވިދާޅުވީ ހާލަތު ބަދަލުވަމުންދާ ގޮތަށް ވިސްނާ މީހުން ކަރަންޓީން ކުރަން ޖެހިއްޖެ ހާލަތެއްގައި އެކަން ކުރެވޭ ގޮތަށް މިހާރު އިންތިޒާމްތައް ހަމަޖައްސާފައިވާ ކަމަށެވެ.
މީގެ އިތުރުން ލިރްޣާމް ވިދާޅުވީ ރައްޔިތުންގެ ރައްކާތެރިކަމަށް ގިނަ ފިޔަވަޅުތަކެއް އަޅާފައިވާ ކަމަށެވެ. ނަމަވެސް އަންގި، މާސްކް އަދި ޕީޕީއީ ލިބިފައި ނުވާ ކަމަށާއި، މިއާތްތައް ހޯދުމަށް ސަރުކާރުގައި އެދިފައިވާތާ ދޮޅު މަސް ދުވަސް ވެފައިވާ ކަމަށެވެ.
ލިރްޣާމް ވިދާޅުވީ މާލެއިން ގެނެވޭ މުދާ ރަށު ތެރެއަށް އަރުވަނީ ޑިސްއިންފެކްޓް ކުރުމަށްފަހު ކަމަށާއި، އަބަދު ވެސް ރަށުތެރެ މޮނިޓަރ ކުރުމުގެ މަސައްކަތްތައް ކުރަމުންދާ ކަމަށެވެ.
ލިރްޣާމް ވިދާޅުވީ ވަސީލަތްތައް ނެތް ނަމަވެސް ރައްކާތެރިވުމުގެ ގޮތުން އަޅަމުންދާ ފިޔަވަޅުތަކަށް ރައްޔިތުންގެ ފުރިހަމަ އެއްބާރުލުން ލިބެމުންދާ ކަމަށެވެ. އަދި މިދަނޑިވަޅުގައި އެންމެ މުހިންމު ކަމަކީ ސިއްހީ މާހިރުން ދެއްވާ އިރުޝާދުތަކާ އެއްގޮތަށް އަމަލު ކުރުންކަމަށް ވެސް އޭނާ ފާހަގަކުރެއްވި އެވެ.
