ކަރަންޓީނު ގަވާއިދާ ޚިލާފުވުމުން އައުގްސްބާގުގެ ކޯޗު ސަސްޕެންޑް ކޮށްފި

ކަރަންޓީނު ގަވާއިދާ ޚިލާފުވުމުން ބެންޗަށް ނާދެވޭ ގޮތަށް ޖަރުމަން ލީގުގެ އައުގްސްބާގުގެ ކޯޗު ހެއިކޯ ހާލިޗު ސަސްޕެންޑް ކޮށްފި އެވެ.

ހޮނިހިރު ދުވަހު ޖަރުމަން ލީގު އަލުން ފެށުމަށް ތައްޔާރުވެފައިވާއިރު، ރައްކާތެރިކަމުގެ ފިޔަވަޅެއްގެ ގޮތުން ހުރިހާ ކްލަބެއްގެ ކުޅުންތެރިންނާއި އޮފިޝަލުން ތިބީ ހޮޓާތަކުގައި ކަރަންޓީނުކޮށްފައެވެ. އަދި ކަރަންޓީނު ކޮށްފައިވާ ހޮޓާތަކުން އެއްވެސް މީހަކު ނުކުތުން ވަނީ މަނާކޮށްފައެވެ.

އެކަމަކު ހެއިކޯ ހާލިޗު ވަނީ ދަތް އުނގުޅާ ބޭސް ފުޅިއެއް ގަތުމަށް އޭނާ ކަރަންޓީނުވެފައި ހުރި ހޮޓާގެ ކައިރީ ހުންނަ ސުޕަމާކެޓަކަށް ގޮސްފައެވެ. އެއާއެކު އޭނާ ވަނީ ހޮނިހިރު ދުވަހު އައުގްސްބާގުން ވުލްފްސްބާގާ ދެކޮޅަށް ކުޅޭ މެޗުގައި ބެންޗަށް ނާދެވޭ ގޮތަށް ސަސްޕެންޑް ކޮށްފައެވެ.

ސަސްޕެންޝަނާ ގުޅިގެން ހެއިކޯ ހާލިޗު ބުނީ ދަތް އުނގުޅާ ބޭސްފުޅިއެއް ގަންނަން އޭނާ ދިޔައީ ރައްކާތެރިވުމުގެ ގޮތުން އަންގި ލައްވައި މާސްކު ވެސް އަޅައިގެން ކަމަށެވެ. އެކަމަކު އޭނާ އަކީ ހުރިހާ ކުޅުންތެރިންނަށް ނަމޫނާ ދައްކަން ޖެހޭ މީހެއް ކަމުން، އޭނާ އަށް ހެދުނީ ވަރަށް ބޮޑު ގޯހެއް ކަމަށްވެސް ވަނީ ބުނެފައެވެ.

ދެ މަސް ފަހުން ޖަރުމަން ލީގުގެ ކުޅުން އަލުން ފަށާއިރު، އައުގްސްބާގް މިވަގުތު އޮތީ ތާވަލުގެ 14 ވަނައިގައި 27 ޕޮއިންޓާއެކު އެވެ. ޖަރުމަން ލީގުގެ މެޗުތައް ސަޕޯޓަރުން ނުވައްދައި ކުޅޭ ގޮތަށް ނިންމާފައިވާއިރު، ޖޫން މަހުގެ 28 ވަނަ ދުވަހު ލީގުގެ ކުޅުން އެއްކޮށް ނިންމާލަން ޖަރުމަން ފުޓްބޯލް ލީގުން ވަނީ ނިންމާފައެވެ.