މަތިވެރި ކައުންސިލްގެ އެންގުމާއި ހިލާފުވާ ފަރާތްތައް ޖޫރިމަނާ ކުރަނީ
މަދު ބައެއްގެ ފަރާތުން ކައުންސިލްގެ އެންގުތަކާއި ޚިލާފަށް ޢަމަލުތަށް ބަހައްޓާ
އއ. މަތިވެރި؛ އެންގުމާއި ހިލާފުވާނަމަ ނަސޭޙަތްތެރިވުމަށްފަހު 500 ރުފިޔާއާއި 5000 ރުފިޔާއާއި ދެމެދުގެ އަދަދުން ޖޫރިމަނާކުރެވޭނެ
ކޮވިޑް-19 އާއި ގުޅިގެން އއ. މަތިވެރި ކައުންސިލުން އަންގާފައިވާ އެންގުމާއި ޚިލާފުވާ ފަރާތްތައް ޖޫރިމަނާ ކުރާނެ ކަމަށް މަތިވެރި ކައުންސިލުން ބުނެފިއެވެ.
މަތިވެރި ކައުންސިލުން ބުނީ ޒަރޫރީ ބޭނުމެއް ނެތި ރަށުތެރޭގައި ނޫޅުމަށް އަންގާ އިޢުލާނުކޮށްފައިވީ ނަމަވެސް މަދު ބައެއްގެ ފަރާތުން ކައުންސިލްގެ އެންގުތަކާއި ޚިލާފަށް ޢަމަލުތަށް ބަހައްޓާތީވެ، މިކަން މިގޮތަށް ނުކުރުމަށް އަންގާ ކަމަށެވެ. މިގޮތުން ޟަރޫރީ ބޭނުމެއް ނެތި ހަވީރުގެ ގަޑިތަކާއި އެހެނިހެން ގަޑިތަކުގައި މީހުން މަގުމަތީގައި ނިކުމެ އުޅުމާއި ފިނިބުރު ޖެހުމަށް ސައިކަލް ދުއްވާ ހެދުމަކީ މަނާކަމެއް ކަމަށް ބުނެފައި ވެއެވެ.
މަތިވެރި ކައުންސިލުން ބުނީ މިއެންގުތަކާއި ޚިލާފުވާ ފަރާތްތަށް ދިވެހި ރާއްޖޭގެ އިދާރީ ދާއިރާތަށް ލާމަރުކަޒީ އުޞޫލުން ހިންގުމުގެ ޤާނޫނުން ކައުންސިލަށް ލިބިދޭ ބާރުގެ ދަށުން އެފަރާތަކަށް ނަސޭޙަތްތެރިވުމަށް ފަހު 500 ރުފިޔާއާއި 5000 ރުފިޔާއާއި ދެމެދުގެ އަދަދުން ޖޫރިމަނާ ކުރެވޭނެ ކަމަށެވެ.
މަތިވެރި ކައުންސިލުން ކޮވިޑް-19 އާއި ގުޅިގެން އަޅަން ނިންމާފައިވާ ފިޔަވަޅުތަކުގެ ތެރޭގައި މާލެއާއި މާލެކައިރި ޞަރަޙައްދުން 14 އޭޕްރީލްގެ ފަހުން އެ ރަށަށް ދަތުރުކޮށްފައިވާ ފަރާތްތަކުން 14 ދުވަސް ވަންދެން ގޭގައި މަޑުކުރުމަށް ވަނީ އަންގާފައެވެ.
އަދި ޒަރޫރީ ބޭނުންތަކުގައި މެނުވީ އެއްރަށުން އަނެއްރަށަށް އަރާފޭބުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މަނާކުރުމާއިގުޅިގެން މަތިވެރިއަށް ޒަރޫރީ ބޭނުންތަކުގައި އަންނަ ފަރާތްތަކުން ވަކި ނަންބަރުތަކަށް ގުޅާ މަޢުލޫމާތު ޙިއްސާ ކުރުމަށް ވަނީ އެދިފައެވެ. ނަންބަރުތަކަކީ 9665188، 9907298، 7772549 އަދި 9997886 އެވެ.
މީގެ އިތުރުން ދިރިއުޅޭ ގޭބިސީ ފިޔަވާ އެހެން އެއްވެސް ތަނެއްގައި އެއްވެ އުޅުމާއި ޙާއްޞަކޮށް ޕާޓީތަކާއި، ޙަފުލާތަށް ބޭއްވުމާއި، ދަތުރު ދިޔުމާއި، މޫއްދަށް އެރުމާއި، ކުޅިވަރު ކުޅުމާއި، ގުރޫޕް ހަދާފައި އުޅުމަކީ މަނާކަމެއް ކަމަށް ވަނީ އަންގާފަ އެވެ. އަދި ބަލިން ރައްކާތެރިވުމުގެ ގޮތުން ކަމާބެހޭ އިދާރާތަކުން ދީފައިވާ އިރުޝާދުތަކާއި އެއްގޮތަށް ހުރިހާ ވަގުތެއްގައި ވެސް ޢަމަލުކުރުމާއި ޒަރޫރީ ބޭނުންތަކަށް ތަންތަނަށް ގޮސް އުޅުމުގައި ވެސް މީހުންނާއި 3 ފޫޓަށް ގައިދުރުކަން ބެހެއްޓުމަށް ވަނީ އަންގާފައެވެ.
މީގެ އިތުރުން މާލެއިންނާއި، ރިސޯޓުތަކުންނާއި، ސަފާރިތަކުން ރަށަށް ދަތުރުކޮށްފައިވާ ފަރާތްތަކުން ކެއްސުމާއި ހުންއައުން އަދި ނޭވާއަށް އުނދަގޫވުން ފަދަ ކޮވިޑް-19 ގެ ޢަލާމާތެއް ހުިނަމަ، ލަސްނުކޮށް 1676 ނަންބަރާއި ގުޅާ ނުވަތަ މެސެޖަކުން މަޢުލޫމާތު ޙިއްސާކުރުމަށް ވަނީ އެދިފައެވެ.
