ވިލިވަރު ކަރަންޓީން ފެސިލިޓީގެ މަސައްކަތް ނިންމާލައިފި
200 އެނދުގެ ޖާގަ އަލަށް ހެދި ފެސިލިޓީގައި ހުންނާނެ
ވިލިވަރުގައި ތަރައްގީކުރި ކަރަންޓީން ފެސިލިޓީގެ މަސައްކަތް ނިންމާފައި؛ މިތަނަކީ ބިދޭސީންނަށް ހާއްސަ ކުރެވިފައިވާ ތަނެއް
ބިދޭސީންނަށް ހާއްސަކޮށްގެން ވިލިވަރުގައި ހެދި ކަރަންޓީން ފެސިލިޓީގެ މަސައްކަތް ނިންމާލައިފި އެވެ.
ވިލިވަރު ކަރަންޓީން ފެސިލިޓީގެ މަސައްކަތް ކުރަމުން އަންނަ ފެނަކަ ކޯޕަރޭޝަނުން ބުނީ އެތަނުގެ މަސައްކަތް އެއްކޮށް ނިންމާލާފައިވާ ކަމަށެވެ.
އަލަށް އިތުރުކުރި 200 ޖާގައާއެކު މި މަހުގެ 17 ވަނަ ދުވަހު ވިލިވަރު ކަރަންޓީން ފެސިލިޓީ އަލުން ހުޅުވާނެކަމަށް ޓުއަރިޒަމް މިނިސްޓަރު އަލީ ވަހީދު ވަނީ މީގެ ކުރިން ވިދާޅުވެފަ އެވެ. މިނިސްޓަރު އަލީ ވަހީދު ވިދާޅުވީ ފެސިލިޓީގެ މަސައްކަތް ވެސް 'ސަރޖް' ގެ ތެރެގައި ނިންމާލެވޭ ވަރަށް މަސައްކަތް ކުރެވިފައިވާ ކަމަށެވެ.
މީގެ އިތުރުން ވިލިވަރުގައި ތަރައްގީ ކުރާ 200 މީހުންގެ ޖާގައިގެ ފެސިލިޓީ މެއި މަހުގެ 17 ވަނަ ދުވަހުގައި މީހުން ވައްދާ ވަރަށް ނިންމާލެވޭނެ ކަމަށެވެ. އަދި މެއި މަހުގެ 16 ވަނަ ދުވަހު މީޑިއާ އާއި ހިއުމަން ރައިޓްސް ކޮމިޝަނަށް އެތަން ދައްކާލަން ގެންދިއުމަށް ގަސްދުކުރުމާ ކަމަށް ވިދާޅުވި އެވެ. އެއީ، އެތަނުގެ ހާލަތު ބަލާލުމުގެ ފުރުސަތު އެފަރާތްތަކަށް ފަހިކޮށްދިނުމުގެ ބޭނުމުގައި ކަމަށް ވިދާޅުވި އެވެ.
ވިލިވަރު ކަރަންޓީން ފެސިލިޓީއެއްގެ ގޮތުގައި ހަމަޖެއްސުމަށް ފަހު އެތަނުގައި ދިމާވި މައްސަލައަކާއި ގުޅިގެން ފެސިލިޓީ އެއްކޮށް ހުސްކުރި އެވެ. އަދި ފަހުން އެތަން މަރާމާތު ކުރުމަށްފަހު އެތަނަކީ ބިދޭސީންނަށް ހާއްސަ ތަނެއްގެ ގޮތުގައި ވަނީ ކަނޑައަޅާފަ އެވެ.
މީގެ ކުރިން ވިލިވަރުގައި ތަރައްގީ ކުރީ 30 އެނދުގެ ފެސިލިޓީއެކެވެ. އަދި 200 އެނދު އިތުރު ކުރުމާއެކު ޖުމުލަ އަދަދު މިހާރު ވަނީ 230 ށް އަރާފަ އެވެ.
