ކޮވިޑް-19 އާ ގުޅިގެން މޮނިޓަރިންގެ ޙާލަތަށް ގެނެވިފައިވާ 2 ރަށެއްގެ މޮނިޓަރިންގ އުވާލައިފި އެވެ.

ބުރާސްފަތި ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ(އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، ށ އަތޮޅު މިލަންދޫއާއި ކ އަތޮޅު ތުލުސްދޫގެ މޮނިޓަރިންގެ ޙާލަތު އުވާލެވިފައިވާ ކަމަށެވެ.

ށ މިލަންދޫ އޭރު މޮނިޓަރިންއަށް ލެވިފައިވަނީ ށ. ނަރުދޫގެ ''އަމާޒު'' ބޯޓުން ދަތުރުކުރި މީހެއް އެރަށުން ޕޮޒިޓިވްވުމާ ގުޅިގެންނެވެ. އަދި 15 އޭޕްރީލްގައި ތުލުސްދޫއިން މާލެއަށް ދިޔަ ބިދޭސީއަކާއި ދިވެއްސެއް ޕޮޒިޓިވް ވުމާއި ގުޅިގެން އެ ރަށް އޭރު މޮނިޓަރިންއަށް ލެވުނެވެ.

ކޮވިޑް-19 އާ ގުޅިގެން ރަށްރަށް މޮނިޓަރިންގެ ޙާލަތަށް ގެންދިއުމާއި، މޮނިޓަރިންގ އުވާލުމުގެ ބާރު ލިބިގެންވަނީ ޑިރެކްޓަރ ޖެނެރަލް އޮފް ޕަބްލިކް ހެލްތަށެވެ. އެގޮތުން ކޮވިޑް-19 އިން ރައްކާތެރިވުމުގެ ގޮތުން އާންމު ސިއްޙަތު ރައްކާތެރި ކުރުމުގެ ޤާނޫނުގެ ދަށުން ބެލުމަށް ކަނޑައެޅިފައިވާ ކަންކަން ބަލައިނިމި، މޮނިޓަރިންގ ގެ ޙާލަތު އިތުރަށް ދަމަހައްޓަންޖެހޭ ސަބަބެއް ނެތްކަން ޑީޖީއަށް ފާހަގަކުރެވުމުން ބައެއް ރަށްރަށުގެ މޮނިޓަރިންގ އުވާލަމުންދެ އެވެ.

މިހާރުވެސް މާލެ ސަރަޙައްދުގެ އިތުރުން ރާއްޖޭގެ ބައެއް ރަށްރަށް އަދިވެސް މޮނިޓަރިންގެ ޙާލަތަށް ގެނެވިފައި ވެއެވެ. އެގޮތުން މިވަގުތުވެސް 341 ތަނެއް މޮނިޓަރިންގެ ޙާލަތުގައިވާކަން މަބްރޫކު ފާހަގަ ކުރެއްވި އެވެ.

ރާއްޖެއިން މިހާތަނަށް 982 މީހަކު ވައިރަސްއަށް ޕޮޒިޓިވްވެފައިވާއިރު، ކޭސްތަކާ ގުޅިގެން ކޮންޓެކްޓް ޓްރޭސިންގ އަދި ސާމްޕަލް ނެގުމުގެ މަސައްކަތް އަދިވެސް ކުރިއަށްދެ އެވެ.